2 ImiLando 1 - iBhayibhili Elingcwele 1978

USolomoni ucela ukuba anikwe ingqondo yokuqedisisa

¹ USolomoni indodana kaDavida waqina embusweni wakhe, leNkosi uNkulunkulu wakhe yayilaye, yamenza waba mkhulu kakhulu.

² USolomoni wakhuluma kubo bonke abakoIsrayeli, kubaphathi bezinkulungwane labamakhulu, lakubahluleli, lakuzo zonke izinduna zakoIsrayeli, lenhloko zezindlu.

³ Wahamba lalo lonke ibandla, baya endaweni ephakemeyo yokukhonzela eyayiseGibeyoni; ngoba ithente likaNkulunkulu lokuhlangana elalenziwe nguMose inceku yeNkosi enkangala lalilapho.

⁴ — Kodwa uDavida wathatha umtshokotsho kaNkulunkulu eKiriyathiJeyarimi, wawuletha endaweni ayeyilungisele wona, ngoba wayewumisele ithente eJerusalema —

⁵ Futhi lealtare lethusi elalenziwe nguBezaleli indodana kaUri kaHuri lalikhona lapho phambi kweTabernakeli leNkosi uNkulunkulu; uSolomoni lebandla bayakhuleka khona.

⁶ USolomoni wasondela ealtareni lethusi phambi kweNkosi elalingasethenteni lokuhlangana, wanikela phezu kwalo iminikelo yokutshiswa eyinkulungwane.

⁷ Ngalobobusuku uNkulunkulu wabonakala kuSolomoni, wathi kuye: Cela lokho ofisa ukuba ngikunike khona.

⁸ USolomoni wathi kuNkulunkulu: Wenzele ubaba uDavida umusa omkhulu, wangenza mina ngaba yinkosi esikhundleni sakhe.

⁹ Nkosi Nkulunkulu, akugcwalise isithembiso sakho kuDavida ubaba, ngoba ungenze ngaba yinkosi yabantu abanengi ngokungangothuli lomhlabathi.

¹⁰ Akungiphe ukuhlakanipha lokuqedisisa ukuba ngibahole kuhle lababantu; ngoba ngubani ongabusa lababantu bakho abanengi kangaka na?

¹¹ UNkulunkulu wamphendula uSolomoni wathi: Ngoba lokhu bekusenhliziyweni yakho, ungacelanga impahla lenotho lodumo, lokuphila kwalabo abakuzondayo, futhi ungacelanga ukuphila isikhathi eside, kodwa uzicelele ukuhlakanipha lokwazi ukuze ubuse abantu bami engikwenze waba yinkosi yabo,

¹² ngiyakunika ukuhlakanipha lokwazi; ngizakukunika futhi lenotho lempahla lodumo, angazanga abe lakho amakhosi ayengaphambi kwakho, langayikuba lakho amakhosi akulandelayo.

¹³ Wasebuyake uSolomoni evela eGibeyoni endaweni ephakemeyo yokukhonzela, ethenteni lokuhlangana, waya eJerusalema. Wabusa koIsrayeli.

USolomoni uthengisa amabhiza lezinqola zokulwa

¹⁴ USolomoni wabuthanisa inqola zokulwa lamabhiza; wayelezinqola zokulwa ezingamakhulu alitshumi lane, lamabhiza azinkulungwane ezilitshumi lambili; amanye wawabeka emizini yezinqola, lamanye enkosini eJerusalema.

¹⁵ Inkosi yandisa isiliva legolide eJerusalema, kwaba njengamatshe, lemikusu yaba minengi njengephane laseShefela.

¹⁶ Amabhiza kaSolomoni ayevela eGibithe laseKowa, abathengi benkosi babewathenga eKowa.

¹⁷ Inqola yokulwa yayithengwa eGibithe ngamashekeli esiliva angamakhulu ayisithupha, ibhiza lithengwa ngamashekeli alikhulu lamatshumi amahlanu. Ngokunjalo abathengi benkosi bawathengisela wonke amakhosi amaHethi laweSiriya.