1 USamuyeli 2 - iBhayibhili Elingcwele 1978

Indumiso kaHana

¹ UHana wasekhuleka esithi: Inhliziyo yami iyathokoza ngeNkosi, Ngilamandla lesibindi eNkosini. Umlomo wami uyaziklolodela izitha zami, ngoba ngiyajabula ngokukhulula kwakho.

² Kakho ongcwele njengeNkosi, kakho loyedwa ngaphandle kwakho; futhi kalikho ledwala elinjengoNkulunkulu wethu.

³ Lingabe lisakhuluma ngokuzigqaja kangaka, kungaphumi ukuziqakisa emilonyeni yenu; ngoba iNkosi inguNkulunkulu wokwazi, lezenzo ziyalinganiswa yiyo.

⁴ Imitshoko yamaqhawe yaphukile, kodwa ababuthakathaka bazuza amandla.

⁵ Ababesutha baqatshwa ngesinkwa, lababelambile kabasalambi. Yebo, loyinyumba uzele abayisikhombisa, kodwa olabantwana abanengi utshiyiwe.

⁶ INkosi yiyo ebulalayo lephilisayo, leyehlisela abantu endaweni yabafileyo ibuye ibabuyise futhi.

⁷ INkosi yenza umuntu abe ngumyanga, ibuye imenze anothe; iyamehlisela phansi, ibuye imphakamise.

⁸ Iyamvusa umyanga othulini, imphakamisa oswelayo esilotheni, ukuba ibahlalise lezikhulu, bahlale ezihlalweni zodumo. Ngoba insika zomhlaba zingezeNkosi. ibekile ilizwe phezu kwazo.

⁹ Iyavikela ukuhamba kwabathembekileyo bayo, kodwa ababi bayatshona emnyameni bathuliswe; ngoba umuntu kayikwahlula ngamandla.

¹⁰ Izitha zeNkosi zizabhujiswa; oPhezukonke uzaduma esezulwini, ahlulele emhlabeni wonke, anike amandla inkosi yakhe, aphakamise amandla ogcotshiweyo wakhe.

¹¹ UElkana wabuyela ekhaya eRama. Umfana wakhonza iNkosi phambi kukaEli umpristi.

Ububi bamadodana kaEli

¹² Amadodana kaEli ayengabantu ababi; ayengayazi iNkosi.

¹³ Umkhubo wabapristi mayelana labantu wawunje; kwakuye kuthi nxa umuntu enikela umhlatshelo, kufike inceku yompristi inyama isaphekiwe, iphethe ifolokwe elencijo ezintathu,

¹⁴ ihlabe ngayo odengezini, loba embizeni, loba ebhodweni; konke ifolokwe ephuma lakho umpristi wayekuthatha. Kwakufanele benze njalo eShilo kubo bonke abakoIsrayeli ababefika ukunikela khona.

¹⁵ Kodwa kumadodana kaLevi engakatshiswa amahwahwa, inceku yompristi yayifika ithi emuntwini ohlabayo: Letha inyama yokosiwa ngumpristi, ngoba kayikuthatha kuwe inyama ephekiweyo, kodwa eluhlaza kuphela.

¹⁶ Uba lowomuntu esithi kuyo: Kahle, kekutshiswe amahwahwa kuqala, ubusuthathake njengokuthanda kwakho; ibisisithi: Atshi bo, nginika khathesi; uba ungenzi njalo, ngizayithatha ngamandla.

¹⁷ Ngalokhoke lesisono samadodana kaLevi saba sikhulu kakhulu emehlweni eNkosi; ngoba awenza umnikelo weNkosi udeleleke.

¹⁸ USamuweli wayekhonza iNkosi engumfana egqoka ingubo yamahlombe yelembu elihle.

¹⁹ Futhi unina wayejwayele ukumenzela ijazana, amphathele lona iminyaka yonke lapho besiyanikela umhlatshelo wonyaka lomkakhe.

