2 AbaseKhorinte 9 - iBhayibhili Elingcwele 1978

Mayelana lokunikela langesibusiso esivela ngokunikela

¹ Mayelana lokunikelela abangcwele kakusweleki ukuba ngililobele;

² ngoba ngiyakwazi ukuzilungisela kwenu engizincoma ngakho ngani kwabaseMakedoniya, ngisithi iAkaya laselizilungisele kusukela nyakenye; lokutshisekela kwenu kubavusile abanengi.

³ Ngithumile abazalwane ukuba ukuzincoma kwami ngani kungenziwa ize maqondana lalokhu, ukuze lihlale selilungile njengokutsho kwami,

⁴ funa uba kufika kanye lami abaseMakedoniya, balifumane lingalungiselanga, siyangeke thina ngokulithemba kwethu, singasatsho lina phela.

⁵ Ngakhoke ngithi kufanele ukuba ngicele abazalwane ukuba bangandulele ukuza kini, balungisele ngaphambili lesosiphiwo senu elasithembisayo, ukuze sihlale silungisiwe, sibe yisiphiwo esiphiwa ngesihle, singabi ngesokubanjwa ngamandla.

⁶ Khumbulani ukuthi ohlanyela ingcosana uzakuvuna ingcosana, lohlanyela kakhulu uzakuvuna kakhulu.

⁷ Ilowo lalowo kanikele njengalokhu azikhethela khona enhliziyweni yakhe, kungabi ngokudonda ingabe ngokubanjwa ngamandla, ngoba uNkulunkulu uyamthanda onikela ngokuthokoza.

⁸ UNkulunkulu ulamandla okulinika kakhulu iziphiwo zonke zomusa, ukuze kuthi ngokwanela kwenu ezintweni zonke lasezikhathini zonke, likhule emisebenzini yonke emihle,

⁹ njengokulotshiweyo kokuthi: Uphene kakhulu, wabanika abayanga; ukulunga kwakhe kuhlala kuze kube nini lanini.

¹⁰ Yena onika inhlanyelo yokuhlanyela lesinkwa sokudliwa uzakulinika inhlanyelo ayandise, ukuze litshaye inala yokulunga kwenu.

¹¹ Lizakunothiswa kukho konke kube khona ukuphana okuzaveza ukubongwa kukaNkulunkulu ngathi.

¹² Ngoba ukwenza linkonzo kakuqedi ukuswela kwabangcwele kuphela, kodwa futhi kwandisa ukubongwa kukaNkulunkulu ngabanengi.

¹³ Ngoba ngokubona linkonzo abanengi bazakudumisa uNkulunkulu lapho bebona ukulalela kwenu ekuvumeni ivangeli likaKristu, lalapho bebona ukuphana kwenu ekusweleni kwabo lekusweleni kwabo bonke.

¹⁴ Bazalilangatha belikhulekela ngenxa yenotho yomusa uNkulunkulu alinike wona.

¹⁵ Kabongwe uNkulunkulu ngenxa yesipho sakhe esingakhulumekiyo.