2 ImiLando 24 - iBhayibhili Elingcwele 1978

Ukubusa kukaJowashi koJuda

¹ UJowashi wayeleminyaka eyisikhombisa lapho eqalisa ukubusa; wabusa iminyaka engamatshumi amane eJerusalema. Ibizo likanina lalinguZibiya waseBerisheba.

² UJowashi wenza okulungileyo phambi kweNkosi, insuku zonke zikaJehoyada umpristi.

³ UJehoyada wamdingela abafazi ababili, uJowashi wazala amadodana lamadodakazi.

⁴ Emva kwalokho uJowashi wazimisela ukulungisa ithempeli.

⁵ Wabuthanisa abapristi lamaLevi, wathi kubo: Yanini kuyo yonke imizi yakoJuda, liqoqe kubo bonke abakoIsrayeli imali yokulungisa indlu kaNkulunkulu wenu umnyaka ngomnyaka, lenze masinyane. Kodwa amaLevi kawenzanga masinyane.

⁶ Inkosi yasibiza uJehoyada umpristi omkhulu, yathi kuye: Kungani ungatshelanga amaLevi ukuba baqoqe koJuda laseJerusalema umthelo owamiswa nguMose inceku yeNkosi ebandleni lakoIsrayeli ukuba ube ngowethente loBufakazi?

⁷ Ngoba uAthaliya owesifazana omubi lamadodana akhe babefohlele endlini kaNkulunkulu, futhi babesebenzise zonke izinto ezingcwele zayo ekukhonzeni oBali.

⁸ Inkosi yasilaya ukuba kwenziwe ibhokisi, libekwe ngasesangweni lethempeli.

⁹ Kwenziwa isimemezelo kulo lonke lakoJuda laseJerusalema ukuba kulethwe eNkosini uNkulunkulu umthelo uMose inceku kaNkulunkulu ayewumisele uIsrayeli enkangala.

¹⁰ Zonke izikhulu labo bonke abantu bathokoza, baletha umthelo wabo, bawufaka ebhokisini laze lagcwala.

¹¹ Kwakusithi lapho ibhokisi lilethwa ngamaLevi ezinduneni zenkosi, nxa ebona ukuthi imali isinengi kulo, umabhalane wenkosi lenduna yompristi omkhulu beze bayithulule ebhokisini, balibuyisele endaweni yalo. Benza njaloke insuku ngensuku, baqoqa imali enengi.

¹² Inkosi loJehoyada bayinika abaphathi bomsebenzi wethempeli, baqatsha ngayo abakha ngamatshe lababazi labasebenza ngensimbi langethusi ukulungisa ithempeli.

¹³ Labo ababeqatshiwe basebenza, umsebenzi waqhubekela phambili, bayilungisa indlu kaNkulunkulu, yabuyela esimeni sayo esifaneleyo, bayiqinisa.

¹⁴ Kwathi sebeqedile bayiletha imali eseleyo enkosini lakuJehoyada, kwenziwa ngayo izitsha zethempeli, ezenkonzo lezeminikelo yokutshiswa, lemiganu yempepha, lezinye izitsha zegolide lezesiliva. Banikela njalonjalo iminikelo yokutshiswa ethempelini insuku zonke zikaJehoyada.

¹⁵ UJehoyada waluphala, wafa; wayeseleminyaka elikhulu lamatshumi amathathu ekufeni kwakhe.

¹⁶ Bamngcwabela emzini kaDavida phakathi kwamakhosi, ngoba wayenze okulungileyo koIsrayeli lakuNkulunkulu lasendlini yakhe.

¹⁷ Ngemva kokufa kukaJehoyada izikhulu zakoJuda zaya enkosini uJowashi, zafika zakhuleka kuyo, inkosi yazilalela.

¹⁸ Bayidela indlu yeNkosi, uNkulunkulu wabokhokho babo, bakhonza insika zikankulunkulukazi uAshera lezithombe. Ulaka lukaNkulunkulu lwehlela phezu kwabakoJuda labaseJerusalema ngenxa yalesisono sabo.

¹⁹ Kodwa iNkosi yathumela abaprofethi phakathi kwabo ukubabuyisela kuyo; bona babaxwayisa, kodwa kababalalelanga.

²⁰ Umoya kaNkulunkulu wasusehlela kuZekariya indodana kaJehoyada umpristi; wema phambi kwabantu, wathi kibo: UNkulunkulu uthi: Kungani lisaphula imilayo yami ukuba lingaphumeleli na? Ngoba lingilahlile mina Nkosi, lami ngililahlile.

²¹ Basebemenzela icebo; belaywe yinkosi uJowashi, bamkhanda uZekariya ngamatshe egumeni lethempeli.

²² UJowashi inkosi kawukhumbulanga umusa kaJehoyada uyise kaZekariya ayemenzele wona, kodwa wabulala indodana yakhe. Lapho esesifa uZekariya wathi: INkosi uNkulunkulu kayibone iphindisele.

²³ Ekupheleni komnyaka impi yamaSiriya yamhlasela uJowashi, yafika koJuda laseJerusalema, yazibulala zonke izikhulu zabantu, yathumela yonke impango enkosini yaseDamaseko.

²⁴ Lanxa impi yamaSiriya yayilabantu abalutshwana, iNkosi uNkulunkulu yanikela kuyo impi enkulu kakhulu, ngoba abakoJuda babeyilahlile iNkosi, uNkulunkulu wabakhokho babo. Ngalokho uJowashi wehlelwa ngokumfaneleyo.

²⁵ Kwathi amaSiriya esesukile kuye, emtshiye egula kakhulu, inceku zakhe zamenzela icebo ziphindisela ukubulawa kwendodana kaJehoyada umpristi, zambulalela embhedeni wakhe. Wafa, bamngcwabela emzini kaDavida, kodwa kabamngcwabanga emalibeni amakhosi.

²⁶ Labo ababemenzele icebo babengoZabadi indodana kaShimeyathi owesifazana womAmoni, loJehozabadi indodana kaShimirithi owesifazana womMowabi.

²⁷ Indaba zamadodana akhe, lamazwi amanengi ngaye, langokulungiswa kwendlu kaNkulunkulu, kulotshiwe endabeni esogwalweni lwamakhosi. UAmaziya indodana yakhe waba yinkosi esikhundleni sakhe.