1 uTimothi 4 - iBhayibhili Elingcwele 1978

UPawuli uxwayisa uTimothi ngabafundisi bamanga

¹ UMoya utsho ngokusobala ukuba ngezikhathi zokucina abanye bazakumonyuka ekukholweni, balalele omoya abaduhisayo lezifundiso zabomoya ababi,

² ngokuzenzisa kwabaqamba amanga abatshiswe uphawu kuzazela zabo,

³ besalela abantu ukuba bathathane, besithi kuzilwe ukudla uNkulunkulu akudalileyo ukuba kwamukelwe ngokubonga yibo abakholwayo labazi iqiniso.

⁴ Ngoba konke okwadalwa nguNkulunkulu kuhle, kakulahlwa lutho uba lwamukelwa ngokubonga;

⁵ ngoba kwenziwa kube ngcwele ngelizwi likaNkulunkulu langomkhuleko.

⁶ Uba ubeluleka ngalezizinto abazalwane, uzakuba yisikhonzi esihle sikaKristu Jesu, wondliwe ngamazwi okukholwa lesifundiso esihle osilandelayo.

⁷ Kodwa uzale inganekwane ezimbi ezezalukazi. Uzejwayeze umsebenzi wokukhonza uNkulunkulu.

⁸ Ukwejwayeza umzimba kulokusiza okuthile, kodwa ukukhonza uNkulunkulu kusiza ezintweni zonke, ngoba kulesithembiso sokuphila kwalamuhla lokuphila okuzayo.

⁹ Liqinisile lelilizwi, lifanele ukwamukelwa impela.

¹⁰ Sisebenzela lokho, siyatshikatshika, ngoba sithembele kuNkulunkulu ophilayo onguMsilisi wabo bonke abantu, ikakhulu bona abakholwayo.

UTimothi welulekwa ngokuhamba langokufundisa

¹¹ Luleka ngalezizinto, uzifundise.

¹² Kungabi lamuntu odelela ubutsha bakho, kodwa woba yisibonelo kwabakholwayo ngokukhuluma, langokuhamba, langothando, langokukholwa, langokuhlambuluka.

¹³ Nanzelela ukufunda lokutshumayela lokufundisa ngize ngifike.

¹⁴ Ungadeleli isiphiwo esikuwe, owaphiwa sona ngelizwi labaprofethi langokubekwa izandla ngabadala.

¹⁵ Nanzelela lezizinto, uzikhuthalele, ukuze bonke babone ukuqhubeka kwakho.

¹⁶ Zinanzelele wena kanye lokufundisa kwakho; ukhuthale kulezizinto; ngoba ngokwenza njalo uzakuzisilisa wena kanye lalabo abakuzwayo.