1 ImiLando 29 - iBhayibhili Elingcwele 1978

¹ Inkosi uDavida yathi ebandleni lonke: Umntanami uSolomoni onguye yena yedwa okhethwe nguNkulunkulu usengumfana, kalalwazi, lomsebenzi mkhulu; ngoba lesisigodlo kasiso somuntu, kodwa ngeseNkosi uNkulunkulu.

² Ngakho ngiyilungisele indlu kaNkulunkulu wami ngamandla engilawo igolide lokwenza izinto zegolide, lesiliva sokwenza izinto zesiliva, lethusi lokwenza izinto zethusi, lensimbi yokwenza izinto zensimbi, lezigodo zokwenza izinto zezigodo, ngaphandle kwamatshe amanengi athiwa ionikse, lamatshe okubekwa, lamatshe okucecisa, lalemibala, lenhlobo zonke zamatshe amahle lamatshe alukhuni amanengi.

³ Phezu kwakho konke lokhu engikulungisele indlu engcwele ngilenotho engeyami eyegolide lesiliva; ngenxa yokutshisekela kwami indlu kaNkulunkulu wami nginikela ngayo endlini kaNkulunkulu wami

⁴ ingamathalenta egolide azinkulungwane ezintathu, igolide laseOfiri, lamathalenta esiliva esihle azinkulungwane eziyisikhombisa ukugudula ngalo imiduli yendlu,

⁵ legolide lokwenza izinto zegolide, lesiliva sokwenza izinto zesiliva, lakho konke okwakufunwa yizingcitshi. Ngubanike omunye ozanikela izipho ngenhliziyo eNkosini lamhla na?

⁶ Inhloko zezindlu zasezinikela iminikelo yazo ngenhliziyo, lezinduna zezizwe, labaphathi bezinkulungwane labamakhulu, labaphathi bomsebenzi wenkosi.

⁷ Banikela emsebenzini wendlu kaNkulunkulu amathalenta azinkulungwane ezinhlanu, lenhlamvu zegolide ezizinkulungwane ezilitshumi, lamathalenta esiliva azinkulungwane ezilitshumi, lamathalenta ethusi azinkulungwane ezilitshumi lesificaminwembili, lamathalenta ensimbi azinkulungwane ezilikhulu.

⁸ Labo ababelamatshe aligugu banikela ngawo enothweni yethempeli ukuba alondolozwe nguJehiyeli umGerishoni.

⁹ Basebethokozake abantu ngoba laba babenikele ngothando, langokuthi babenikele kuNkulunkulu kangaka ngesihle; loDavida inkosi laye wathokoza kakhulu.

UDavida ubonga iNkosi

¹⁰ UDavida waseyibonga iNkosi phambi kwebandla lonke, wathi: Kawudunyiswe, wena Nkosi, Nkulunkulu kaIsrayeli ukhokho, kuze kube nininini.

¹¹ Bungobakho, wena Nkosi, ubukhulu lamandla lodumo lokunqoba lobukhosi; ngoba konke okusezulwini lokusemhlabeni kungokwakho; umbuso ungowakho, Nkosi; wena uphakeme, uyinhloko phezu kwakho konke.

¹² Inotho lodumo kuvela kuwe, wena ubusa konke; kuwe kukhona amandla lobukhulu, kukuwe ukunika ubukhulu lamandla kubo bonke.

¹³ Siyakubonga khathesi, Nkulunkulu wethu, silidumise ibizo lakho elilodumo.

¹⁴ Kodwa mina ngiyini, labantu bami bayini, ukuba sibe lamandla okunikela ngenhliziyo na? Ngoba zonke izinto zivela kuwe, sinikele kuwe okungokwakho.

¹⁵ Singabemzini phambi kwakho lezihambi njengabo bonke okhokho bethu; insuku zethu emhlabeni zinjengesithunzi, kasihlali kokuphela.

¹⁶ Nkosi Nkulunkulu wethu, konke lokhu okunengi esikulungisele ukwakhela ibizo lakho elingcwele indlu kuvela kuwe, kungokwakho.

¹⁷ Ngiyazi, Nkulunkulu wami, ukuba wena uhlola inhliziyo, uyabuthanda ubuqotho. Ngenhliziyo yami eqotho nginikele ngesihle zonke lezizinto; sengithokoza ngibona lababantu bakho abakhona lapha benikela kuwe ngesihle.

¹⁸ Nkosi, Nkulunkulu kaAbrahama loIsaka loIsrayeli, okhokho, gcina kokuphela enhliziyweni zabantu bakho ukuzinikela kwabo, uqondise inhliziyo zabo kuwe.

¹⁹ Umnike uSolomoni indodana yami inhliziyo epheleleyo ukugcina imilayo yakho lemithetho yakho lezimiso zakho, azenze zonke, lokuba akhe lesisigodlo mina esengisilungiselele.

Abantu babeka uSolomoni ukuba yinkosi

²⁰ UDavida wasesithi kulo lonke ibandla: Ibongeni iNkosi uNkulunkulu wenu. Lonke ibandla layibonga iNkosi, uNkulunkulu wabokhokho babo; bathi mbo ngobuso phansi, bekhonza iNkosi uNkulunkulu, behlonipha lenkosi uDavida.

²¹ Ngosuku olulandelayo banikela imihlatshelo eNkosini leminikelo yokutshiswa, inkunzi eziyinkulungwane lezinqama eziyinkulungwane lamawundlu ayinkulungwane, kanye leminikelo yabo yokuthululwa, lemihlatshelo eminengi yokunikelela uIsrayeli wonke.

²² Badla banatha phambi kweNkosi uNkulunkulu ngalolosuku ngokuthokoza okukhulu. Basebembeka okwesibili uSolomoni indodana kaDavida ukuba abe yinkosi, bamgcoba waba ngumbusi ongoweNkosi, loZadoki bamgcoba waba ngumpristi.

²³ USolomoni wasebusa embusweni weNkosi uNkulunkulu esikhundleni sikaDavida uyise, waphumelela, wonke uIsrayeli wamlalela.

²⁴ Zonke izinduna lamaqhawe lawo wonke amadodana enkosi uDavida bathembisa ukuyithobela inkosi uSolomoni.

²⁵ INkosi yamnika uSolomoni udumo olukhulu phambi kwabo bonke abakoIsrayeli, yamnika ubukhosi obungazanga bube khona kwenye inkosi ngaphambi kwakhe koIsrayeli.

²⁶ UDavida indodana kaJese wayebuse uIsrayeli wonke;

²⁷ isikhathi sokubusa kwakhe sasiyiminyaka engamatshumi amane; wabusa eHebroni iminyaka eyisikhombisa, eJerusalema iminyaka engamatshumi amathathu lantathu.

²⁸ Wafa eseluphele kakhulu eseleminyaka eminengi lenotho lodumo; uSolomoni indodana yakhe waba yinkosi esikhundleni sakhe.

²⁹ Izenzo zenkosi uDavida ezokuqala lezokucina zilotshiwe engwalweni zezindaba zikaSamuweli umboni lengwalweni zezindaba zikaNathani umprofethi lengwalweni zezindaba zikaGadi umboni,

³⁰ kanye lakho konke ukubusa kwakhe lamandla akhe, lakho konke okwamehlelayo lokwehlela koIsrayeli lemibuso yonke yomhlaba.