1 USamuyeli 16 - iBhayibhili Elingcwele 1978

Ukungcotshwa kukaDavida abe yinkosi

¹ INkosi yathi kuSamuweli: Koze kube nini umkhalela uSawuli lokhu mina ngimlahlile ukuba angabe esaba yinkosi koIsrayeli na? Gcwalisa uphondo lwakho ngamafutha, uhambe; ngizakukuthuma kuJese waseBetlehema, ngoba ngizibonele inkosi emadodaneni akhe.

² USamuweli wathi: Ngizahamba njani na? Uba uSawuli ekuzwa lokho, uzangibulala. INkosi yasisithi: Hamba lethokazi uthi: Ngizehlabela iNkosi.

³ Umeme uJese ukuba eze emhlatshelweni, ngizakukutshengisa lokho ozakwenza; uzangigcobela lowo engizakukutshengisa yena.

⁴ USamuweli wasesenza lokho iNkosi emtshele khona, waya eBetlehema. Abadala bomuzi bamhlangabeza bethuthumela bathi: Uze ngokuthula na?

⁵ Yena wathi: Yebo, ngize ngokuthula; ngize ukuhlabela iNkosi; zihlambululeni, lihambe lami ekuhlabeni. Wasehlambulula uJese lamadodana akhe, labo wabamema ukuba beze ekuhlabeni.

⁶ Kwathi sebefikile, wakhangela uEliyabi wathi: Impela nguye lo ogcotshiweyo weNkosi.

⁷ Kodwa iNkosi yathi kuSamuweli: Ungakhangeli isimo sakhe lobude bakhe, ngoba ngimalile. INkosi kayibonisi okomuntu; umuntu ubona okusemehlweni, kodwa iNkosi ibona okusenhliziyweni.

⁸ UJese wasebiza uAbinadaba, wamedlulisa phambi kukaSamuweli, kodwa yena wathi: Layena lo iNkosi kayimkhethanga.

⁹ UJese wasedlulisa uShama. Wathi futhi: Layena lo iNkosi kayimkhethanga.

¹⁰ UJese wasedlulisa phambi kukaSamuweli amanye amadodana akhe ayisikhombisa. USamuweli wathi kuJese: Lalaba iNkosi kayibakhethanga.

¹¹ USamuweli wasesithi kuJese: Asephelele wonke amadodana akho na? Yena wathi: Kusasele encinyane eyelusa izimvu. USamuweli wathi kuJese: Thumela ilizwi ukuba ibizwe, ngoba kasiyikuhlala phansi aze afike.

¹² Wasethumela ilizwi ukuba ilandwe. Yayibukeka, inhle ilobuso obubomvana lamehlo amahle. INkosi yathi: Sukuma, umgcobe, ngoba nguye lo.

¹³ USamuweli wasethatha uphondo lwamafutha, wamgcoba phakathi kwabafowabo; umoya weNkosi wehlela phezu kukaDavida kusukela kulolosuku kusiya phambili. USamuweli wasuka wabuyela eRama.

UDavida utshayela uSawuli ichacho

¹⁴ Umoya weNkosi wasuka kuSawuli, lomoya omubi ovela eNkosini wamkhathaza.

¹⁵ Inceku zikaSawuli zathi kuye: Khangela, umoya omubi ovela kuNkulunkulu uyakukhathaza.

¹⁶ Kayitsho inkosi yethu ukuba inceku zayo ezikhona lapha zidinge umuntu okwaziyo ukutshaya ichacho, ukuba lapho ufikelwa ngumoya omubi ovela kuNkulunkulu, alitshaye ukuze usile.

¹⁷ Ngakho uSawuli wasesithi encekwini zakhe: Ngidingelani umuntu okwaziyo ukutshaya kuhle, limlethe kimi.

¹⁸ Omunye wamajaha waphendula wathi: Ngibona indodana kaJese waseBetlehema, kuyiyo ekwaziyo ukutshaya; futhi iliqhawe elilamandla lehlakaniphileyo ekukhulumeni, lebukekayo; leNkosi ilayo.

¹⁹ Ngakho uSawuli wasethumela izithunywa kuJese, wathi: Thumela kimi uDavida indodana yakho owalusa izimvu.

²⁰ UJese wathatha ubabhemi, wamthwalisa isinkwa lembodlela yewayini, wathatha lezinyane, wakuthumela kuSawuli ngoDavida indodana yakhe.

²¹ UDavida wafika kuSawuli, wamsebenzela. USawuli wamthanda kakhulu, wamenza waba ngumphathi wezikhali zakhe.

²² USawuli wasethumela ilizwi kuJese wathi: UDavida uzahlala emsebenzini wami, ngoba uyangithokozisa.

²³ Kwakusithi lapho umoya omubi ovela kuNkulunkulu umehlela uSawuli, uDavida athathe ichacho atshaye, abeseqaqabuka uSawuli esiba ngcono, lomoya omubi usuke kuye.