1 ImiLando 17 - iBhayibhili Elingcwele 1978

Isivumelwano sikaNkulunkulu loDavida

¹ Kwathi lapho uDavida esehlala endlini yakhe, wathi kuNathani umprofethi: Akuboneke, mina ngihlala endlini yemikusu, kodwa umtshokotsho wesivumelwano seNkosi uhlala ethenteni.

² UNathani wathi kuDavida: Yenza konke okusenhliziyweni yakho, ngoba uNkulunkulu ulawe.

³ Kodwa kwathi ngabona lobobusuku ilizwi leNkosi uNkulunkulu lafika kuNathani,

⁴ lathi: Hamba uyetshela inceku yami uDavida ukuthi iNkosi ithi: Kawuyikungakhela indlu ukuba ngihlale kuyo.

⁵ Ngoba kangizanga ngihlale endlini kusukela osukwini engakhupha ngalo uIsrayeli kuze kube lamhla, kodwa ngahlala ethenteni ngihamba kundawo ngendawo.

⁶ Endaweni zonke engihambe kuzo labo bonke abakoIsrayeli ngake ngakhuluma ilizwi yini komunye wabahluleli bakoIsrayeli, engabalaya ukwalusa abantu bami ngathi: Yini lingangakhelanga indlu yemikusu na?

⁷ Ngakhoke uzakutsho encekwini yami uDavida uthi: INkosi yamabandla ithi: Ngakuthatha ekwaluseni izimvu egangeni ukuba ube ngumbusi wabantu bami uIsrayeli;

⁸ ngaba lawe lapho uya khona, ngachitha zonke izitha zakho ngaphambi kwakho; ngizakwenzela ibizo elikhulu phakathi kwabakhulu basemhlabeni.

⁹ Ngizabamisela indawo abantu bami uIsrayeli, ngibagxumeke ukuba bahlale endaweni yabo, bangabe besakhathazwa futhi; labantu ababi kabasayikubacindezela futhi njengakuqala,

¹⁰ kusukela esikhathini engamisa ngaso abahluleli ebantwini bami uIsrayeli; ngizakunqoba zonke izitha zakho, ngikwenze ube mkhulu, ngiqinise indlu yakho.

¹¹ Kuzakuthi lapho insuku zakho seziphelile, usuyile kwabaphansi, ngimise omunye wabantwana bakho ukuba abe yinkosi esikhundleni sakho, ngiqinise umbuso wakhe.

¹² Yena uzakungakhela indlu, ngizakuqinisa umbuso wakhe kuze kube nininini.

¹³ Mina ngizakuba nguyise, yena abe yindodana yami; kangiyikususa uthando lwami olungapheliyo kuye njengoba ngalususa kulowo owayengaphambi kwakho,

¹⁴ kodwa ngizamqinisa yena endlini yami lasembusweni wami kuze kube nininini, lombuso wakhe uzakuma kokuphela.

¹⁵ UNathani wamtshela uDavida konke lokho ayekutsheliwe, lakho konke ayekutshengisiwe.

¹⁶ Inkosi uDavida yasingena ihlala phambi kweNkosi, yathi: Kambe mina ngingubani, Nkosi Nkulunkulu, lendlu yami iyini, ukuze ungifikise lapha na?

¹⁷ Kanti lokhu kuyinto encinyane nje emehlweni akho, Nkulunkulu; usukhulumile futhi ngendlu yenceku yakho ngokwesikhathi esikhatshana esizayo, wangitshengisa lezizukulwana ezizayo.

¹⁸ Phoke, mina nginguDavida nje ngigabe ngisathini kuwe ngodumo olunike inceku yakho na? Ngoba uyayazi inceku yakho.

¹⁹ Ngenxa yenceku yakho, Nkosi, langokwenhliziyo yakho wenzile konke lokhu okukhulu ukuba uveze zonke lezizinto ezinkulu.

²⁰ Kakho onjengawe, Nkosi, kakho uNkulunkulu ngaphandle kwakho, ngakho konke esikuzwileyo ngendlebe zethu.

²¹ Yisiphi isizwe emhlabeni esinjengabantu bakho uIsrayeli, Nkulunkulu, owazihlengela bona babe ngabantu bakho, wazenzela udumo ngezenzo ezinkulu lezesabekayo ngokuxotsha izizwe ngaphambi kwabantu bakho owabahlenga eGibithe na?

²² Wazimisela abantu bakho uIsrayeli ukuba babe ngabakho kuze kube nini lanini: wena Nkosi, waba nguNkulunkulu wabo.

²³ Khathesike, Nkosi, akuqinise ilizwi owalikhuluma ngenceku yakho langendlu yayo kuze kube nininini, wenze njengokukhuluma kwakho.

²⁴ Ibizo lakho kaliqiniswe libe likhulu kuze kube nininini, ukuba abantu bathi: INkosi yamabandla inguNkulunkulu kaIsrayeli, nguNkulunkulu koIsrayeli. Lendlu yenceku yakho uDavida izamiswa phambi kwakho.

²⁵ Ngoba wena, Nkulunkulu wami, uyambulele inceku yakho ukuthi uzamisa indlu yayo; ngakho inceku yakho ilesibindi sokukhuleka phambi kwakho.

²⁶ Yebo, Nkosi, wena unguNkulunkulu, uyithembisile inceku yakho lokho okuhle.

²⁷ Ngakhoke akuyibusise indlu yenceku yakho ukuze ibe phambi kwakho kuze kube nininini; ngoba, wena Nkosi, lokho okubusisayo kubusisiwe kuze kube nini lanini.