2 ImiLando 13 - iBhayibhili Elingcwele 1978

Ukubusa kukaAbija

¹ Ngomnyaka wetshumi lesificaminwembili wokubusa kwenkosi uJerobowamu uAbija waba yinkosi koJuda.

² Wabusa iminyaka emithathu eJerusalema. Ibizo likanina lalinguMikaya indodakazi kaUriyeli waseGibeya. Kwakukhona ukulwa phakathi kukaAbija loJerobowamu.

³ UAbija waphuma ukuya ekulweni elempi yamaqhawe ayizinkulungwane ezingamakhulu amane, amadoda akhethiweyo. UJerobowamu wahlangabezana laye ekulweni elamaqhawe akhethiweyo azinkulungwane ezingamakhulu aficaminwembili.

⁴ UAbija wema entabeni yaseZemarayimi esezintabeni zakoEfrayimi wathi: Lalela wena Jerobowamu, lani lonke Israyeli!

⁵ Kalikwazi yini ukuba iNkosi uNkulunkulu kaIsrayeli yawunika kokuphela umbuso wakoIsrayeli kuDavida lamadodana akhe ngesivumelwano esingelakuphela?

⁶ Kanti uJerobowamu indodana kaNebati, inceku kaSolomoni indodana kaDavida, wavukela inkosi yakhe;

⁷ labantu abathile ababi bamlandela, bamdelela uRehobowamu indodana kaSolomoni lapho esesengumfana engakabi lakwazi, engakabi lamandla okumelana labo.

⁸ Khathesi licabanga ukumelana lombuso weNkosi uNkulunkulu ophethwe ngamadodana kaDavida ngoba libanengi kakhulu, lilamathole egolide uJerobowamu alenzela wona ukuba abe ngonkulunkulu.

⁹ Kalibaxotshanga yini abapristi beNkosi uNkulunkulu, amadodana kaAroni, kanye lamaLevi, lazenzela abapristi benu njengabantu bamanye amazwe na? Lowo ofika elenkunzi ingabe inqama eziyisikhombisa ukuba ahlukaniselwe iNkosi wenziwa umpristi wokungesuye unkulunkulu.

¹⁰ Kodwa thina, iNkosi inguNkulunkulu wethu, kasiyidelanga; silabo abapristi abayikhonzayo iNkosi abangamadodana kaAroni, besizwa ngamaLevi.

¹¹ Bayanikela eNkosini ekuseni lantambama insuku zonke iminikelo yokutshiswa lempepha elephunga elihle, balungise izinkwa ezahlukaniselwe iNkosi etafuleni legolide elihle, balondoloze uluthi lwesibane lwegolide ukuba izibane zalo zikhanye kusihlwa insuku zonke. Ngokwenza njalo siyawulalela thina umlayo weNkosi uNkulunkulu wethu, kodwa lina liyidelile.

¹² UNkulunkulu ulathi, ungumholi wethu, labapristi bakhe bakhona ukukhalisa impondo ukusibizela ekulweni lani. Madoda akoIsrayeli, musani ukulwa leNkosi, uNkulunkulu wabokhokho benu, ngoba lingeke liphumelele.

¹³ UJerobowamu wayethumele elinye lamabutho akhe ukubhoda ngemuva liyecathama khona, ukuze inengi lamabutho akhe likhangelane labakoJuda, elicathemeyo libe ngemuva.

¹⁴ Lapho abakoJuda bephenduka bafumanisa ukuba bahlaselwa ngaphambili langemuva; bakhala eNkosini uNkulunkulu, labapristi bakhalisa impondo,

¹⁵ labantu bakoJuda bamemeza isiga sempi; kwathi ekumemezeni kwabo uNkulunkulu wamchitha uJerobowamu labo bonke abakoIsrayeli phambi kukaAbija laphambi kwabakoJuda.

¹⁶ AbakoIsrayeli babaleka phambi kwabakoJuda, uNkulunkulu wabanikela ezandleni zabo.

¹⁷ UAbija labantu bakhe babulala abanengi babo, kwafa kwabakoIsrayeli amadoda akhethiweyo azinkulungwane ezingamakhulu amahlanu.

¹⁸ Ngokunjalo abakoIsrayeli behlulwa ngalesosikhathi, abakoJuda baphumelela ngoba bathembela eNkosini, uNkulunkulu wabokhokho babo.

¹⁹ UAbija waxotshana loJerobowamu, wayithumba limizi kuye, iBetheli lemizana yalo, leJeshana lemizana yalo, leEfroni lemizana yalo.

²⁰ UJerobowamu kabange esaba lamandla ensukwini zikaAbija. INkosi uNkulunkulu yamtshaya, wafa.

²¹ Kodwa uAbija waqina waba lamandla, wathatha abafazi abalitshumi lane, wayelamadodana angamatshumi amabili lambili, lamadodakazi alitshumi lesithupha.

²² Ezinye indaba zikaAbija, ukuhamba lokwenza kwakhe, kulotshiwe ezindabeni zomprofethi uIdo.