2 ImiLando 12 - iBhayibhili Elingcwele 1978

UShishaki uhlasela ilizwe lakoJuda

¹ Kwathi uRehobowamu eselamandla, lombuso wakhe usuqinile, wawudela umlayo weNkosi, labo bonke abakoIsrayeli benza njalo.

² Ngomnyaka wesihlanu wokubusa kwakhe, ngoba bonile eNkosini, uShishaki inkosi yaseGibithe wafika ukuhlasela iJerusalema,

³ elezinqola zokulwa ezingamakhulu alitshumi lambili labagadi bamabhiza abazinkulungwane ezingamatshumi ayisithupha. Wafika labantu abanengi abangelakubalwa abaseLibiya lamaSikhi lamaEtiyopiya.

⁴ Wayithumba imizi ebiyelweyo yakoJuda waze wafika eJerusalema.

⁵ UShemaya umprofethi wafika kuRehobowamu lakuzikhulu zakoJuda ezazibuthene eJerusalema ngenxa kaShishaki, wathi kubo: INkosi uNkulunkulu ithi: Lingilahlile lina, lami sengililahlela esandleni sikaShishaki.

⁶ Izikhulu zakoIsrayeli kanye lenkosi bazithoba bathi: INkosi ilungile.

⁷ Lapho iNkosi isibona ukuba bazithobile, ilizwi layo lafika kuShemaya lathi: Bazithobile; kangiyikubabhubhisa, kodwa ngizabakhulula emva kwesikhatshana, lolaka lwami kaluyikwehliselwa eJerusalema ngesandla sikaShishaki.

⁸ Kodwa bazakuba zinceku zakhe ukuze bazi umahluko phakathi kokungikhonza mina lokukhonza amakhosi amanye amazwe.

⁹ Ngakho uShishaki inkosi yaseGibithe yahlasela iJerusalema, yathumba inotho yethempeli lenotho yesigodlo senkosi, yakuthatha konke; yathatha lezihlangu zegolide uSolomoni ayezenzile.

¹⁰ Inkosi uRehobowamu yenza endaweni yazo izihlangu zethusi, yazinikeza ezinduneni zabalindi ababelinda umnyango wesigodlo senkosi.

¹¹ Izikhathi zonke zokuya kwenkosi ethempelini abalindi babeziletha khona, babuye bazibuyisele endlini yabalindi.

¹² Isizithobile, ulaka lweNkosi uNkulunkulu lwadeda kuyo ukuze ingayibhubhisi; futhi izinto zasezilungile koJuda.

¹³ Inkosi uRehobowamu yaqinisa amandla ayo eJerusalema, yaqhubeka ibusa. Yayisileminyaka engamatshumi amane lanye lapho iqalisa ukubusa, yabusa iminyaka elitshumi lesikhombisa eJerusalema, umuzi iNkosi uNkulunkulu eyayiwukhethile phakathi kwazo zonke izizwe zakoIsrayeli ukuba ibizo layo lidunyiselwe khona. Ibizo likanina lalinguNahama umAmoni.

¹⁴ URehobowamu wenza okubi ngokungazimiseli ngenhliziyo yakhe ukuyidinga iNkosi.

¹⁵ Indaba zikaRehobowamu, kusukela ekuqaleni kuze kube sekucineni, zilotshiwe ogwalweni lwezindaba zomprofethi uShemaya lezikaIdo umboni. Kwakuhlala kusiba khona ukulwa phakathi kukaRehobowamu loJerobowamu.

¹⁶ URehobowamu waya kwabaphansi, wangcwatshelwa emzini kaDavida. UAbija indodana yakhe waba yinkosi esikhundleni sakhe.