1 ImiLando 16 - iBhayibhili Elingcwele 1978

¹ Bawuletha umtshokotsho kaNkulunkulu, bawubeka phakathi kwethente uDavida ayelilungisele wona; banikela iminikelo yokutshiswa leminikelo yokuthula phambi kukaNkulunkulu.

² UDavida eseqedile ukunikela iminikelo yokutshiswa leminikelo yokuthula wababusisa abantu ebizweni leNkosi,

³ wababela abakoIsrayeli bonke abesilisa labesifazana, kwaba yilowo lalowo isinkwa, leqatha lenyama, lesinkwa sezithelo zevini ezomisiweyo.

⁴ Wamisa amaLevi athile ukukhonza phambi komtshokotsho weNkosi ukuba ayibonge ayidumise iNkosi, uNkulunkulu kaIsrayeli.

⁵ UAsafi wayeyinduna yawo, elandelwa nguZekariya loJahaziyeli loShemiramothi loJehiyeli loMathithiya loEliyabi loBenaya loObedi‐Edoma loJeyiyeli ababezatshaya amachacho lemihubhe; uAsafi wayezatshaya izigubhe;

⁶ oBenaya loJahaziyeli abapristi babezakhalisa impondo njalonjalo phambi komtshokotsho wesivumelwano sikaNkulunkulu.

Ihubo likaDavida lokubonga

⁷ UDavida wamisa ngalolosuku ukuba uAsafi lezihlobo zakhe baqale ukuhlabelela bedumisa iNkosi.

⁸ Bongani iNkosi, litshumayele ibizo layo, lizazise phakathi kwabantu izenzo zayo.

⁹ Hlabelani kuyo, liyihubele amahubo, likhulume ngezenzo zayo ezimangalisayo.

¹⁰ Jabulani ebizweni layo elingcwele; kazithokoze inhliziyo zabo abafuna iNkosi.

¹¹ Funani iNkosi lamandla ayo, liyidinge yona njalonjalo.

¹² Khumbulani izenzo zayo ezimangalisayo eyazenzayo, izimangaliso eyazenzayo lezahlulelo eyazikhulumayo,

¹³ lina nzalo kaAbrahama inceku yayo, lina bantwana bakaJakobe, okhethiweyo wayo.

¹⁴ Yona iyiNkosi uNkulunkulu wethu; iyawahlulela wonke umhlaba.

¹⁵ Iyakhumbula isivumelwano sayo kuze kube nininini, ilizwi eyalitsho yaliqinisa kuzo izizukulwana eziyinkulungwane,

¹⁶ isivumelwano eyasenza loAbrahama, isithembiso eyasenza kuIsaka,

¹⁷ yasiqinisa kuJakobe saba yisimiso, lakuIsrayeli saba yisivumelwano esingapheliyo,

¹⁸ yathi; Ngizakukunika ilizwe laseKanani libe yisabelo sakho esiyilifa lakho.

¹⁹ Obaba babeyingcosana, yebo, bebalutshwana beyizihambi kulo,

²⁰ bazula kuzizwe ngezizwe, besuka komunye umbuso besiya kwabanye abantu;

²¹ kodwa kayivumelanga muntu ukubahlupha; yakhuza amakhosi ngenxa yabo,

²² yathi: Lingathinti abagcotshiweyo bami, lingoni abaprofethi bami.

²³ Hlabelani eNkosini lina, mhlaba wonke, litshumayele ukukhulula kwayo insuku ngensuku.

²⁴ Landisani ubukhosi bayo phakathi kwezizwe, lemisebenzi yayo emangalisayo phakathi kwabantu bonke.

²⁵ Ngoba yinkulu iNkosi, ifanele ukudunyiswa kakhulu, iyesabeka ukwedlula onkulunkulu bonke.

²⁶ Ngoba bonke onkulunkulu bezizwe bayizithombe; kodwa iNkosi yenza amazulu.

²⁷ Udumo lobukhosi kuphambi kwayo, amandla lentokozo kusendaweni yayo.

²⁸ Inikeni iNkosi, lina zizukulwana zezizwe, inikeni iNkosi udumo lamandla.

²⁹ Inikeni iNkosi udumo olufanele ibizo layo, lethani umnikelo lize phambi kwayo. Ikhonzeni iNkosi, lambethe okungcwele,

³⁰ lithuthumele phambi kwayo, mhlaba wonke; umhlaba wamiswa waqina, kawuyikunyikinyeka.

³¹ Kawathokoze amazulu, lomhlaba ujabule, abantu kabatsho phakathi kwezizwe ukuthi: INkosi iyabusa.

³² Kaluhlokome ulwandle lakho konke okukulo, lamaganga athabe lakho konke okukuwo.

³³ Ng’khonake zizahlabela ngokuthokoza izihlahla zamahlathi phambi kweNkosi, ngoba iyeza ukwahlulela umhlaba.

³⁴ Bongani iNkosi ngoba ilungile, uthando lwayo olungapheliyo lumi kokuphela.

³⁵ Lithi futhi: Sikhulule, Nkulunkulu mkhululi wethu, usibuthe usikhulule phakathi kwezizwe, ukuba sibonge ibizo lakho elingcwele, sithabe ekukudumiseni.

³⁶ Kayibongwe iNkosi, uNkulunkulu kaIsrayeli, kusukela endulo kuze kube nininini. Bonke abantu basebesithi: Kakube njalo! Kayibongwe iNkosi!

Labo abakhethelwa ukulondoloza umtshokotsho wesivumelwano

³⁷ UDavida wasebatshiya oAsafi lezihlobo zakhe phambi komtshokotsho wesivumelwano seNkosi ukukhonza khona njalonjalo njengokudingekayo insuku ngensuku;

³⁸ watshiya loObedi‐Edoma kanye lezihlobo zakhe ezingamatshumi ayisithupha lesificaminwembili. UObedi‐Edoma indodana kaJeduthuni loHosa babengabagcini bamasango.

³⁹ Watshiya uZadoki umpristi lezihlobo zakhe ezingabapristi phambi kweTabernakeli leNkosi endaweni ephakemeyo yokukhonzela eyayiseGibeyoni,

⁴⁰ ukuba banikele iminikelo yokutshiswa eNkosini phezu kwealtare lokutshisela iminikelo ekuseni lantambama njalonjalo, njengakho konke okulotshiweyo emlayweni weNkosi eyawulaya uIsrayeli.

⁴¹ Babekanye laboHemani loJeduthuni labanye ababekhethiwe bamiswa ukubonga iNkosi ngothando lwayo olungapheliyo, olumi kuze kube nininini.

⁴² OHemani loJeduthuni babelezimpondo lezigubhu zokuhlabelela, lezinto zokutshayela uNkulunkulu. Amadodana kaJeduthuni abekwa esangweni.

⁴³ Basebehambake bonke abantu baya emizini yabo, uDavida wabuyela ekhaya lakhe ukubusisa abomuzi wakhe.