1 UPhethro 3 - iBhayibhili Elingcwele 1978

Ukuphathana kwabathetheneyo

¹ Ngokunjalo lani bafazi, zehliseleni ngaphansi kwamadoda enu, ukuze kuthi, uba ekhona ongakholwayo ilizwi, azuzwe ngaphandle kokukhuluma ngenxa yokuhamba kwabafazi bawo,

² lapho ebona ukuhamba kwenu okuqotho lokuhlambulukileyo.

³ Ukuceca kwenu kakungabi ngokwangaphandle okokwaluka inwele, lokokufaka igolide, lokokugqoka izambatho.

⁴ Kodwa kakube ngumuntu osithekileyo wenhliziyo oceca ngokungagugiyo komoya omnene lokuthula, okuligugu phambi kukaNkulunkulu.

⁵ Kudala babececa ngokunjalo abesifazana abangcwele ababethemba uNkulunkulu, bezehlisela ngaphansi kwamadoda abo,

⁶ njengoSara owamlalela uAbrahama wambiza ngokuthi yinkosi, elingabantwana bakhe lina, uba lisenza okuhle, lingesatshiswa langokukodwa okwesabekayo.

⁷ Ngokunjalo lani madoda, hlalani labomkenu ngokwazi, limhloniphe owesifazana njengomuntu obuthakathaka, lokhu beyizindlalifa zomusa wokuphila kanye lani, ukuze imikhuleko yenu ingavimbeleki.

Ukuhamba ngokubekezela ekuhluphekeni

⁸ Okokucina, wobani lanhliziyonye lonke, lizwelane, lithande abazalwane, libe lobubele lokuthobeka,

⁹ lingaphindiseli okubi ngokubi lokuthuka ngokuthuka, kodwa ikakhulu busisani, ngoba labizelwa khona lokho ukuba lidle ilifa lokubusiswa.

¹⁰ Ngoba kuthiwa: Lowo othanda ukuphila lokubona insuku ezinhle kanqande ulimi lwakhe kokubi, lomlomo wakhe ungakhulumi inkohliso;

¹¹ kasuke kokubi enze okuhle, adinge ukuthula, akunxwanele;

¹² ngoba amehlo eNkosi akubo abalungileyo, lezindlebe zayo zilalela ukukhuleka kwabo, kodwa imelana labenza okubi.

¹³ Pho, ngubani ongalilimaza, uba litshisekela okuhle na?

¹⁴ Kodwa uba lihlupheka ngenxa yokulunga, lizakubusiswa. Lingabesabi, likhathazeke,

¹⁵ kodwa enhliziyweni zenu mdumiseni uKristu oyiNkosi. Lihlale lizilungisele ukuphendula bonke abalibuza isizatho sokuthemba kwenu, likwenze ngobumnene langokuhlakanipha;

¹⁶ libe lesazela esihle, ukuze kuthi lapho belihleba, labo abathuka ukuhamba kwenu kuKristu bayangeke.

¹⁷ Ngoba kuhle ukuhlupheka ngenxa yokwenza okuhle, uba lokho kuyintando kaNkulunkulu, kulokuhlupheka ngenxa yokwenza okubi.

¹⁸ Ngoba uKristu laye wafela izono kwaba kanye, olungileyo ngenxa yabangalunganga, ukuze asise kuNkulunkulu. Wabulawa emzimbeni kodwa wavuswa emoyeni,

¹⁹ ahamba ngawo ukutshumayeza imimoya esekubotshweni

²⁰ eyababekade bengalaleli, lapho uNkulunkulu ngokubekezela ebalindele ensukwini zikaNowa umkolo usakhiwa, okwasiliswa abayingcosana ngawo amanzi, okuyikuthi abantu abaficaminwembili.

²¹ Lawomanzi angumfanekiso wobhaphathizo elisiliswa ngalo lina khathesi. Ukubhaphathizwa kakusikho ukugezisa ingcekeza yomzimba, kodwa kuyikucela kuNkulunkulu isazela esihle ngokuvuka kukaJesu Kristu,

²² osenyukele ezulwini lokhona ngakwesokunene sikaNkulunkulu, osekwehliselwe ngaphansi kwakhe izithunywa leziphathamandla zezulu.