2 AbaseKhorinte 3 - iBhayibhili Elingcwele 1978

UPawuli uyaziveza ebandleni

¹ Sesiqala futhi ukuziveza na? Kumbe siyadinga yini njengabanye incwadi zokusiveza eziza kini loba ezivela kini na?

² Lina ngokwenu liyincwadi yethu elotshwe enhliziyweni zethu, eyaziwa ifundwe ngabantu bonke.

³ Lina libonakalisa ukuthi liyincwadi evela kuKristu ivezwa yikusebenza kwethu, engalotshwanga ngeyinki, kodwa elotshwe ngoMoya kaNkulunkulu ophilayo, engalotshwanga ematsheni kodwa elotshwe enhliziyweni zabantu.

⁴ Linjalo ithemba esilalo ngoKristu kuNkulunkulu,

⁵ kungesikho ukuthi silamandla thina ngokwethu okucabanga ukuthi ulutho luvela kithi, kodwa amandla ethu avela kuNkulunkulu;

⁶ ngoba nguye futhi osinike amandla okuba yizikhonzi zesivumelwano esitsha, okungesiso sokulotshiweyo kodwa esikaMoya; ngoba okulotshiweyo kuyabulala, kodwa uMoya uyaphilisa.

Inkazimulo yevangeli iyayidlula eyomlayo omdala

⁷ Uba umlayo owawulotshwe ematsheni waletha ukufa, kodwa wafika ulenkazimulo engaka, kwaze kwathi abakoIsrayeli bahluleka ukukhangela ubuso bukaMose ngenxa yokukhazimula kobuso bakhe, lanxa kwakuzakuphela.

⁸ Phoke, umlayo kaMoya kawuyikuba lenkazimulo enkulu kulayo na?

⁹ Ngoba uba umlayo wokulahlwa ubulenkazimulo, umlayo wokulunga umele ukudlula ngenkazimulo enkulu.

¹⁰ Yebo, lokho okwake kwaba yinkazimulo, kakuseyiyo ngenxa yalinkazimulo eyidlulayo.

¹¹ Uba lokho ebekuzakudlula kwafika kulenkazimulo, lokho okumiyo njalo kumele ukuba kube lenkazimulo enkulu kakhulu.

¹² Ngakhoke, lokhu silethemba elinje, sikhuluma ngesibindi;

¹³ kasinjengoMose owambomboza ubuso bakhe, ukuze abakoIsrayeli bangayijolozeli inkazimulo ephelayo.

¹⁴ Kodwa ingqondo yabo yaba lukhuni. Ngoba kuze kube lamuhla, nxa kufundwa isivumelwano esidala, lesosimbombozo sisahlezi singambulwanga, ngoba sisuswa kuKristu kuphela.

¹⁵ Yebo, kuze kube lamuhla, nxa kufundwa umlayo kaMose, isimbombozo sambese ingqondo yabo.

¹⁶ Kodwa nxa umuntu ephendukela eNkosini, isimbombozo siyasuswa.

¹⁷ LeyoNkosi inguMoya; lalapho akhona uMoya weNkosi, kukhona inkululeko.

¹⁸ Thina sonke esilobuso obambuliweyo, sibona inkazimulo yeNkosi ngokungathi kusesibukweni. Siyaphendulwa sifane layo; siyakhula enkazimulweni, ngoba le ivela eNkosini enguye uMoya.