1 ImiLando 5 - iBhayibhili Elingcwele 1978

Inzalo kuRubeni

¹ Nanka amadodana kaRubeni izibulo likaIsrayeli — wayelizibulo, kodwa njengoba wayelele lomunye wabafazi bakayise, ubuzibulo bakhe banikwa amadodana kaJosefa indodana kaIsrayeli; futhi wayengalotshwanga njengezibulo;

² nguJuda owayelamandla phakathi kwabafowabo, wazala umbusi, kodwa ubuzibulo babungobukaJosefa —

³ Amadodana akhe uRubeni, izibulo likaIsrayeli, ayengoHanoki loPalu loHezironi loKarmi.

⁴ Inzalo kaJoweli yayingoShemaya, lomntanakhe uGogi, lomntanakhe uShimeyi,

⁵ lomntanakhe uMika, lomntanakhe uReyaya, lomntanakhe uBali,

⁶ lomntanakhe uBera owathunjwa nguTiligathi‐Piliseri inkosi yaseAsiriya; waba yisikhulu sabakoRubeni.

⁷ Izihlobo zakhe ngosendo lwazo, ezalotshwayo ngezizukulwana zazo, zazinguJeyiyeli induna, loZekariya,

⁸ loBela indodana kaAzazi kaShema kaJoweli; behlala eAroweri kwaze kwaba seNebo leBali‐Meyoni.

⁹ Futhi babehlala ngasempumalanga kwaze kwaba semkhawulweni wenkangala esuka emfuleni iYufrathi, ngoba babelezifuyo ezinengi elizweni laseGileyadi.

¹⁰ Ensukwini zikaSawuli balwa lamaHagari, bawanqoba, bahlala emathenteni awo kulo lonke ilizwe ngasempumalanga kweGileyadi.

Inzalo kaGadi

¹¹ Maqondana labo kwakukhona abakoGadi, behlala elizweni laseBashani kwaze kwafika eSaleka.

¹² UJoweli wayeyinhloko, elandelwa nguShafamu; balandelwa ngoJanayi loShafati eBashani.

¹³ Izihlobo zabo ngezindlu zazo zazingoMikayeli loMeshulamu loSheba loJorayi loJakani loZiya loEberi, beyisikhombisa.

¹⁴ Labo babengamadodana kaAbihayili indodana kaHuri kaJarowa kaGileyadi kaMikayeli kaJeshishayi kaJahido kaBuzi.

¹⁵ UAhi indodana kaAbidiyeli kaGuni wayeyinhloko yezindlu zabo.

¹⁶ Bahlala eGileyadi, leBashani lemizaneni yalo, lakuwo wonke amadlelo aseSharoni kwaze kwaba semikhawulweni yawo.

¹⁷ Bonke laba balotshwa ngezizukulwana zabo ensukwini zikaJothamu inkosi yakoJuda lezikaJerobowamu inkosi yakoIsrayeli.

Isizwe sakoRubeni lesakoGadi lengxenye yesizwe sakoManase

¹⁸ AbakoRubeni labakoGadi lengxenye yesizwe sakoManase babelamaqhawe ahloma izihlangu lemikhonto, atshoka imitshoko, akwaziyo ukulwa; ayeyizinkulungwane ezingamatshumi amane lane, lamakhulu ayisikhombisa, lamatshumi ayisithupha, elungele ukulwa.

¹⁹ Ahlasela amaHagari loJeturi loNafishi loNodabi.

²⁰ Athola usizo ekulweni labo, ngoba akhuleka kuNkulunkulu empini, wawanika lokho akucelayo ngoba ayemthemba; amaHagari labo bonke ababelawo banikelwa ezandleni zawo.

²¹ Athumba izifuyo zabo, amakamela azinkulungwane ezingamatshumi amahlanu, izimvu ezizinkulungwane ezingamakhulu amabili lamatshumi amahlanu, labobabhemi abazinkulungwane ezimbili, labantu abazinkulungwane ezilikhulu.

²² Abanengi babulawa, ngoba impi yayingekaNkulunkulu. Wona ahlala ezindaweni zabo kwaze kwafika isikhathi sokuthunjwa.

²³ Ingxenye yesizwe sakoManase yahlala kulelolizwe, kusukela eBashani kusiya eBali‐Hermoni leSeniri lentabeni yaseHermoni, bebanengi.

²⁴ Inhloko zezindlu zabo zazingoEferi loIshi loEliyeli loAziriyeli loJeremiya loHodaviya loJahidiyeli, bengamaqhawe alodumo.

²⁵ Kodwake bona kuNkulunkulu wabokhokho babo, balandela onkulunkulu babantu balelolizwe, uNkulunkulu abachithayo phambi kwabo.

²⁶ Ngakho uNkulunkulu kaIsrayeli wavusa umoya kaPuli inkosi yaseAsiriya, othiwa nguTiligathi‐Piliseri, wathumba abakoRubeni labakoGadi lengxenye yesizwe sakoManase, wabasa eHala leHabori leHara lasemfuleni iGozani; bakhona lapho kuze kube lamhla.