2 AbaseKhorinte 2 - iBhayibhili Elingcwele 1978

¹ Ngazimisela lokhu ukuthi kangiyikuphinda ngize kini futhi, ukuba ngilibangele usizi.

² Uba mina ngilibangela usizi, ngubani ozangithokozisa, uba kungesuye engimbangele usizi, na?

³ Ngaloba ngokunjalo, ukuze kuthi ekufikeni kwami ngingabangelwa usizi yilabo ebengifanele ukuthokoziswa yibo, ngoba ngaba lethemba ngani lonke ukuthi ukuthokoza kwami kuzakuba yikuthokoza kwenu lonke.

⁴ Ngoba ngosizi olukhulu langokudabuka kwenhliziyo langezinyembezi ezinengi ngalilobela, kungesikho ukuba ngilibangele usizi, kodwa ukuba lazi uthando engilithanda ngalo kakhulu.

Ngokubuyiselwa kwezoni eziphendukayo

⁵ Uba kukhona obange usizi, kalubanganga kimi, kodwa, ukuze ngingeqisi, ngithi ngenye indlela ulubange kini lonke.

⁶ Kumanele onjalo lokhukukhuza kwabanengi benu;

⁷ kungcono khathesi ukuba limthethelele, limduduze, funa onjalo ahlulwe lusizi olukhulu.

⁸ Ngakhoke ngiyalincenga ukuba limphathe ngothando.

⁹ Ngenxa yalokhu ngaloba ukuze ngilihlole, ngazi ukuba lingabalalelayo ezintweni zonke.

¹⁰ Lowo elimthethelelayo, lami ngiyamthethelela; ngoba lokho esengikuthethelele, uba kukhona into engiyithethelelayo, ngikuthethelela ngenxa yenu phambi kukaKristu,

¹¹ ukuze singehlulwa nguSathane; ngoba siyabazi ubuqili bakhe.

UPawuli ubonga uNkulunkulu ngokunqoba kwevangeli

¹² Ekufikeni kwami eTrowasi ukuba ngitshumayele ivangeli likaKristu, iNkosi yangenzela ithuba;

¹³ kodwa kangibanga lokuthula emoyeni wami, ngoba ngingamfumananga khona umzalwane uTitosi. Ngakho ngasengivalelisa, ngadlulela eMakedoniya.

¹⁴ Kabongwe uNkulunkulu osiholayo njalo odwendweni lokunqoba ngoKristu, ebonakalisa ngathi iphunga elihle lokwazi kwakhe endaweni zonke.

¹⁵ Ngoba siliphunga elimnandi likaKristu kuNkulunkulu phakathi kwalabo abasiliswayo laphakathi kwalabo ababhubhayo.

¹⁶ Kulaba abesibili silivumba elibulalayo, kodwa kulabo abokuqala siliphunga elisilisayo. Ngubani olingene lezizinto na?

¹⁷ Thina kasinjengabanengi abathengisa ilizwi likaNkulunkulu; kodwa njengabaqotho, njengabamiswe nguNkulunkulu sikhuluma phambi kukaNkulunkulu sikuKristu.