2 ImiLando 3 - iBhayibhili Elingcwele 1978

USolomoni wakha ithempeli

¹ USolomoni waqala ukwakha ithempeli eJerusalema entabeni yaseMoriya lapho iNkosi yabonakala khona kuyise uDavida, endaweni uDavida ayikhethayo esizeni sikaOrnani umJebusi.

² Waqalisa ukulakha emnyakeni wesine wokubusa kwakhe ngenyanga yesibili.

³ Nanzi izilinganiso zikaSolomoni zokwakhiwa kwendlu kaNkulunkulu; ubude ngezingalo zesilinganiso esidala babuzingalo ezingamatshumi ayisithupha, ububanzi buzingalo ezingamatshumi amabili.

⁴ Umkoto owawungaphambi kwendlu ububanzi bawo babuzingalo ezingamatshumi amabili, ulingana lobubanzi bendlu, ukuphakama kwawo kuzingalo ezingamatshumi amabili. Wawugudulwe ngaphakathi ngegolide elihle.

⁵ Indlu wayakha ngamaphane ngaphakathi, wayigudula ngegolide elihle, wabaza imifanekiso yamalala leyamaketane kiyo.

⁶ Wayicecisa ngokufaka amatshe amahle; igolide alisebenzisayo lavela eParivayimi.

⁷ Wayigudula indlu ngegolide, insika zayo lemigubazi yayo lemiduli yayo leminyango yayo, wabaza amakherubi emidulini.

⁸ Wenza lendawo engcwele kakhulu; ubude bayo babulingana lobubanzi bendlu, buzingalo ezingamatshumi amabili, lobubanzi bayo buzingalo ezingamatshumi amabili; wayibhada ngegolide elihle elingamathalenta angamakhulu ayisithupha.

⁹ Ubunzima bezipikili babungamashekeli egolide angamatshumi amahlanu. Wazigudula izindlu ezingaphezulu ngegolide.

¹⁰ Endaweni engcwele kakhulu wabaza amakherubi amabili, wawabhada ngegolide.

¹¹ Ubude bempiko zamakherubi zizonke babuzingalo ezingamatshumi amabili. Uphiko lulunye lwekherubi lwaluzingalo ezinhlanu ukuyafinyelela emdulini, lolunye uphiko lwaluzingalo ezinhlanu ukuyafinyelela ophikweni lwelinye ikherubi;

¹² ngokunjalo uphiko lwekherubi lesibili lwaluzingalo ezinhlanu ukufinyelela komunye umduli wendlu; uphiko lwalo lwesibili lwahlangana lolwekherubi lokuqala.

¹³ Impiko zalamakherubi zeluleka ingalo ezingamatshumi amabili; ayemi phansi ngenyawo zawo ekhangele indlu engaphandle.

¹⁴ Wenza iveli ngamalembu aluhlaza layibubende labomvu langelembu elihle, welukela imifanekiso yamakherubi kilo.

Umsebenzi kaHuramu ethempelini

¹⁵ Ngaphambi kwendlu wenza insika ezimbili, ubude bazo buzingalo ezingamatshumi amathathu lanhlanu, zileziduku phezulu ezizingalo ezinhlanu ubude.

¹⁶ Wenza amaketane anjengezigqizo, wawafaka ezidukwini zensika; wenza lamapomegranati alikhulu, wawafaka emaketaneni.

¹⁷ Wazimisa insika ngaphambi kwethempeli, enye yaba ngakwesokunene, enye yaba ngakwesokhohlo; engakwesokunene wayibiza ngokuthi nguJakini, lengakwesokhohlo wayibiza ngokuthi nguBowasi.