1 uTimothi 3 - iBhayibhili Elingcwele 1978

Mayelana labaphathi bebandla

¹ Liqinisile lelilizwi elithi: Uba umuntu efisa isikhundla somalusi webandla, ufisa umsebenzi omuhle.

² Umalusi webandla umele ukuba abe ngumuntu ongasolekiyo, indoda elomfazi munye, ozithintayo, oqondileyo, oziphatha ngokufaneleyo, ophatha kuhle izihambi, olelisu lokufundisa,

³ angabi yisidakwa, angabi ngothanda ukulwa kodwa abe mnene, angabi ngothanda ukuxabana, angabi ngothanda imali.

⁴ Kabe ngophatha kuhle umuzi wakhe, abantwana bakhe bemlalela ngenhlonipho yonke.

⁵ Uba umuntu engakwazi ukuphatha owakhe umuzi, angaliphatha kanjani ibandla likaNkulunkulu na?

⁶ Kangabi ngosand’ukukholwa, funa ngokukhukhunyezwa awele ekulahlweni kukaSathane.

⁷ Kumele futhi ukuba abe ngohloniphekayo kwabangaphandle, funa awele ekuthukweni lasemjibileni kaSathane.

⁸ Ngokunjalo lezikhonzi kufanele zibe ngabantu abahloniphekayo, labangelalimi, labangathandi ukunatha kakhulu, labangafisi inzuzo embi,

⁹ zibambisise imfihlakalo yokukholwa zilezazela ezimhlophe.

¹⁰ Labo kabaqale bahlolwe, andubana babekwe izikhonzi uba bengasoleki.

¹¹ Ngokunjalo labomkabo bafanele ukuba babe ngabahloniphekayo abanganyeyiyo, abazithintayo, abathembekileyo ezintweni zonke.

¹² Izikhonzi kazibe ngamadoda amfazi munye, aphatha kuhle abantwana bawo lemizi yawo.

¹³ Ngoba izikhonzi ezisebenza kuhle zizuza ukuhlonipheka lesibindi ekukholweni okukuKristu Jesu.

¹⁴ Ngithemba ukuba ngizakuza kuwe masinyane; kodwa ngikulobela lokhu ukuze kuthi

¹⁵ uba ngibambeka, wazi ukuthi abantu bafanele ukuziphatha kanjani endlini kaNkulunkulu, elibandla likaNkulunkulu ophilayo, insika lesisekelo seqiniso.

¹⁶ Kuyavunywa ukuthi yinkulu impela imfihlakalo yokukholwa kwethu, yokuthi: Yena owabonakaliswa emzimbeni, walungisiswa emoyeni, wabonwa yizithunywa watshunyayelwa ezizweni, wakholwa ngumhlaba wonke, waphakanyiselwa ezulwini.