2 ImiLando 15 - iBhayibhili Elingcwele 1978

Imvuselelo kaAsa

¹ Umoya kaNkulunkulu wehlela phezu kukaAzariya indodana kaOdedi;

² waphuma ukuhlangabezana loAsa, wathi kuye: Lalela, Asa, lani lonke abakoJuda labakoBenjamini; iNkosi uNkulunkulu ilani nxa lani liselayo. Uba liyidinga, izalivumela ukuba liyifumane; kodwa uba liyilahla, layo izalilahla.

³ Isikhathi eside abakoIsrayeli babengelaye uNkulunkulu weqiniso, bengelaye umpristi wokubafundisa, bengelawo umlayo.

⁴ Kodwa kwathi osizini lwabo baphendukela eNkosini, uNkulunkulu kaIsrayeli, bamdinga, wabavumela ukuba bamfumane.

⁵ Ngalezozikhathi kwakungelakuthula ekuhambeni kwabantu, ngoba bonke abantu bamazwe behlelwa zinhlupheko ezinengi.

⁶ Kwakukhona ukuchitheka endaweni zonke, isizwe sisilwa lesizwe, lomuzi usilwa lomuzi, ngoba uNkulunkulu wabehlisela inhlobo zonke zosizi.

⁷ Kodwa lina manini isibindi, liqine, ngoba umsebenzi wenu uzakuba lomvuzo.

⁸ Lapho uAsa ewezwa wonke lamazwi kaAzariya indodana kaOdedi, waqunga isibindi, wakhupha zonke izithombe eziyisinengiso elizweni lonke lakoJuda lakoBenjamini lemizini ayeyithumbile entabeni zakoEfrayimi, walungisa ialtare leNkosi elalingaphambi komkoto wethempeli.

⁹ Wabuthanisa bonke abakoJuda labakoBenjamini lalabo ababevela koEfrayimi lakoManase lakoSimeyoni ababehlala phakathi kwabo; ngoba abantu abanengi babalekela kuye bevela koIsrayeli lapho bebona ukuthi iNkosi uNkulunkulu wakhe yayilaye.

¹⁰ Babuthana eJerusalema ngomnyaka wetshumi lanhlanu wokubusa kukaAsa, ngenyanga yesithathu.

¹¹ Bayihlabela iNkosi uNkulunkulu ngalolosuku empangweni ababeyilethile inkabi ezingamakhulu ayisikhombisa lezimvu ezizinkulungwane eziyisikhombisa.

¹² Benza isivumelwano sokuba bayidinge iNkosi, uNkulunkulu wabokhokho babo, ngenhliziyo yabo yonke langomoya wabo wonke;

¹³ bathi lowo ongayidingi iNkosi uNkulunkulu kaIsrayeli uzabulawa, omutsha lomdala, owesilisa lowesifazana.

¹⁴ Bafunga isifungo eNkosini ngokumemeza langokukhala kwempondo.

¹⁵ Bonke abakoJuda bathokoza ngesifungo, ngoba babefungile ngenhliziyo yabo yonke, beyidingile ngeqiniso, yabavumela ukuyifumana; ngakho iNkosi uNkulunkulu yabanika ukuthula inxa zonke.

¹⁶ Inkosi uAsa yakhupha loninakhulu uMahaka esikhundleni sokuba yindlovukazi, ngoba wayemenzele unkulunkulukazi uAshera isithombe esinengisayo. UAsa wasigamula isithombe, wasigxoba, wasitshisela esifuleni iKidroni.

¹⁷ Kanti indawo eziphakemeyo zokukhonzela kazivalwanga koIsrayeli; kodwa inhliziyo kaAsa yayiqotho insuku zakhe zonke.

¹⁸ Wangenisa endlini kaNkulunkulu izinto uyise ayezahlukanisele iNkosi, kanye lezakhe izinto ezahlukaniselwe iNkosi, isiliva legolide lezitsha.

¹⁹ Kakusabanga khona impi kwaze kwaba ngumnyaka wamatshumi amathathu lanhlanu wokubusa kukaAsa.