1 UJohane 5 - iBhayibhili Elingcwele 1978

Ukukholwa lamandla akho okunqoba

¹ Yilowo lalowo okholwa ukuthi uJesu unguKristu, ungumntwana kaNkulunkulu; lalowo othanda umzali uthanda laye ozelweyo nguye.

² Ngalokho siyazi ukuthi siyabathanda abantwana bakaNkulunkulu, nxa sithanda uNkulunkulu silalela imilayo yakhe.

³ Ngoba ukumthanda uNkulunkulu yilokhu ukuba sigcine imilayo yakhe; lemilayo yakhe kayinzima.

⁴ Ngoba konke okuzelwe nguNkulunkulu kuyawunqoba umhlaba; lokho okunqoba umhlaba yikukholwa kwethu.

⁵ Ngubani onqoba umhlaba uba kungesuye okholwa ukuthi uJesu uyiNdodana kaNkulunkulu na?

⁶ Nguye lo oweza ngamanzi langegazi, uJesu Kristu; kezanga ngamanzi kuphela, kodwa weza ngamanzi langegazi.

⁷ UMoya ungufakazi walokhu, ngoba uMoya uliqiniso.

⁸ Bathathu ofakazi, uMoya lamanzi legazi, laba abathathu bayavumelana.

⁹ Uba sisamukela ubufakazi babantu, ubufakazi bukaNkulunkulu bukhulu kulalobo; ngoba ubufakazi bukaNkulunkulu buyilobu bokuthi ubufakazile ngeNdodana yakhe.

¹⁰ Okholwa eNdodaneni kaNkulunkulu ulobufakazi phakathi kwakhe. Ongakholwa kuNkulunkulu umenza abe ngumqambi wamanga, ngoba engakholwanga yibufakazi uNkulunkulu abufakazileyo ngeNdodana yakhe.

¹¹ Yilobu ubufakazi ukuthi uNkulunkulu usinikile ukuphila okungapheliyo, lalokhukuphila kuseNdodaneni yakhe.

¹² Olayo iNdodana ulokuphila; ongelayo iNdodana kalakho ukuphila.

Isicino

¹³ Ngililobela lokhu lina elikholwayo ebizweni leNdodana kaNkulunkulu, ukuze lazi ukuthi lilokuphila okungapheliyo.

¹⁴ Yilesi isibindi esilaso kuye sokuthi, uba sicela ulutho ngokwentando yakhe, uyasizwa.

¹⁵ Uba sisazi ukuthi uyasizwa loba sicelani, siyazi ukuthi sesikuzuzile esikucela kuye.

¹⁶ Uba umuntu ebona umzalwane wakhe esenza isono esingesiso sokufa, kamkhulekele kuNkulunkulu; uzakumnika ukuphila, ngitsho labo abangenzanga isono sokufa. Sikhona isono sokufa, kangitsho ukuba kukhulekelwe leso;

¹⁷ konke ukungalungi kuyisono, kodwa kukhona isono esingesiso sokufa.

¹⁸ Siyazi ukuthi lowo ozelwe nguNkulunkulu koni; ngoba iNdodana kaNkulunkulu iyamgcina, loSathane kamthinti.

¹⁹ Siyazi ukuthi thina singabakaNkulunkulu, lokuthi umhlaba wonke usemandleni kaSathane.

²⁰ Siyazi ukuthi iNdodana kaNkulunkulu isifikile, yasinika ukuqedisisa ukuze simazi oweqiniso; sikuye oweqiniso lokhu sikiyo iNdodana yakhe uJesu Kristu. Yena unguNkulunkulu weqiniso lokuphila okungapheliyo.

²¹ Bantwana, zilondolozeni ezithombeni.