1 UPhethro 2 - iBhayibhili Elingcwele 1978

¹ Ngakho lahlani ububi bonke, lobuqili bonke, lokuzenzisa, lomhawu, lokuhleba.

² Njengezingane ezisand’ukuzalwa fisani uchago oluhle, ngitsho uchago olungokomoya, ukuze ngalo likhuliselwe ukusiliswa;

³ ngoba selibonile ukuthi iNkosi ilomusa.

Ukwakhiwa kwendlu yokomoya

⁴ Wozani eNkosini, kulo idwala eliphilayo elaliwa ngabantu, kodwa kuNkulunkulu lingelikhethiweyo eliligugu;

⁵ njengamatshe aphilayo lakhiwe indlu yokomoya, libe yibupristi obungcwele, linikele imihlatshelo yokomoya eyamukelekayo kuNkulunkulu ngoJesu Kristu.

⁶ Ngoba umbhalo uthi: Khangelani, ngiyabeka eZiyone ilitshe lengonsi elikhethiweyo eliligugu; okholwa kulo kayikuyangeka.

⁷ Ngakho kini elikholwayo liligugu, kodwa kulabo abangakholwayo kuthiwa: Ilitshe elaliwayo ngabakhi selaba yinhloko yengonsi;

⁸ ilitshe lokukhubekisa abantu, ledwala lokubawisa. Ngoba bayakhubeka ngenxa yokungalaleli ilizwi, okuyikhona ababekumiselwe.

⁹ Kodwa lina liluhlanga olukhethiweyo, ubupristi bobukhosi, lesizwe esingcwele, abantu abamisiweyo babe ngabakaNkulunkulu, ukuze litshumayele izenzo ezimangalisayo zalowo owalikhupha emnyameni, walisa ekukhanyeni kwakhe okumangalisayo.

¹⁰ Lalikade lingesibo abantu, kodwa khathesi selingabantu bakaNkulunkulu; lalingahawukelwanga, kodwa khathesi selihawukelwe.

¹¹ Bathandekayo, ngiyalincenga lokhu liyizihambi labemzini ukuba lizigcine ezinkanukweni zomzimba ezilwa lomphefumulo wenu;

¹² lihambe ngokuhle phakathi kwabezizwe, ukuze kuthi lapho belihleba ngokuthi lingabenzi bokubi, bathi ngokubona izenzo zenu ezinhle badumise uNkulunkulu osukwini lokuhanjelwa.

Ukuzehlisela ngaphansi kwezimiso zabantu ngenxa yeNkosi

¹³ Zehliseleni ngaphansi kwezimiso zonke zabantu ngenxa yeNkosi, loba kuyinkosi enkulu ebusayo,

¹⁴ loba kungababusi abathunywe yiyo ukuba batshaye labo abenza okubi, babonge abenza okuhle;

¹⁵ ngoba kuyintando kaNkulunkulu ukuba ngokwenza okuhle liqede ukungazi kwezithutha.

¹⁶ Hlalani njengabakhululekileyo, kodwa lingenzi inkululeko yenu ibe lizaba lokwenza okubi, kodwa lihlale njengezigqili zikaNkulunkulu.

¹⁷ Hloniphani abantu bonke, lithande abazalwane, limesabe uNkulunkulu, lihloniphe inkosi enkulu.

¹⁸ Zinceku, zehliseleni ngaphansi kwamakhosi enu ngokuhlonipha konke, kungesikho kulawo alomusa lesihawu kuphela, kodwa lakulawo alolaka.

¹⁹ Ngoba kuyabongeka uba umuntu ethwala ubuhlungu lokuhlupheka okungafanelanga ngenxa yesazela sakhe kuNkulunkulu.

²⁰ Kulilethela udumo bani, uba libekezela lapho litshayelwa ukona na? Kodwa uba libekezela lapho lenza okuhle lihlupheke ngakho, lokhu kuyabongeka kuNkulunkulu.

²¹ Labizelwa khona lokho; ngoba uKristu laye wahlupheka ngenxa yenu, walitshiyela isibonelo sokuba lilandele ezinyathelweni zakhe.

²² Yena kenzanga isono, lenkohliso kayifunyaniswanga emlonyeni wakhe,

²³ owathi ethukwa kazaphindisela ngokuthuka, owathi ehlutshwa kazasongela, kodwa wathembela kulowo othonisisa ngokulunga.

²⁴ Yena wathwala izono zethu emzimbeni wakhe esiphambanweni, ukuze kuthi sesifile esonweni siphile ekulungeni. Lisilisiwe ngamanxeba akhe.

²⁵ Ngoba lalinjengezimvu ezilahlekileyo, kodwa khathesi selibuyele kumalusi lomlondolozi wemiphefumulo yenu.