2 ImiLando 36 - iBhayibhili Elingcwele 1978

Ukubusa kukaJehowahazi

¹ Abantu belizwe bathatha uJehowahazi indodana kaJosiya, bambeka inkosi esikhundleni sikayise eJerusalema.

² UJehowahazi wayeleminyaka engamatshumi amabili lantathu lapho eqalisa ukubusa; wabusa inyanga ezintathu eJerusalema.

³ Inkosi yaseGibithe yamsusa esikhundleni eJerusalema, yathelisa ilizwe umthelo wamathalenta esiliva alikhulu lethalenta elilodwa legolide.

⁴ Yabeka uEliyakimi umfowabo ukuba abe yinkosi koJuda laseJerusalema, yaliphendula ibizo lakhe yathi nguJehoyakimi; yamthatha umfowabo uJehowahazi yamusa eGibithe.

Ukubusa kukaJehoyakimi

⁵ UJehoyakimi wayeleminyaka engamatshumi amabili lanhlanu lapho eqalisa ukubusa; wabusa iminyaka elitshumi lanye eJerusalema. Wenza okubi phambi kweNkosi uNkulunkulu wakhe.

⁶ UNebukadineza inkosi yaseBabiloni wamhlasela, wambopha ngezibopho, wamusa eBabiloni.

⁷ UNebukadineza wathatha ingxenye yezitsha zethempeli, wazisa eBabiloni, wazifaka esigodlweni sakhe.

⁸ Ezinye indaba zikaJehoyakimi, lamanyala wonke awenzayo, lamacala akhe, kulotshiwe ogwalweni lwamakhosi akoIsrayeli lawakoJuda. UJehoyakini indodana yakhe waba yinkosi esikhundleni sakhe.

UJehoyakini uthunjelwa eBabiloni

⁹ UJehoyakini wayeleminyaka eficaminwembili lapho eqalisa ukubusa; wabusa inyanga ezintathu lensuku ezilitshumi eJerusalema. Wenza okubi phambi kweNkosi.

¹⁰ Ekuqaleni komnyaka inkosi uNebukadineza yathumela abantu ukuba alethwe eBabiloni, lezitsha eziligugu zethempeli; yabeka umfowabo uZedekiya ukuba abe yinkosi yakoJuda laseJerusalema.

Ukubusa kukaZedekiya

¹¹ UZedekiya wayeleminyaka engamatshumi amabili lanye lapho eqalisa ukubusa; wabusa iminyaka elitshumi lanye eJerusalema.

¹² Wenza okubi phambi kweNkosi uNkulunkulu wakhe; kazithobanga phambi kukaJeremiya umprofethi owayekhulumela iNkosi uNkulunkulu.

¹³ Wayivukela inkosi uNebukadineza eyayimfungise ngoNkulunkulu ukuba athembeke kuyo. Waba lenkani lenhliziyo elukhuni ngokuphendukela eNkosini, uNkulunkulu kaIsrayeli.

¹⁴ Zonke inhloko zakoJuda labapristi kanye labantu labo babonile kakhulu, balandela amanyala wonke ezizwe, balingcolisa ithempeli eyayizahlukanisele lona eJerusalema.

¹⁵ INkosi, uNkulunkulu wabokhokho babo, yabathumela futhifuthi izithunywa zayo, ngoba yayilesihawu ngabantu bayo langendawo yayo yokuhlala.

¹⁶ Kodwa babelokhu bezihleka ulunya izithunywa zikaNkulunkulu, bedelela amazwi akhe, beklolodela abaprofethi bakhe, lwaze lwavutha ulaka lweNkosi ebantwini bayo baze baswela usizo.

Ukuthunjwa kwelakoJuda

¹⁷ Ngalokhoke yabathumela inkosi yamaKaladiya eyabulala amajaha abo lasendlini yabo engcwele, ingahawukeli amajaha lezintombi, abadala lamaxhegu; iNkosi uNkulunkulu yabanikela bonke esandleni sayo.

¹⁸ Lazo zonke izitsha zendlu kaNkulunkulu ezinkulu lezincinyane, lenotho yayo, lenotho yenkosi leyezikhulu zayo, konke lokhu yakusa eBabiloni.

¹⁹ Yayitshisa indlu kaNkulunkulu, yadiliza umduli weJerusalema, yazitshisa zonke izigodlo zalo ngomlilo, yabulala zonke izitsha zalo eziligugu.

²⁰ Yathumbela eBabiloni bonke labo ababesile ekubulaweni empini, baba zinceku zayo lezabantwana bayo kwaze kwaba yisikhathi sombuso wamaPerisiya.

²¹ Lagcwaliseka ngokunjalo ilizwi leNkosi eyalikhuluma ngoJeremiya isithi: Kuze kube yisikhathi lelilizwe lizakuzuza ukuphumula kwalo kweSabatha, kuze kwedlule iminyaka engamatshumi ayisikhombisa, lizagcina iSabatha insuku zalo zonke zokuchitheka kwalo.

Isimemezelo sikaKurosi

²² Kwathi ngomnyaka wokuqala wokubusa kukaKurosi inkosi yasePerisiya, ukuba kugcwaliseke ilizwi leNkosi eyalikhuluma ngoJeremiya, iNkosi yavusa inhliziyo kaKurosi inkosi yasePeresiya ukuba amemezele embusweni wakhe wonke, alobe futhi athi:

²³ Nanti ilizwi likaKurosi inkosi yasePerisiya. Lithi: INkosi, uNkulunkulu ophezulu, inginikile yonke imibuso yomhlaba, ingilayile ukuyakhela indlu eJerusalema koJuda. Kubo bonke abantu bayo abaphakathi kwenu ngithi iNkosi uNkulunkulu wabo kabe labo, bayekeleni bahambe.