2 ImiLando 16 - iBhayibhili Elingcwele 1978

Isivumelwano sikaAsa loBenihadadi

¹ Ngomnyaka wamatshumi amathathu lesithupha wokubusa kukaAsa uBahasha inkosi yakoIsrayeli wahlasela uJuda, wakha iRama ukuvalela abantu ukuba bangahambelani loAsa inkosi yakoJuda.

² UAsa wasethatha isiliva legolide okwakusenothweni yethempeli lakweyakhe indlu, wakuthumela kuBenihadadi inkosi yaseSiriya owayehlala eDamaseko, wathi:

³ Ake senze isivumelwano njengobaba loyihlo; ngiyakuthumela nanso isiliva legolide. Yephula isivumelwano sakho loBahasha inkosi yakoIsrayeli ukuze asuke kimi.

⁴ UBenihadadi wayilalela inkosi uAsa, wathumela induna zakhe zempi ukuhlasela imizi yakoIsrayeli, zathumba iIjoni leDani leAbeli‐Mayimi, lemizi yonke yokugcinela amabele yakoNafitali.

⁵ Kwathi uBahasha ekuzwa lokhu wayekela ukwakha iRama, wawumisa umsebenzi wakhe.

⁶ Inkosi uAsa yasithatha bonke abakoJuda, basusa amatshe eRama kanye lezigodo uBahasha ayesakha ngakho; uAsa wakha ngakho iGeba leMizipa.

⁷ Ngalesosikhathi uHanani umboni wafika kuAsa inkosi yakoJuda, wathi kuye: Ngoba uthembele enkosini yaseSiriya, ungathembelanga eNkosini uNkulunkulu wakho, impi yenkosi yakoIsrayeli ikuphunyukile.

⁸ AmaEtiyopiya lamaLibiya ayengesiyo impi enkulu, elezinqola zokulwa ezinengi labagadi bamabhiza abanengi na? Kanti ngoba uthembele eNkosini, yawanikela esandleni sakho.

⁹ Ngoba amehlo eNkosi uNkulunkulu athalaza emhlabeni wonke ukuba ibatshengise amandla ayo ngenxa yalabo abalenhliziyo ezipheleleyo kuyo. Wena wenzile ubuthutha kulokhu, ngakho kusukela lamhlanje uzakuba lezimpi ezinengi.

¹⁰ UAsa wamthukuthelela umboni, wamfaka entolongweni, ngoba wamthukuthelela kakhulu ngalokhu. UAsa wenza isihluku ebantwini abathile ngasona lesosikhathi.

¹¹ Indaba zikaAsa, kusukela ekuqaleni kuze kube sekucineni, zilotshiwe ogwalweni lwamakhosi akoJuda lakoIsrayeli.

¹² Ngomnyaka wamatshumi amathathu lesificamunwemunye wokubusa kwakhe uAsa wabulawa zinyawo, umkhuhlane wakhe wakhula kakhulu; kodwa lasekuguleni kwakhe kayidinganga iNkosi, wadinga usizo ezinyangeni.

¹³ Waya kwabaphansi, wabhubha ngomnyaka wamatshumi amane lanye wokubusa kwakhe.

¹⁴ Bamngcwaba elibeni ayezigebhele lona emzini kaDavida; bambeka phezu kwethala elaligcwele amakha enhlobo ezinengi ayenziwe ngokuhlakanipha kwezingcitshi zamakha; babasa umlilo omkhulu ukumphelekezela.