2 ImiLando 25 - iBhayibhili Elingcwele 1978

Ukubusa kukaAmaziya

¹ UAmaziya wayeleminyaka engamatshumi amabili lanhlanu lapho eqalisa ukubusa; wabusa eJerusalema iminyaka engamatshumi amabili lesificamunwemunye. Ibizo likanina lalinguJehowadini waseJerusalema.

² Wenza okulungileyo phambi kweNkosi, kodwa kungesikho ngenhliziyo epheleleyo.

³ Kwathi umbuso wakhe usuqinile, wabulala inceku zakhe ezazibulele inkosi uyise.

⁴ Kodwa kababulalanga abantwana bazo, njengokulotshiweyo emlayweni, ogwalweni lukaMose lapho iNkosi yalaya khona ukuthi: Oyise kabayikubulawa ngenxa yabantwana, labantwana kabayikubulawa ngenxa yaboyise, kodwa wonke umuntu uzafela izono zakhe.

⁵ UAmaziya wabuthanisa abantu bakoJuda labakoBenjamini, wabamisa ngezindlu zabo bephethwe yizinduna zezinkulungwane lezamakhulu. Wabutha kusukela kwabaleminyaka engamatshumi amabili kusiya phezulu, wabafumanisa bezinkulungwane ezingamakhulu amathathu zamadoda akhethiweyo, angaphuma impi, langahloma ngemikhonto langezihlangu.

⁶ Wabuya waqatsha koIsrayeli amaqhawe alamandla azinkulungwane ezilikhulu ngamathalenta esiliva alikhulu.

⁷ Kodwa kwafika umuntu kaNkulunkulu kuye, wathi: Nkosi yami ungayivumeli impi yakoIsrayeli ukuhamba lawe, ngoba iNkosi uNkulunkulu kayilabo abakoIsrayeli, bonke laba abakoEfrayimi.

⁸ Kodwa uba ucabanga ukuthi ngalindlela uzakuba lamandla okulwa, uNkulunkulu uzakukuwisela phansi phambi kwezitha zakho, ngoba uNkulunkulu ulamandla okusiza lawokuwisela phansi.

⁹ UAmaziya wasesithi emuntwini kaNkulunkulu: Phoke, sizakwenza njani ngamathalenta alikhulu esengiwanike impi yakoIsrayeli na? Yena waphendula wathi: INkosi uNkulunkulu ilamandla okukunika okwedlula lokho.

¹⁰ UAmaziya waseyikhulula impi eyayifike kuye ivela koEfrayimi ukuba ibuyele ekhaya. Babathukuthelela kakhulu abakoJuda, babuyela ekhaya bevutha ulaka.

¹¹ Kodwa uAmaziya waqunga isibindi, wabakhupha abantu bakhe, waya esihotsheni seTshwayi, wabulala abantu baseSeyiri abazinkulungwane ezilitshumi.

¹² AbakoJuda bathumba abanye abazinkulungwane ezilitshumi, babasa engqongeni yeliwa, babaphosela ngaphansi, baphahlazeka bonke.

¹³ Kodwa impi yakoIsrayeli uAmaziya ayeyibuyisele ekhaya engayivumelanga ukuba ihambe laye ekulweni yahlasela imizi yakoJuda, kusukela eSamariya kwaze kwaba seBetiHoroni, yabulala abantu abazinkulungwane ezintathu, yathatha impango enengi.

¹⁴ UAmaziya esebuyile ekunqobeni abantu abaseEdoma, wabuya labonkulunkulu babantu baseSeyiri, wababeka baba ngonkulunkulu bakhe, wabakhonza, wanikela kibo.

¹⁵ Ngalokhu iNkosi uNkulunkulu yamthukuthelela, yathumela kuye umprofethi owathi kuye: Ubafuneleni onkulunkulu abangakhululanga abantu babo esandleni sakho na?

¹⁶ Kodwa kwathi esakhuluma, uAmaziya wathi kuye: Kambe sikwenze nini umeluleki wenkosi na? Thula! Uzifakelani engozini na? Kodwa engakathuli umprofethi wathi: Ngiyazi ukuba uNkulunkulu uzimisele ukukubhubhisa, ngoba wenzile lokhu, kawukulalelanga ukweluleka kwami.

¹⁷ UAmaziya inkosi yakoJuda eselulekiwe wathumela izithunywa kuJowashi indodana kaJehowahazi kaJehu, inkosi yakoIsrayeli, wathi: Woza, siqondane.

¹⁸ UJowashi inkosi yakoIsrayeli wathumela ilizwi kuAmaziya inkosi yakoJuda esithi: Uthathawe lwaseLebanoni lwathumela ilizwe emkuswini waseLebanoni lusithi: Yendisela indodana yami indodakazi yakho; kwasekudlula isilo saseLebanoni, salugxoba uthathawe.

¹⁹ Wena uthi: Khangela, ngilehlule iEdoma; usuzikhukhumeza ngokuzincoma; kodwa hlala ekhaya, ngoba ufunelani ukuzivusela uhlupho ukuba uwe wena labakoJuda na?

²⁰ Kodwa uAmaziya kathandanga ukulalela; ngoba lokho kwakwenziwe nguNkulunkulu ukuze abanikele ezandleni zezitha zabo ngoba babefune onkulunkulu baseEdoma.

²¹ UJowashi inkosi yakoIsrayeli wasephumake, yena loAmaziya inkosi yakoJuda bahlangana empini eBeti‐Shemeshi elakoJuda.

²² AbakoJuda bahlulwa ngabakoIsrayeli, babaleka bonke, baya emizini yabo.

²³ UJowashi inkosi yakoIsrayeli wambamba uAmaziya inkosi yakoJuda, indodana kaJowashi, kaAhaziya, eBeti‐Shemeshi, wamletha eJerusalema, wadilizela phansi umduli weJerusalema ibanga elizingalo ezingamakhulu amane, kusukela eSangweni lakoEfrayimi kusiya eSangweni leNgonsi.

²⁴ Wathumba lonke igolide lesiliva, lezitsha zonke ezazisendlini kaNkulunkulu ezazigcinwe nguObedi‐Edoma, lenotho yesigodlo senkosi, labantu, wasebuyela eSamariya.

²⁵ UAmaziya indodana kaJowashi inkosi yakoJuda waphila iminyaka elitshumi lanhlanu ngemva kokufa kukaJowashi indodana kaJehowahazi inkosi yakoIsrayeli.

²⁶ Ezinye indaba zikaAmaziya, kusukela ekuqaleni kuze kube sekucineni, zilotshiwe ogwalweni lwamakhosi akoJuda lawakoIsrayeli.

²⁷ Kusukela esikhathini atshiya ngaso iNkosi bamenzela icebo eJerusalema, wasebalekela eLakishi; kodwa bathumela abantu khona, bambulalela khona.

²⁸ Bamthwala ngamabhiza, wangcwatshelwa emzini kaDavida.