Biblia Todo Logo
Bìoball air-loidhne

- Sanasan -

2 ImiLando 35 - iBhayibhili Elingcwele 1978


Ukugcinwa kwePhasika

1 UJosiya wayigcinela iNkosi iPhasika eJerusalema; bahlaba iwundlu lePhasika ngosuku lwetshumi lane lwenyanga yokuqala.

2 Wabeka abapristi emsebenzini wabo, wabakhuthaza enkonzweni yethempeli.

3 Wathi kumaLevi ayebafundisa bonke abakoIsrayeli ayengcwele eNkosini: Fakani umtshokotsho wesivumelwano endlini uSolomoni indodana kaDavida inkosi yakoIsrayeli ayakhayo; kakusadingeki ukuba liwuthwale ngamahlombe enu. Khonzani iNkosi uNkulunkulu wenu lisebenzele labantu bayo uIsrayeli.

4 Lizilungise lina ngezindlu zenu langezigaba zenu, lenze njengokulotshiweyo nguDavida inkosi yakoIsrayeli languSolomoni indodana yakhe.

5 Lime endaweni engcwele limele izindlu zabantu abayizihlobo zenu, isigaba sibe sinye samaLevi kuleyo laleyondlu.

6 Lihlabe iwundlu lePhasika, lizihlambulule, lilungisele izihlobo zenu ukuba lenze njengokutsho kwelizwi leNkosi ngoMose.

7 UJosiya wasenika abantu amawundlu lamazinyane, aba zinkulungwane ezingamatshumi amathathu, lenkunzi ezizinkulungwane ezintathu ukuba kube ngumnikelo wePhasika wabo bonke ababekhona; konke lokhu kwakuvela empahleni yenkosi.

8 Izikhulu zakhe zabanika abantu labapristi lamaLevi ngenhliziyo enhle. OHilikiya loZekariya loJehiyeli, induna ezinkulu zethempeli, banikelela abapristi ukuba kube yiminikelo yePhasika amawundlu lamazinyane azinkulungwane ezimbili lamakhulu ayisithupha, lenkunzi ezingamakhulu amathathu.

9 OKonaniya loShemaya loNethaneli, abafowabo, loHashabiya loJeyiyeli loJozabadi, induna zamaLevi, banikelela amaLevi ukuba kube yiminikelo yePhasika amawundlu lamazinyane azinkulungwane ezinhlanu, lenkunzi ezingamakhulu amahlanu.

10 Kwathi inkonzo isilungisiwe, abapristi bema endaweni zabo, lamaLevi ngezigaba zawo, njengokutsho kwenkosi uJosiya.

11 Balihlaba iwundlu lePhasika, abapristi bakhaphazela igazi ealtareni, amaLevi ahlinza.

12 Bakhupha iminikelo yokutshiswa ukuba bayabele izindlu zabantu ukuba zinikele eNkosini uNkulunkulu, njengokulotshiweyo ogwalweni lukaMose. Benza njalo langezinkunzi.

13 Bosa iwundlu lePhasika ngomlilo njengokumisiweyo emthethweni; bapheka iminikelo engcwele ngamabhodo langezimbiza langezindengezi, bayisa masinyane ebantwini.

14 Ngemva kwalokho basebezilungisela bona labapristi, ngoba abapristi abakoAroni babebambekile ekunikeleni iminikelo yokutshiswa kanye lamahwahwa kwaze kwahlwa; ngakho amaLevi azilungisela wona labapristi bakoAroni.

15 Abahlabeleli abakoAsafi babesendaweni yabo njengomlayo kaDavida lokaAsafi lokaHemani lokaJeduthuni umboni wenkosi; abagcini bamasango babesemasangweni; kwakungadingeki ukuba batshiye umsebenzi wabo ngoba izihlobo zabo amaLevi abalungisela.

16 Yasilungiswa yonke inkonzo yeNkosi uNkulunkulu ngalolosuku ukuba kugcinwe iPhasika lokuba kunikelwe iminikelo yokutshiswa phezu kwealtare leNkosi, njengokutsho kwenkosi uJosiya.

17 Abantu bakoIsrayeli ababekhona baligcina iPhasika ngalesosikhathi, benza kanye lomkhosi wesinkwa esingelamvubelo insuku eziyisikhombisa.

18 Kaligcinwanga iPhasika elinjengaleli koIsrayeli kusukela ensukwini zikaSamuweli umprofethi; wonke amakhosi akoIsrayeli kawazanga aligcine iPhasika elinjengaleli elagcinwa nguJosiya, labapristi lamaLevi, labo bonke abakoJuda labakoIsrayeli ababekhona, labaseJerusalema.

19 Ngomnyaka wetshumi lesificaminwembili wokubusa kukaJosiya iPhasika leli lagcinwa.


Ukufa kukaJosiya

20 Ngemva kwakho konke lokho, uJosiya eselilungisile ithempeli, uNeko inkosi yaseGibithe waphuma ukuyahlasela eKarikemeshi ngasemfuleni iYufrathi; loJosiya waphuma ukuyakulwa laye.

21 Kodwa uNeko wathuma izithunywa kuye esithi: Kambe sibangani mina lawe, nkosi yakoJuda na? Kangizanga ukulwa lawe lamhla, kodwa ngizekulwa lalowo engilwa laye. UNkulunkulu ungilayile ukuba ngiphangise; akukhawule ukuphikisana loNkulunkulu, ngoba yena ungakimi, funa akubhubhise.

22 Kodwake uJosiya kayekelanga, wazifihla ukuba alwe laye; kawalalelanga amazwi kaNeko awakhuluma ethunywa nguNkulunkulu, wangena ekulweni emagcekeni aseMegido.

23 Abatshoki bemitshoko bamciba uJosiya; wasesithi encekwini zakhe: Ngisusani ngoba ngilimele kubi.

24 Inceku zakhe zasezimehlisa enqoleni yokulwa, zamthwala ngenye, zamusa eJerusalema. Wafa, wangcwatshelwa emalibeni abokhokho bakhe; bonke abakoJuda labaseJerusalema bamlilela.

25 LoJeremiya laye watsho isililo ngoJosiya. Abahlabelelayo bonke abesilisa labesifazana sebehaye ngoJosiya ezililweni zabo kuze kube lamhla. Lezizililo sezingumkhuba koIsrayeli; zilotshiwe encwadini yezililo.

26 Ezinye indaba zikaJosiya lezenzo zakhe ezinhle ezivumelana lokulotshiweyo emlayweni weNkosi,

27 izenzo zakhe, kusukela ekuqaleni kuze kube sekucineni, zilotshiwe ogwalweni lwamakhosi akoIsrayeli lawakoJuda.

Bible Society of Zimbabwe 1978

Bible Society of Zimbabwe
Lean sinn:



Sanasan