2 ImiLando 27 - iBhayibhili Elingcwele 1978

Ukubusa kukaJothamu

¹ UJothamu wayeleminyaka engamatshumi amabili lanhlanu lapho eqalisa ukubusa; wabusa iminyaka elitshumi lesithupha eJerusalema. Ibizo likanina lalinguJerusha indodakazi kaZadoki.

² Wenza okulungileyo phambi kweNkosi njengokwenza konke kukayise uUziya, kodwa yena kangenanga ethempelini leNkosi; abantu babelokhu besenza imikhuba emibi.

³ Wakha isango lethempeli elingaphezulu, wenza umsebenzi omkhulu wokwakha emdulini waseOfeli.

⁴ Futhi wakha lemizi entabeni zakoJuda, lezinqaba, lemiphotshongo emasandleni amaqaqa.

⁵ Walwa lenkosi yamaAmoni, wayinqoba; wona amnika ngalowomnyaka amathalenta esiliva alikhulu, lamasaka amabele azinkulungwane ezilitshumi lesikhombisa kanye lawebhali azinkulungwane ezilitshumi lesikhombisa. Amnika okufananayo ngomnyaka wesibili langowesithathu.

⁶ Ngakho uJothamu waba lamandla, ngoba waziphatha kuhle phambi kweNkosi uNkulunkulu wakhe.

⁷ Ezinye indaba zikaJothamu, lazo zonke izimpi zakhe, lokwenza kwakhe, kulotshiwe ogwalweni lwamakhosi akoIsrayeli lawakoJuda.

⁸ Wayeleminyaka engamatshumi amabili lanhlanu lapho eqalisa ukubusa; wabusa iminyaka elitshumi lesithupha eJerusalema.

⁹ Waya kwabaphansi, bamngcwabela emzini kaDavida; uAhazi indodana yakhe waba yinkosi esikhundleni sakhe.