2 ImiLando 14 - iBhayibhili Elingcwele 1978

Ukubusa kukaAsa

¹ UAbija waya kwabaphansi, bamngcwabela emzini kaDavida. UAsa indodana yakhe waba yinkosi esikhundleni sakhe. Ensukwini zakhe ilizwe laba lokuthula iminyaka elitshumi.

² UAsa wenza okuhle lokulungileyo phambi kweNkosi uNkulunkulu wakhe.

³ Wasusa wonke ama‐altare ezizwe, wavala lendawo eziphakemeyo zokukhonzela, wadiliza insika zakhona, wagamula insika ezimiselwe unkulunkulukazi uAshera,

⁴ walaya abakoJuda ukuba bayidinge iNkosi, uNkulunkulu wabokhokho babo, bagcine umthetho lomlayo.

⁵ Waqeda kuyo yonke imizi yakoJuda indawo eziphakemeyo zokukhonzela, lamaaltare empepha. Umbuso waba lokuthula ekubuseni kwakhe.

⁶ Wakha imizi ebiyelweyo koJuda, ngoba ilizwe lalilokuthula. Wayengalwi izimpi ngaleyominyaka, ngoba iNkosi yamnika ukuthula.

⁷ Wathi kwabakoJuda: Asiyakheni limizi, siyizingelezele ngemiduli langemiphotshongo, siyifake amasango lemigoqo; ilizwe lisengelethu, ngoba siyidingile iNkosi uNkulunkulu wethu, yasinika ukuthula inxa zonke. Basebesakha, baphumelela.

⁸ UAsa wayelempi yabantu abazinkulungwane ezingamakhulu amathathu abavela koJuda, behlome amahawu lemikhonto, labazinkulungwane ezingamakhulu amabili lamatshumi aficaminwembili abavela koBenjamini ababehloma izihlangu betshoka imitshoko; bonke babengamaqhawe.

⁹ UZera waseEtiyopiya waphuma ukuzakulwa labo elempi yamadoda ayisigidi lezinqola zokulwa ezingamakhulu amathathu, wahamba waze wafika eMaresha.

¹⁰ UAsa waphuma ukumhlangabeza, bahlangana ukulwa esihotsheni saseZefatha eMaresha.

¹¹ UAsa wakhuleka eNkosini uNkulunkulu wakhe wathi: Nkosi, kakho onjengawe ukuvikela ababuthakathaka kwabalamandla; akusisize, Nkosi Nkulunkulu wethu, ngoba thina sithembele kuwe; ngebizo lakho siphumile ukulwa lalimpi engaka; Nkosi, wena unguNkulunkulu wethu; umuntu angephikisane lawe.

¹² Ngakho iNkosi yawachitha amaEtiyopiya phambi kukaAsa laphambi kwabakoJuda, abaleka.

¹³ UAsa labantu ababelaye baxotshana lawo baze bafika eGerari, amaEtiyopiya afa, kakwaze kwasala loyedwa, achitheka phambi kweNkosi uNkulunkulu lempi yayo. AbakoJuda bathatha impango enengi kakhulu.

¹⁴ Bayihlasela yonke imizi yangaseGerari, ngoba iNkosi yabehlisela abantu ukwesaba. AbakoJuda bayiphanga yonke imizi ngoba impango yayinengi kiyo.

¹⁵ Bahlasela lezibaya zezifuyo, bathumba izimvu ezinengi lamakamela. Basebebuyela eJerusalema.