2 AbaseKhorinte 4 - iBhayibhili Elingcwele 1978

UPawuli utshumayela ivangeli ngesibindi

¹ Ngakhoke, lokhu siyinikiwe linkonzo ngobubele bukaNkulunkulu, kasidinwa.

² Sizilahlile izindlela zonke ezifihliweyo leziletha ihlazo; kasihambi ngobuqili, kasiliphambanisi ilizwi likaNkulunkulu, kodwa ngokukhuluma obala iqiniso senza abantu bonke basibuke ngezazela zabo phambi kukaNkulunkulu.

³ Uba ivangeli lethu limbonjoziwe, limbonjoziwe kuphela kulabo ababhubhayo.

⁴ Unkulunkulu walesisikhathi uphumputhekisile ingqondo yabangakholwayo, ukuze bangakuboni ukukhanya kwevangeli lenkazimulo kaKristu ongumfanekiso kaNkulunkulu.

⁵ Ngoba kasizitshumayeli thina, kodwa sitshumayela ukuthi uKristu Jesu uyiNkosi, lokuthi thina siyizinceku zenu ngenxa yakhe.

⁶ Ngoba uNkulunkulu owathi: Kakuvele ukukhanya emnyameni, kukhanye; wenzile ukuba lokhukukhanya kukhanye phakathi kwethu, kusinike ukukhanya kokwambulwa, ukwambulwa kwenkazimulo kaNkulunkulu kuJesu Kristu.

Amandla avela kuNkulunkulu ayaqinisa ezinhluphekweni

⁷ Kodwa silayo linotho ezitsheni zebumba, ukuze ubukhulu bamandla amakhulu bube ngobukaNkulunkulu, bungabi ngobethu.

⁸ Siyabandezelwa inxa zonke, kodwa kasihlifizeki; siyadideka, kodwa kasilahli ithemba;

⁹ siyazingelwa, kodwa kasihlanyukwa; siwiselwa phansi, kodwa kasibhujiswa;

¹⁰ sithwele njalonjalo emzimbeni wethu ukufa kukaJesu, ukuze ukuphila kukaJesu kubonakaliswe emizimbeni yethu.

¹¹ Ngoba nxa sisaphila sinikelwa njalonjalo ekufeni ngenxa kaJesu, ukuze ukuphila kukaJesu kubonakaliswe emizimbeni yethu efayo.

¹² Ngakho ukufa kuyasebenza kithi, kodwa kini kusebenza ukuphila.

¹³ Umbhalo uthi: Ngakholwa, ngakhoke ngakhuluma. Lathi ngalokhokukholwa siyakholwa, ngakho siyakhuluma,

¹⁴ ngoba siyazi ukuthi lowo owayivusayo iNkosi uJesu uzakusivusa lathi kanye loJesu. Sonke sizakuma phambi kwakhe.

¹⁵ Konke kwenziwa ngenxa yenu, ukuthi njengoba umusa ukhula wande ebantwini, kuzakwanda ukubonga, adunyiswe uNkulunkulu.

Ukulangathela ikhaya lasezulwini

¹⁶ Ngakhoke kasidinwa. Loba umuntu wethu wangaphandle ebhubha, umuntu wethu wangaphakathi wenziwa abe mutsha insuku zonke.

¹⁷ Inhlupheko yethu elula engeyomzuzwana iyasivezela ubukhosi obungapheliyo, obungelakulinganiswa;

¹⁸ ngoba kasikhangeli okubonwayo kodwa sikhangela okungabonwayo. Ngoba okubonwayo kungokwesikhatshana nje, kodwa okungabonwayo kakulakuphela.