1 ImiLando 14 - iBhayibhili Elingcwele 1978

¹ UHiramu inkosi yaseTire wathuma izithunywa kuDavida, lemikusu, lababazi bamatshe labezigodo ukumakhela uDavida indlu.

² UDavida wabona ukuthi iNkosi yayimmisile ukuba abe yinkosi koIsrayeli, lokuthi iwuphakamisile umbuso wakhe ngenxa yabantu bayo uIsrayeli.

Abantwana bakaDavida abazalelwa eJerusalema

³ UDavida wathatha abanye abafazi eJerusalema, wazala amanye amadodana lamadodakazi.

⁴ Nanka amabizo alabo abazalelwa eJerusalema; oShamuwa, loShobabi loNathani, loSolomoni,

⁵ loIbihari, loElishuwa, loElipeleti

⁶ loNoga loNefegi, loJafiya

⁷ loElishama, loBeyeliyada loElifeleti.

UDavida unqoba amaFilistiya

⁸ Kwathi amaFilistiya esezwile ukuba uDavida ugcotshiwe ukuba abe yinkosi yabo bonke abakoIsrayeli, wonke amaFilistiya enyuka ukuyamdinga; uDavida wakuzwa lokhu, waphuma ukuyakulwa lawo.

⁹ AmaFilistiya ayefikile ukuhlasela esihotsheni saseRefayimi.

¹⁰ UDavida wasebuza kuNkulunkulu esithi: Ngiyewahlasela amaFilistiya na? Uzawanikela esandleni sami na? INkosi yathi kuye: Yebo, hamba, ngoba ngizawanikela esandleni sakho.

¹¹ UDavida waya eBali‐Perazimi, wawahlula khona amaFilistiya, wathi: UNkulunkulu uzifohlile izitha zami ngesandla sami njengamanzi afohlayo. Ngakhoke leyondawo yasithiwa yiBali‐Perazimi.

¹² AmaFilistiya abaleka atshiya onkulunkulu bawo lapho, uDavida wathi kabatshiswe.

¹³ AmaFilistiya abuya ahlasela esihotsheni futhi.

¹⁴ Lapho uDavida ebuza futhi kuNkulunkulu, yena wathi kuye: Ungayi; bhoda ngemva kwawo, uwasukele maqondana lezihlahla zebhalisamu.

¹⁵ Kuzakuthi lapho usizwa umsindo wokuhamba phezu kwezihlahla uwahlaseleke, ngoba ngizabe ngihamba phambi kwakho ukunqoba impi yamaFilistiya.

¹⁶ UDavida wenza njengokulaywa kwakhe nguNkulunkulu, wawaxotsha amaFilistiya kusukela eGibeyoni kwaze kwafika eGezeri.

¹⁷ Udomo lukaDavida lwafinyelela kuwo wonke amazwe; iNkosi yenza zonke izizwe ukuba zimesabe.