1 ImiLando 28 - iBhayibhili Elingcwele 1978

USolomoni ukhethwa ukwakha ithempeli

¹ UDavida wabuthanisa eJerusalema zonke izinduna zakoIsrayeli lezinduna zezizwe lezinduna zezigaba ezazisebenzela inkosi, labaphathi bezinkulungwane labamakhulu, labaphathi bempahla yonke labezifuyo zenkosi labezamadodana ayo labathenwa basesigodlweni, lamaqhawe, lawo wonke amadoda empi alamandla.

² Inkosi uDavida yasisukuma isithi: Lalelani, zihlobo zami labantu bami; bengizimisele ukwakhela umtshokotsho wesivumelwano seNkosi indlu yokuhlala leyisigcabha senyawo zikaNkulunkulu wethu, ngenza amalungiselelo okwakha.

³ Kodwa uNkulunkulu wathi kimi: Kawuyikulakhela indlu ibizo lami, ngoba wena ungumuntu wempi, uchithe igazi.

⁴ Kanti iNkosi uNkulunkulu kaIsrayeli yangikhetha kubo bonke abendlu kababa ukuba ngibe yinkosi yakoIsrayeli kuze kube nini lanini; ngoba yakhetha isizwe sakoJuda ukuba sibe yinhloko, lendlini yakoJuda yakhetha indlu kababa, phakathi kwamadodana kababa kwayithokozisa ukuba ingibeke ngibe yinkosi yakoIsrayeli wonke.

⁵ Kuwo wonke amadodana ami, ngoba iNkosi yanginika amadodana amanengi, yakhetha uSolomoni indodana yami ukuba abe yinkosi koIsrayeli, umbuso weNkosi uNkulunkulu.

⁶ Yathi kimi: NguSolomoni indodana yakho ozakwakha indlu yami lamaguma ami, ngoba ngimkhethile abe yindodana yami, lami ngizakuba nguyise.

⁷ Ngizawuqinisa umbuso wakhe kuze kube nininini uba eqina ekugcineni imilayo yami lemithetho yami njengalamhla.

⁸ Ngakhoke phambi kwakhe uIsrayeli wonke, ibandla leNkosi uNkulunkulu, laphambi kukaNkulunkulu wethu, gcinani ngokunanzelela yonke imilayo yeNkosi uNkulunkulu wenu ukuze lihlale kulelizwe elihle, lilitshiyele abantwana benu, libe ngelabo kuze kube nininini.

⁹ Wenake, Solomoni mntanami, ubomazi uNkulunkulu kaIsrayeli, umkhonze ngenhliziyo yonke langengqondo evumayo; ngoba iNkosi iyazihlola zonke inhliziyo, iyawazi amacebo wonke lemicabango yonke. Uba wena uyidinga, izakuziveza kuwe; kodwa uba uyitshiya, izakukulahla kokuphela.

¹⁰ Qaphelake, ngoba iNkosi ikukhethile ukuba wakhe indlu ezakuba yindlu engcwele; dodake uyakhe.

¹¹ UDavida wasenika uSolomoni indodana yakhe umfanekiso womkoto wethempeli lowezindlu zalo, lowezindlu zenotho, lowezindlu zangaphezulu, lowezindlu zangaphakathi, lowendlu yesihlalo somusa.

¹² Wamnika lomfanekiso wakho konke ayekucabanga ngamaguma ethempeli, lowezindlu eziwazingelezeleyo, lowendlu yenotho yethempeli, lowendlu yenotho yezinto ezingcwele.

¹³ Wamtshela langesimo sezigaba zabapristi lezamaLevi, langawo wonke umsebenzi wethempeli, langezitsha zonke zenkonzo,

¹⁴ langobunzima begolide lazo zonke izitsha zegolide zaleyo laleyonkonzo, langobunzima bezitsha zesiliva zaleyo laleyonkonzo,

¹⁵ langobunzima bezinti zezibane zegolide kanye lezibane zazo, langobunzima begolide balolo lalololuthi lwesibane lezibane zalo, lobunzima besiliva balolo lalololuthi lwesibane lezibane zalo, njengokusetshenziswa kwazo enkonzweni,

¹⁶ langobunzima begolide balelo lalelotafula yezinkwa ezahlukaniselwe uNkulunkulu lobesiliva samatafula esiliva.

¹⁷ Wamtshela langobunzima begolide elihle lamafolokwe, lobemiganu yokuchela lobezinkezo, lobunzima baleso lalesositsha segolide, lobaleso lalesositsha sesiliva.

¹⁸ Wamtshela langesimo sealtare lempepha elenziwe ngegolide elihle lobunzima balo; langomfanekiso wesihlalo esingamakherubi egolide elule amaphiko awo agubuzele umtshokotsho wesivumelwano seNkosi.

¹⁹ UDavida wasesithi: Konke lokhu kwalotshwa ngesandla seNkosi; owami umsebenzi kube yikuchasisa umsebenzi wonke womfanekiso.

²⁰ UDavida wasesithi kuSolomoni indodana yakhe: Dodake ume isibindi, usebenze; ungesabi utshaywe luvalo; ngoba iNkosi uNkulunkulu, yebo uNkulunkulu wami, ulawe. Kasoze wakulahla, kasoze akutshiye, uze uphele wonke umsebenzi wenkonzo yethempeli.

²¹ Nanzi izigaba zabapristi lezamaLevi zenkonzo yonke yendlu kaNkulunkulu; kuwo wonke umsebenzi uzakusizwa yizingcitshi zenhlobo zonke zomsebenzi ezizinikeleyo, labaphathi labo bonke abantu bazakuba ngaphansi kwakho.