2 ImiLando 10 - iBhayibhili Elingcwele 1978

AbakoIsrayeli bavukela indlu kaDavida

¹ URehobowamu waya eShekema ngoba bonke abakoIsrayeli babeye khona ukumbeka abe yinkosi.

² Kwathi uJerobowamu indodana kaNebati ekuzwa lokhu, wabuya evela eGibithe, ngoba wayelokhu eseGibithe lapho ayebalekele khona, ebalekela inkosi uSolomoni.

³ AbakoIsrayeli basebethumela ilizwi ukumbiza; yena labo bonke abakoIsrayeli beza bathi kuRehobowamu:

⁴ Uyihlo wasithwalisa umthwalo onzima; wenake ake uphungule ubunzima asethwesa bona, wethule lemithwalo yethu abesithwalise yona; ng’khona sizakukukhonza.

⁵ Yena wathi kibo: Buyani futhi emva kwensuku ezintathu. Basebehambake.

⁶ Inkosi uRehobowamu yasicebisana labadala ababeloyise uSolomoni esaphila, yathi: Lithi angithini kulababantu na?

⁷ Bathi: Uba uzakuba lomusa kulababantu, ubathokozise, ukhulume kibo amazwe amahle, bazakuba zinceku zakho kokuphela.

⁸ Kodwa yena wasidelela iseluleko sabadala, wacebisana lamajaha ayeyintanga yakhe, esizana laye.

⁹ Wathi kuwo: Lithi sibaphendule sithini lababantu abathe kimi: Ake uphungule ubunzima esabethweswa nguyihlo?

¹⁰ Amajaha ayeyintanga yakhe athi: Uzakutsho kulababantu abathi kuwe: Uyihlo wasethwesa ubunzima, kodwa akusiphungulele bona; uthi kibo: Ucikilicane wami uqatha kulokhalo lukababa.

¹¹ Ubaba walethwesa ubunzima, mina ngizakwengezelela kubo. Ubaba walitshaya ngesiswepu, kodwa mina ngizalitshaya ngemichilo elameva.

¹² UJerobowamu labo bonke abantu babuya kuRehobowamu ngosuku lwesithathu njengokutsho kwakhe ukuthi: Libuye kimi futhi ngosuku lwesithathu.

¹³ Inkosi yabaphendula ngolaka abantu, yadela iseluleko sabadala,

¹⁴ yalandela esamajaha yathi: Ubaba walethwesa ubunzima, mina ngizakwengezelela kubo; walitshaya ngesiswepu, kodwa mina ngizalitshaya ngemichilo elameva.

¹⁵ Inkosi kayibalalelanga abantu; ngoba lokhu kwenziwa yiNkosi uNkulunkulu ukuze igcwalise ilizwi layo eyayilikhulume ngoAhija waseShiloni kuJerobowamu indodana kaNebati.

¹⁶ Lapho bonke abakoIsrayeli bebona ukuthi inkosi kayibalaleli, bayiphendula bathi: Silesabelo bani kuDavida na? Kasilalifa thina endodaneni kaJese. Yanini emizini yenu, lina bakoIsrayeli! Sala lendlu yakho, Davida. Basebehambake abakoIsrayeli, baya emizini yabo.

¹⁷ URehobowamu wabusa labo abakoIsrayeli ababehlala emizini yakoJuda.

¹⁸ Inkosi uRehobowamu yasithuma uAdoniramu owayengumphathi wezibhalwa; abakoIsrayeli bamkhanda ngamatshe bambulala. Inkosi uRehobowamu yakhwela masinyane inqola yayo yokulwa, yabalekela eJerusalema.

¹⁹ Kusukela kulesosikhathi abakoIsrayeli bayihlamuka indlu kaDavida kuze kube lamuhla.