1 UJohane 3 - iBhayibhili Elingcwele 1978

Uphawu lwabantwana bakaNkulunkulu

¹ Khangelani uthando olungaka asinika lona uBaba lokuba kuthiwe singabantwana bakaNkulunkulu; lempela siyibo. Ngenxa yalokho umhlaba kawusazi, ngoba ungamazanga yena.

² Bathandekayo, khathesi singabantwana bakaNkulunkulu; kakukabonakali esizakuba yikho, kodwa siyazi ukuthi, nxa esefikile, sizakuba njengaye, ngoba sizakumbona njengoba enjalo.

³ Ilowo lalowo othemba kuye uyazihlambulula, njengoba uKristu ehlambulukile.

⁴ Ilowo lalowo owenza isono weqa umlayo; isono siyikweqa umlayo.

⁵ Liyazi ukuthi uKristu wabonakaliswa ukuba asuse izono, kakukho isono kuye.

⁶ Lowo ohlala kuye koni; lowo owonayo kambonanga, futhi kamazi.

⁷ Bantwana, lingakhohliswa muntu; owenza ukulunga ulungile, njengoba uNkulunkulu elungile;

⁸ owenza isono ungokaSathane; ngoba uSathane wona kusukela ekuqaleni. Ngenxa yalokhu iNdodana kaNkulunkulu yafika ukuze ichithe imisebenzi kaSathane.

⁹ Kakho ozelwe nguNkulunkulu owenza isono, ngoba inhlanyelo kaNkulunkulu ihlala kuye; futhi angone, ngoba ezelwe nguNkulunkulu.

¹⁰ Ngalokhu kuyabonakala abantwana bakaNkulunkulu labantwana bakaSathane; lowo ongenzi okulungileyo kasuye okaNkulunkulu, laye ongamthandiyo umzalwane wakhe.

¹¹ Ngoba yilo ilizwi elalizwa kusukela ekuqaleni elokuthi asithandane,

¹² singabi njengoKayini owaba ngokaSathane, wabulala umfowabo. Wambulalelani na? Ngoba imisebenzi yakhe yayimibi, kodwa eyomfowabo yayilungile.

Uthando lwabazalwane

¹³ Lingamangali, bazalwane, uba umhlaba ulizonda.

¹⁴ Siyazi ukuthi sesidlule ekufeni, sangena ekuphileni ngoba siyabathanda abazalwane. Ongathandiyo uhlezi ekufeni.

¹⁵ Lowo ozonda umzalwane wakhe ungumbulali; liyazi ukuthi kakho umbulali olokuphila okungapheliyo okuhlezi kuye.

¹⁶ Uthando silwazi ngalokhu ukuthi uKristu wadela ukuphila kwakhe ngenxa yethu; lathi sifanele ukudela ukuphila kwethu ngenxa yabazalwane.

¹⁷ Kodwa yena olenotho yasemhlabeni, ebona umzalwane wakhe eswele, angamhawukeli, uthando lukaNkulunkulu lungahlala kanjani kuye na?

¹⁸ Bantwana, kasingathandi ngamazwi langomlomo nje, kodwa asithande ngezenzo langeqiniso.

¹⁹ Ngalokho siyakwazi ukuthi singabeqiniso, sithulise inhliziyo zethu phambi kwakhe,

²⁰ lapho inhliziyo zethu zisilahla; ngoba uNkulunkulu mkhulu kulenhliziyo zethu, futhi uyakwazi konke.

²¹ Bathandekayo, uba inhliziyo zethu zingasilahli, singasondela kuNkulunkulu ngesibindi;

²² lesikucelayo uzakusinika khona, ngoba sigcina imilayo yakhe, senze okuthandekayo kuye.

²³ Yilo umlayo wakhe, ukuba sikholwe ebizweni leNdodana yakhe uJesu Kristu, lokuba sithandane, njengalokhu esilayile.

²⁴ Abagcina imilayo yakhe bahlala kuye, laye uqobo uhlala kibo. Siyazi ukuthi uhlala lathi ngaye uMoya asinike yena.