1 UPhethro 4 - iBhayibhili Elingcwele 1978

Abakholwayo balaywa ukuba bayekele ukona

¹ Njengokuba uKristu wahlupheka emzimbeni, hlomani lani ngengqondo efanayo, ngoba ohlupheke emzimbeni useyekele ukona,

² ukuze ngesikhathi esisaseleyo lisesekhona lingabe lisahlala ngezinkanuko zabantu kodwa ngentando kaNkulunkulu.

³ Isikhathi esedlulileyo sanele ukwenza okuthandwa ngabezizwe, ukuhamba ngamanyala, langezinkanuko, langokudakwa, langokuminza, langokuxokozela, langokukhonza izithombe.

⁴ Bayamangala ukuthi kalisahlangani labo kulokhukuziphatha kubi, balithuke;

⁵ kodwa bazakuziphendulela kulowo olungele ukuthonisisa abaphilayo labafileyo.

⁶ Ngoba ngenxa yalokho ivangeli latshunyayelwa lakwabafileyo, ukuze kuthi, lanxa belahliwe emzimbeni, baphile emoyeni njengoNkulunkulu.

⁷ Ukuphela kwezinto zonke sekusondele. Ngakho zikhuzeni, liqonde, likhuleke.

⁸ Kulakho konke thandanani ngokungapheliyo, lokhu uthando luyasibekela izono ezinengi.

⁹ Lizejwayeze ukwethekelelana lingasoli.

¹⁰ Lisizane, kube yilowo lalowo ngesiphiwo asiphiweyo, njengabaphathi abalungileyo bomusa omnengi kaNkulunkulu.

¹¹ Uba umuntu ekhuluma, kakhulume ngokungathi ukhuluma amazwi kaNkulunkulu; uba umuntu esebenza, kasebenze ngamandla awanikwa nguNkulunkulu, ukuze uNkulunkulu adunyiswe kukho konke ngoJesu Kristu. Kukhona kuye ubukhosi lamandla kuze kube nininini. Ameni.

Ukuhlanganyela izinhlupheko zikaKristu

¹² Bathandekayo, lingamangali ngezilingo ezinkulu eziphakathi kwenu elifikelwa yizo ukuba lilingwe ngokungathi lehlelwe yilutho olungaziwayo;

¹³ kodwa thokozani ekuhlanganyeleni kwenu izinhlupheko zikaKristu, ukuze kuthi lasekwambulweni kwenkazimulo yakhe lithokoze.

¹⁴ Uba lithukwa ngenxa yebizo likaKristu, libusisiwe, ngoba uMoya wenkazimulo onguMoya kaNkulunkulu uhlezi phezu kwenu.

¹⁵ Kodwa kakungabi khona owakini ohlupheka ngokuba engumbulali, loba elisela, loba engumenzi wokubi, loba engumxabanisi;

¹⁶ kodwa uba umuntu ehlupheka ngokuba engumKristu kangabi lanhloni, kodwa kadumise uNkulunkulu ngenxa yalelobizo.

¹⁷ Ngoba sekuyisikhathi sokuba ukuthonisiswa kuqale endlini kaNkulunkulu; uba kuqala ngathi, kuzakuba yini ukuphela kwalabo abangalalelanga ivangeli likaNkulunkulu na?

¹⁸ Kuthiwa: Uba olungileyo esiliswa ngokunzima, kuzakuba njani pho koweyisa uNkulunkulu loyisoni na?

¹⁹ Ngakho labo abahluphekayo ngokwentando kaNkulunkulu kababeke imiphefumulo yabo kuMdali othembekileyo, bahlale besenza okulungileyo.