1 uTimothi 2 - iBhayibhili Elingcwele 1978

Imithetho yenkonzo yebandla

¹ Ngakhoke kuqala kukho konke ngilaya ukuba ukunxusa lokukhuleka lokucela lokubonga kwenzelwe abantu bonke,

² amakhosi lazo zonke izikhulu, ukuze sihlale kuhle langokuthula, sikhonze uNkulunkulu sibe lokuhlonipha konke.

³ Lokhu kuhle, kuyabongeka phambi kukaNkulunkulu uMsilisi wethu

⁴ othanda ukuba bonke abantu basiliswe, bafinyelele ekwazini iqiniso.

⁵ Ngoba munye uNkulunkulu; munye umlamuli phakathi kukaNkulunkulu labantu, umuntu uKristu Jesu,

⁶ owazinikela yena abe yinhlawulo yabo bonke; lokhu kwafakazelwa ngesikhathi esifaneleyo.

⁷ Ngamiselwa khona mina ukuba ngibe ngumtshumayeli lomphostoli; ngikhuluma iqiniso, kangiqambi manga; yebo, ngibe ngumfundisi wabezizwe ekukholweni laseqinisweni.

⁸ Ngakho ngithanda ukuba amadoda akhuleke endaweni zonke, ephakamisa izandla ezingcwele, engalalaka lokuxabana.

⁹ Ngokunjalo labesifazana bagqoke izigqoko ezifaneleyo, bacece ngokuhlonipha langokuqonda, kungabi ngenwele ezelukiweyo, langegolide, langamangqongqo aligugu, langezambatho ezibiza imali enengi;

¹⁰ kodwa kabacece ngemisebenzi emihle, okufanele abesifazana abathi bakhonza uNkulunkulu.

¹¹ Owesifazana kafunde ngokuthula langokuzithoba konke.

¹² Kangivumeli owesifazana ukuba afundise lokuba abe lamandla phezu kwabesilisa; kodwa kathule.

¹³ Ngoba uAdamu wabunjwa kuqala, emva kwalokho kwabunjwa uEva.

¹⁴ Futhi uAdamu kakhohliswanga, kanti owesifazana wakhohliswa, waphambuka.

¹⁵ Kodwa owesifazana uzakusiliswa ngokuzala abantwana, uba ehlala ekukholweni lasothandweni lasebungcweleni langokuqonda.