1 uTimothi 6 - iBhayibhili Elingcwele 1978

Mayelana lezigqili

¹ Bonke abangaphansi kwejokwe lobugqili kabathi amakhosi abo afanele ukuhlonitshwa impela, ukuze ibizo likaNkulunkulu lesifundiso kungadunyazwa.

² Abalamakhosi akholwayo bangawadeleli ngoba engabazalwane; kodwa kakube ng’khona bewasebenzela kakhulu, ngoba engabakholwayo lathandekayo lawo asizakala ngomsebenzi wabo. Fundisa ngalezizinto, utshumayele ngazo.

Isifundiso samanga sibanga okubi

³ Uba kukhona ofundisa okwahlukileyo, engavumelani lamazwi aqotho eNkosi yethu uJesu Kristu lesifundiso esifanele ukukhonza uNkulunkulu,

⁴ uyazikhukhumeza lowo, kazi lutho. Uphethwe yinkani lokuphikisana ngamazwi, okubanga umona, lombango, lokuthuka, lemicabango emibi,

⁵ lokuxabana kwabantu abangqondo zabo zonakele, abalahlekelwe liqiniso, besithi ukukhonza uNkulunkulu kuyindlela yenzuzo.

⁶ Yebo, ukukhonza uNkulunkulu kuyinzuzo enkulu uba kukhona ukwaneliswa;

⁷ ngoba kasizanga lalutho emhlabeni, futhi kasiyikusuka lalutho;

⁸ kodwa uba silokudla lezambatho kasaneliswe yikho.

⁹ Abafuna ukunotha bangena ekulingweni, lasemijibileni, lasezinkanukweni ezinengi zobuphukuphuku ezilimazayo, eziwisela abantu ekufeni lasekubhujisweni.

¹⁰ Ukuthanda imali kuyimpande yakho konke okubi; abanye ngokuyifisa baduhile ekukholweni, bazibangela insizi ezinengi.

Ezinye izeluleko zikaPawuli

¹¹ Kodwa wena muntu kaNkulunkulu balekela lokhu; nxwanela ukulunga, lokuhle, lokukholwa, lothando, lokubekezela, lobumnene.

¹² Lwana ukulwa okuhle kokukholwa; ubambelele ekuphileni okungapheliyo owabizelwa kukho, wavuma ukuvuma okuhle phambi kwabofakazi abanengi.

¹³ Ngiyakulaya phambi kukaNkulunkulu ophilisa konke, loKristu Jesu owavuma ukuvuma okuhle phambi kukaPontiyusi Pilatu,

¹⁴ ukuba ugcine umthetho ungelasici, ungasoleki kuze kube sekubonakaleni kweNkosi yethu uJesu Kristu,

¹⁵ azakukubonakalisa ngesikhathi esifaneleyo, uSomandla oyedwa lobongekayo, iNkosi yamakhosi, loMbusi wababusi,

¹⁶ yena yedwa olokungafi, ohlala ekukhanyeni okungelakusondelelwa, ongazange abonwe muntu, ongebonwe. Kakube kuye udumo lamandla angapheliyo. Ameni.

¹⁷ Laya abanothileyo lapha emhlabeni ukuba bangazikhukhumezi, bangathembeli enothweni engemiyo, kodwa bathembele kuNkulunkulu osinothisa ngakho konke, sithokoze ngakho.

¹⁸ Kabenze okuhle banothe ngemisebenzi emihle, baphane babelane,

¹⁹ bazibekele isisekelo esihle esikhathini esizayo, ukuze babambe ukuphila koqobo.

Isicino

²⁰ Wena Timothi, londoloza kuhle okubekwe kuwe. Xwaya ukukhuluma okuyize lokuphikisana kwalokho okuthiwa yikwazi kungesikho,

²¹ okuthe abanye ngokukuvuma baduha ekukholweni. Umusa kawube lani lonke.