1 uTimothi 1 - iBhayibhili Elingcwele 1978

Isibingelelo

¹ Mina Pawuli, umphostoli kaKristu Jesu ngomlayo kaNkulunkulu uMsilisi wethu loKristu Jesu ithemba lethu,

² ngithi kuTimothi umntanami weqiniso ekukholweni: Kakube kuwe umusa lesihawu lokuthula okuvela kuNkulunkulu uBaba lakuKristu Jesu iNkosi yethu.

UPawuli uxwayisa uTimothi ngokufundisa okungamanga

³ Kwathi mhla ngisiya eMakedoniya ngakutshela ukuba uhlale eEfesu, ukuze ulaye abathile ukuba bangafundisi okwahlukileyo,

⁴ futhi bangachithi isikhathi belalela izinganekwane lezindaba zosendo olokuzalana ezingapheliyo, ezibanga ukuphikisana endaweni yokuba ziqhube icebo likaNkulunkulu elisekukholweni.

⁵ Okuyikhona esikuqondileyo ngokulaya kwethu luthando oluvela enhliziyweni emhlophe, lakuso isazela esihle, lasekukholweni okuqotho.

⁶ Abathile baduhile kukho lokhu, baphambukela ekukhulumeni okuyize,

⁷ befuna ukuba babe ngabafundisi bomlayo, bengaqedisisi lalokho abakutshoyo labaqinisa ngakho.

⁸ Siyazi kambe ukuthi umlayo ulungile, uba umuntu ewusebenzisa ngokomlayo,

⁹ esazi lokhu ukuthi umlayo kawubekelwa olungileyo, kodwa ubekelwa abangelamlayo labangalaleliyo, labeyisa uNkulunkulu labayizoni, abangakholwayo labahlambazayo, ababulala oyise labonina, lababulala abantu,

¹⁰ lezifebe, labesilisa abalalanayo, labathumba abanye, labaqamba amanga, labafungela amanga; impela lokunye nje okuphambene lemfundiso eqotho,

¹¹ ngokwevangeli elilenkazimulo kaNkulunkulu obongekayo, engaphathiswa lona.

UPawuli ubonga uNkulunkulu owamhawukelayo

¹² Ngiyambonga owanginika amandla uKristu Jesu iNkosi yethu; ngoba wangibona ngithembekile, wangimisa enkonzweni yakhe,

¹³ loba ngangikade ngingomhlambazayo, lomzingelayo, lomthukayo. Kodwa ngahawukelwa ngoba ngangikwenza ngokungazi, ngokungakholwa;

¹⁴ lomusa weNkosi wanda kakhulu kimi kanye lokukholwa lothando olukuKristu Jesu.

¹⁵ Liqinisile lelilizwi, lifanele ukwamukelwa impela elokuthi uKristu Jesu weza emhlabeni ukusilisa izoni, engingesikhulu kuzo mina.

¹⁶ Kodwa ngahawukelelwa lokhu ukuthi kimi, engingesikhulu isoni, uJesu Kristu abonakalise ukubekezela kwakhe, ngibe yisibonelo kwabazakukholwa kuye baze bazuze ukuphila okungapheliyo.

¹⁷ Kuyo iNkosi eyisimakade engabhubhiyo engelakubonwa, uNkulunkulu yedwa, kakube udumo lobukhosi kuze kube nininini. Ameni.

¹⁸ Lumlayo ngiwunika wena mntanami Timothi, njengamazwi abaprofethi abangitshengisa ngawe ngaphambili ukuze ngokukhuthazwa yiwo ulwe ukulwa okuhle,

¹⁹ ulokukholwa lesazela esihle. Abanye ngokudelela isazela balahlekelwa yikukholwa kwabo,

²⁰ okukhona phakathi kwabo uHimeneyo loAleksandro engibanikele kuSathane, ukuze bafunde ukuba bangahlambazi.