1 UPhethro 5 - iBhayibhili Elingcwele 1978

Ukulaywa kwabadala bebandla lokwabatsha

¹ Ngakhoke ngiyabalaya abadala bebandla abaphakathi kwenu, mina engingomdala kanye labo, lofakazi wezinhlupheko zikaKristu, lomhlanganyeli wenkazimulo ezakwambulwa kithi.

² Yalusani umhlambi kaNkulunkulu eliwunikiweyo, kungabi ngokubanjwa ngamandla, kodwa ngokuthanda langokwentando kaNkulunkulu, kungabi ngenxa yenzuzo elihlazo, kodwa ngokuvuma kwenhliziyo,

³ kungabi njengabazenza amakhosi kulabo elibaphetheyo, kodwa libe yizibonelo zomhlambi.

⁴ Kuzakuthi, lapho esabonakaliswa uMalusi omkhulu, lamukeliswe umqhele wobukhosi ongabuniyo.

⁵ Ngokunjalo lani abatsha, zehliseleni ngaphansi kwabadala bebandla; yambathani lonke ukuthobeka, lithobelane, ngoba uNkulunkulu umelana labazigqajayo, kodwa abazithobileyo uyabapha umusa.

⁶ Ngakhoke zehliseleni ngaphansi kwesandla sikaNkulunkulu esilamandla, ukuze aliphakamise ngesikhathi esifaneleyo.

⁷ Lethulele phezu kwakhe izinkathazo zenu zonke, ngoba uyalikhathalela.

⁸ Phaphamani lilinde; ngoba isitha senu, uSathane, siyahambahamba njengesilwane esibhongayo sidinga esingabadla.

⁹ Limelane laye liqinile ekukholweni, lazi ukuthi zona lezonhlupheko zehlela abazalwane benu abasemhlabeni wonke.

¹⁰ Kodwa lapho selihluphekile okwesikhatshana, uNkulunkulu womusa wonke owalibizela ebukhosini bakhe obungapheliyo ngoKristu, yena oqobo uzakuliphelelisa, aliqinise, alinike amandla.

¹¹ Kakube kuye amandla kuze kube nininini. Ameni.

Isicino

¹² NgoSilivanu, umzalwane othembekileyo ngokumazi kwami, ngililobele ngokufitshane, ngililaya, ngifakaza ukuthi lo yiwo umusa oqotho kaNkulunkulu; manini liqine kuwo.

¹³ Ibandla eliseBabiloni elikhethiweyo njengani liyalibingelela, loMarko indodana yami.

¹⁴ Bingelelanani ngokwangana kothando. Ukuthula kakube kini lonke elikuKristu.