²⁰ UEli wayebabusisa uElkana lomkakhe, athi: INkosi ikunike abantwana ngalowesifazana endaweni yalo omeboleke iNkosi. Basebebuyelake ekhaya.

²¹ INkosi yaba lomusa kuHana; wathatha isisu, wazala amadodana amathathu lamadodakazi amabili. Umfana uSamuweli wakhula phambi kweNkosi.

²² UEli wayeseluphele kakhulu; wayekuzwa konke amadodana akhe ayekwenza kuye wonke uIsrayeli, lokuthi ayelala labesifazana ababesebenza ngasemnyango wethente lokuhlangana.

²³ Wathi kuwo: Lenzelani izinto ezinje na? Ngoba ngiyezwa ngabo bonke abantu ngezenzo zenu ezimbi.

²⁴ Atshi, madodana ami; kakusindaba enhle engiyizwa ikhulunywa ngabantu beNkosi.

²⁵ Uba umuntu esona omunye umuntu, uNkulunkulu uzakwahlulela phakathi kwabo; kodwa uba umuntu esona eNkosini, uzalanyulelwa ngubani na? Kodwa kawalalelanga ilizwi likayise; ngoba iNkosi yayifuna ukuwabulala.

²⁶ Umfana uSamuweli waqhubeka ekhula, ethandeka eNkosini lebantwini.

Ilizwi leNkosi lokwahlulelwa kwendlu kaEli

²⁷ Kwafika umuntu kaNkulunkulu kuEli, wathi kuye: INkosi ithe: Ngazibonakalisa kuyo indlu kayihlo beseGibithe beyizigqili endlini kaFaro.

²⁸ Ngamkhetha yena kuzo zonke izizwe zakoIsrayeli ukuba abe ngumpristi wami, aye ealtareni lami, atshise impepha, agqoke ingubo yamahlombe phambi kwami; ngayinika indlu kayihlo yonke iminikelo yokutshiswa yabantu bakoIsrayeli.

²⁹ Kungani pho useyisa imihlatshelo yami leminikelo yami engayimisayo na? Kungani uhlonipha amadodana akho ukudlula mina ngokuwavumela azitike ngokuhle kweminikelo yabantu bami uIsrayeli?

³⁰ Ngakhoke iNkosi uNkulunkulu kaIsrayeli uthi: Ngathembisa ukuthi indlu yakho lendlu kayihlo zizakhonza phambi kwami kuze kube nininini; kodwa khathesi iNkosi ithi: Kakuyikuba njalo; ngoba labo abangihloniphayo, ngizabahlonipha, labangidelelayo ngizabadelela.

³¹ Khangela, insuku ziyeza engizaqeda ngazo zonke insizwa endlini yakho lendlini yakwenu kungabi khona ixhegu kini.

³² Kuzakuthi ekuhluphekeni kwakho uhawukele konke ukuphumelela okuzakuba khona koIsrayeli; kakuyikuba lexhegu endlini yakho kuze kube nininini.

³³ Lowo engizamyekela ukuba akhonze ealtareni lami, amehlo akhe azafiphala, inhliziyo yakhe idabuke; layo yonke inzalo yendlu yakho izabulawa ngomhedla.

³⁴ Lokhu okuzakwehlela amadodana akho womabili, uHofini loFiniyasi, kuzakuba yisiboniso kuwe; bobabili bazakufa ngasuku lunye.

³⁵ Ngizakuzimisela umpristi othembekileyo ozakwenza okusenhliziyweni yami lokusengqondweni yami. Ngizakummisela indlu eqinileyo, akhonze phambi kogcotshiweyo wami kuze kube nininini.

³⁶ Kuzakuthi bonke abaseleyo endlini yakho beze bakhothame kuye ukucela uhlamvu lwesiliva lesinkwa, bathi: Ake ungibeke kwesinye sezikhundla zompristi ukuze ngizuze ucezu lwesinkwa.