1 uTimothi 5 - iBhayibhili Elingcwele 1978

¹ Ungayikhalimeli indoda endala kodwa yeluleke njengoyihlo, lamadoda amatsha njengabafowenu,

² labesifazana abadala njengonyoko, labesifazana abatsha njengodadewenu ngokuhlambuluka konke.

UTimothi welulekwa ngokuphatha abafelwakazi ebandleni

³ Hlonipha abafelwakazi abangabafelwakazi isibili.

⁴ Uba umfelwakazi elabantwana loba abantwana bomntanakhe, kabafunde kuqala ukuhlonipha indlu yakwabo, benzele abazali babo okufaneleyo; ngoba lokhu kuyabongeka phambi kukaNkulunkulu.

⁵ Lowo ongumfelwakazi isibili osele yedwa uthembele kuNkulunkulu, uhlala ekunxuseni lasekukhulekeni ebusuku lemini;

⁶ kanti lowo ozinikela ekuzithokoziseni ufile lanxa esekhona.

⁷ Laya ngalezizinto ukuze bangasoleki.

⁸ Uba umuntu engabondli abakibo, ikakhulu abendlu yakhe, ukulahlile ukukholwa, mubi kulongakholwayo.

⁹ Kangabalwa umfelwakazi uba engaphansi kweminyaka engamatshumi ayisithupha. Kodwa kabe ngumuntu owayende kanye

¹⁰ onconywa ngemisebenzi emihle, owondle abantwana bakhe, ongenise izihambi, ogezise inyawo zabangcwele, osize abahluphekayo, okhuthalele umsebenzi wonke omuhle.

¹¹ Kodwa abafelwakazi abatsha ubale; ngoba lapho inkanuko zabo sezibahlukanise loKristu bafuna ukwenda;

¹² balecala lokulahlwa ngoba bachithile ukukholwa kwabo kokuqala.

¹³ Futhi bafunda ukuvilapha, bezula lezindlu, bengavilaphi kuphela kodwa babuye bahlebe bengena kokungesikho okwabo, bekhuluma okungafanelanga.

¹⁴ Ngakhoke ngithanda ukuba abafelwakazi abatsha bende, bazale abantwana, baphathe kuhle imizi yabo, bangasiniki isitha ithuba lokuthuka.

¹⁵ Ngoba lakhathesi abanye sebelahlekele kuSathane.

¹⁶ Uba umuntu okholwayo elezihlobo ezingabafelwakazi kazisize, ukuze ibandla lingasindwa, ukuba lisize abangabafelwakazi isibili.

Mayelana labadala bebandla

¹⁷ Abadala bebandla abaphatha kuhle kakuthiwe bafanele ukuhlonitshwa ngokuphindiweyo, ikakhulu labo abakhuthalela ukutshumayela lokufundisa.

¹⁸ Ngoba umbhalo uthi: Ungayifaki isayeke inkabi nxa ibhula amabele. Futhi uthi: Isisebenzi sifanele umvuzo waso.

¹⁹ Ungalamukeli icala lomdala, kuphela ngobufakazi bababili loba babathathu.

²⁰ Abonayo ubasole phambi kwabo bonke ukuze besabe labanye.

²¹ Ngiyakulaya phambi kukaNkulunkulu loKristu Jesu lezithunywa ezikhethiweyo ukuba uzigcine lezizinto ngokungaqumi ngaphambili; ungabandlululi muntu.

²² Ungaphangisi ukubeka umuntu izandla, futhi ungahlanganyeli ezonweni zabanye; uzigcine wena ube mhlophe.

²³ Ungabe usanatha amanzi wodwa, kodwa natha lewayini elincinyane ngenxa yesisu sakho lokungaphili kuhle kwakho.

²⁴ Izono zabanye abantu zisobala, zandulela ekulahlweni, kanti ezabanye ziyabalandela.

²⁵ Ngokunjalo imisebenzi emihle isobala; loba ingenjalo, ingeke ihlale ifihlakele.