2 ImiLando 21 - iBhayibhili Elingcwele 1978

Ukubusa kukaJoramu koJuda

¹ UJehoshafati waya kwabaphansi, wangcwatshelwa kuboyise emzini kaDavida. UJoramu indodana yakhe waba yinkosi esikhundleni sakhe.

² Wayelabafowabo abangamadodana kaJehoshafati, oAzariya loJehiyeli loZekariya loAzariya loMikayeli loShefathiya. Bonke labo babengamadodana kaJehoshafati inkosi yakoJuda.

³ Uyise wabanika izipho ezinengi zesiliva legolide lempahla eligugu kanye lemizi ebiyelweyo yakoJuda; kodwa umbuso wawunika uJoramu ngoba wayelizibulo.

⁴ UJoramu esengenile esikhundleni sikayise eseqinile, wabulala bonke abafowabo kanye lezinye izikhulu zakoIsrayeli.

⁵ Wayeleminyaka engamatshumi amathathu lambili ekuqaleni kwakhe ukubusa, wabusa eJerusalema iminyaka eficaminwembili.

⁶ Walandela indlela zamakhosi akoIsrayeli njengendlu kaAhabi, ngoba wayethethe indodakazi kaAhabi; wenza okubi phambi kweNkosi.

⁷ Kodwa iNkosi kayiyichithanga indlu kaDavida ngenxa yesivumelwano eyayisenze loDavida, lokhu yayithembise ukumnika inhlansi yena lamadodana akhe kuze kube nini lanini.

⁸ Ensukwini zakhe iEdoma lawuvukela umbuso wakoJuda, bazibekela eyabo inkosi.

⁹ UJoramu wangena kwelaseEdoma kanye lezinduna zakhe zempi, lenqola zakhe zonke zokulwa; wavuka ebusuku, wawachitha amaEdoma ayesemzingelezele yena lenduna zenqola zakhe zokulwa.

¹⁰ Ngakho iEdoma lawuhlamuka umbuso wakoJuda kuze kube lamhla. LeLibina lalo lawuhlamuka umbuso wakhe, ngoba wayeyidelile iNkosi, uNkulunkulu wabokhokho bakhe.

¹¹ Futhi wamisa indawo eziphakemeyo zokukhonzela entabeni zakoJuda, wenza abaseJerusalema bakhonze izithombe, waduhisa abakoJuda.

¹² Kwafika kuye incwadi ivela kuElija umprofethi isithi: INkosi, uNkulunkulu kaDavida uyihlo, ithi: Ngoba ungahambanga ezindleleni zikaJehoshafati uyihlo lezikaAsa inkosi yakoJuda,

¹³ kodwa ulandele indlela zamakhosi akoIsrayeli, wenza labakoJuda labaseJerusalema bakhonze izithombe njengendlu kaAhabi eyenza abakoIsrayeli bakhonze izithombe, futhi ubabulele abafowenu abendlu kayihlo ababengcono kulawe,

¹⁴ iNkosi izakwehlisela isifo esikhulu ebantwini bakho lasebantwaneni bakho lakubomkakho, lakuyo yonke impahla yakho;

¹⁵ lawe uqobo uzakugula umkhuhlane omubi owesifo samathumbu akho, amathumbu akho aze aphume ngokuhamba kwensuku ngenxa yesifo.

¹⁶ INkosi yasimvusela uJoramu amaFilistiya lamaArabiya ababehlala eduze lamaEtiyopiya;

¹⁷ bahlasela koJuda, bangena khona, bathumba yonke impahla abayifumanayo eyayingeyesigodlo senkosi kanye lamadodana ayo labafazi bayo, kakwaze kwasala leyodwa indodana ngaphandle kukaJehowahazi, indodana yayo encinyane.

¹⁸ Ngemva kwalokho iNkosi yehlisela emathunjini akhe isifo esingelaphekiyo.

¹⁹ Ngokuhamba kwesikhathi ekupheleni kweminyaka emibili amathumbu akhe aphuma ngenxa yesifo; wafa ngobuhlungu obukhulu. Abantu bakhe kabambaselanga umlilo wokuphelekezela njengemililo eyabaselwa oyise.

²⁰ Wayeleminyaka engamatshumi amathathu lambili ekuqaleni kwakhe ukubusa, wabusa eJerusalema iminyaka eficaminwembili; wafa engakhalelwa muntu. Bamngcwabela emzini kaDavida, kodwa kungesikho emalibeni amakhosi.