1 USamuyeli 10 - iBhayibhili Elingcwele 1978

USamuweli ugcoba uSawuli

¹ USamuweli wasethatha umfuma wamagcobo, wawathela ekhanda likaSawuli; wamanga esithi: INkosi iyakugcoba ukuba ube ngumbusi wabantu bayo uIsrayeli; uzabusa abantu beNkosi, ubakhulule ezitheni zabo ezibaphahlileyo. Lokhu kuzakuba yisiboniso kuwe ukuthi iNkosi ikugcobile ukuba ngumbusi wabantu bayo.

² Nxa ususukile kimi lamuhla uzahlangana labantu ababili elibeni likaRaheli eZeliza elizweni lakoBenjamini; bazakuthi kuwe: Obabhemi obuyebadinga sebebonakele, loyihlo useyekele ukucabanga ngabobabhemi, uselinqinekela esithi: Ngizakwenza njani ngendodana yami na?

³ Nxa usudlule lapho waya phambili, uzafika esihlahleni esikhulu saseTabori; lapho uzahlangana labantu abathathu besiyakhuleka kuNkulunkulu eBetheli, omunye ephethe amazinyane amathathu, omunye ephethe izinkwa ezintathu, lomunye ephethe imbodlela yewayini.

⁴ Bazakukubingelela bakunike izinkwa ezimbili; uzithathe.

⁵ Emva kwalokho uzafika entabeni kaNkulunkulu lapho kuhlala khona ibutho lamaFilistiya; laphoke, nxa ufika nje emzini uzahlangana lexuku labaprofethi bevela endaweni ephakemeyo yokukhonzela betshaya amachacho, lesigubhu, lomhlanga, lomhubhe, beprofetha.

⁶ Umoya kaNkulunkulu uzakwehlela phezu kwakho masinyane, uprofethe kanye labo, uphenduke omunye umuntu.

⁷ Kuzakuthi lapho lezizibonakaliso zikufikela, wenze lokho okufanele lesosikhathi; uNkulunkulu uzakuba lawe.

⁸ Uzangandulela eGiligali; ngizakuza kuwe nginikele iminikelo yokutshiswa lemihlatshelo yokuthula. Uzangilindela insuku eziyisikhombisa ngize ngifike kuwe, ngikutshele lokho ozakukwenza.

⁹ Kwathi lapho uSawuli esefulathele uSamuweli, uNkulunkulu wamnika inhliziyo entsha; zonke lezizibonakaliso zagcwaliseka mhlalokho.

¹⁰ Lapho befika entabeni kaNkulunkulu bahlangana lexuku labaprofethi; umoya kaNkulunkulu wehlela phezu kwakhe masinyane, waprofetha kanye labo.

¹¹ Kwathi bonke ababemazi ngaphambili bembona eprofetha labaprofethi, babuzana besithi: Kuyini lokhu okwehlele indodana kaKishi na? Kanti loSawuli uphakathi kwabaprofethi na?

¹² Kwaphendula owakhona wathi: Ngubani uyise wabo na? Ngakho kwasekusiba yisaga ukuthi: Kanti loSawuli uphakathi kwabaprofethi na?

¹³ Eseqedile ukuprofetha wafika endaweni ephakemeyo yokukhonzela.

¹⁴ Uyise omncinyane kaSawuli wathi kuye lencekwini yakhe: Beliye ngaphi na? Wathi: Besiyedinga obabhemi; kuthe lapho singababoni sasesisiya kuSamuweli.

¹⁵ Uyise omncinyane kaSawuli wathi: Utheni kini uSamuweli na?

¹⁶ USawuli wasesithi kuyise omncinyane: Usitshelile impela ukuthi obabhemi sebebonakele. Kodwa indaba yombuso akhuluma ngayo uSamuweli kamtshelanga ngayo.

¹⁷ USamuweli wababizela abantu eNkosini eMizipa;

¹⁸ wathi kibo abakoIsrayeli: INkosi uNkulunkulu kaIsrayeli ithi: Ngamkhupha uIsrayeli eGibithe, ngalikhulula kumaGibithe lakuyo yonke imibuso eyayilicindezela.

¹⁹ Kodwa lamuhla limlahlile uNkulunkulu wenu owalikhululayo engozini zonke lasensizini zenu; lathi: Atshi, sibekele inkosi. Ngakho manini phambi kweNkosi uNkulunkulu ngezizwe zenu langezinsendo zenu.

²⁰ USamuweli wasesondeza zonke izizwe zakoIsrayeli; isizwe sakoBenjamini sadliwa yinkatho.

²¹ Wasesondeza isizwe sakoBenjamini ngezindlu zaso, indlu yakoMatiri yadliwa yinkatho. Wasondeza indlu yakoMatiri ngamuntu munye, inkatho yadla uSawuli indodana kaKishi. Kodwa kuthe sebemdinga bamswela.

²² Babuya babuza futhi eNkosini bathi: Lowomuntu uke wafika lapha na? INkosi yathi: Nango ucatshile empahleni.

²³ Basebegijima bamlanda khona, lapho esema phakathi kwabantu, wayemude kulabo bonke abantu kusukela emahlombe akhe kusiya phezulu.

²⁴ USamuweli wasesithi kubo bonke abantu: Liyambona lowo iNkosi emkhethileyo na? Kakho loyedwa onjengaye kubo bonke abantu. Bonke abantu bamemeza bathi: Bayethe!

²⁵ USamuweli wasebatshela abantu amalungelo lomsebenzi wobukhosi; wakuloba encwadini, wayibeka phambi kweNkosi uNkulunkulu. USamuweli wasebadabulela bonke abantu, bonke baya emakhaya abo.

²⁶ USawuli laye waya ekhaya eGibeya, kwahamba laye amadoda angamaqhawe ezinhliziyo zawo uNkulunkulu wayezithintile.

²⁷ Kodwa amadoda amabi athi: Uzasisiza njani lumuntu na? Bamdelela, kabamnikanga sipho; kodwa yena wazithulela.