1 ImiLando 12 - iBhayibhili Elingcwele 1978

Abasizi bakaDavida eZiklagi

¹ Nampa abantu ababeloDavida eZiklagi ngesikhathi ayengavunyelwa ngaso ukuhamba nguSawuli indodana kaKishi; babengabanye bamaqhawe amsiza empini.

² Babengabatshoki bekwazi ukutshoka imitshoko lokujikijela amatshe ngezavutha ngesandla sangasokunene ingabe sangasokhohlo. BabengabakoBenjamini, izihlobo zikaSawuli.

³ Induna yabo yayinguAhiyezeri, elandelwa nguJowashi, bobabili bengamadodana kaShemaha waseGibeya; kwakukhona loJeziyeli loPeleti amadodana kaAzimavethi, loBeraka, loJehu waseAnathothi,

⁴ loIshmaya waseGibeyoni, owayeliqhawe phakathi kwabangamatshumi amathathu lomkhokheli wabo, loJeremiya loJahaziyeli loJohanani, loJozabadi waseGedera,

⁵ loEluzayi loJerimothi loBeyaliya loShemariya, loShefathiya waseHarufi,

⁶ loElkana loIshiya loAzareli loJowezeri loJashobeyamu, amaKora,

⁷ loJowela loZebadiya amadodana kaJehoramu waseGedori.

⁸ Abanye bakoGadi baya kuDavida enqabeni enkangala, amadoda angamaqhawe lakwaziyo ukulwa, ayekwazi ukuphatha izihlangu lemikhonto, ayesesabeka njengezilwane, elesiqubu njengamagogo ezintabeni.

⁹ UEzeri wayeyinduna elandelwa nguObadiya, kulandela uEliyabi,

¹⁰ kulandela uMishimana, kulandela uJeremiya,

¹¹ kulandela uAthayi, kulandela uEliyeli,

¹² kulandela uJohanani, kulandela uElizabadi,

¹³ kulandela uJeremiya, kulandela uMakibanayi.

¹⁴ Laba abakoGadi babezinduna zempi, abancinyane kibo bephethe ikhulu, labakhulu kibo bephethe inkulungwane.

¹⁵ Yibo labo abachapha iJordani ngenyanga yokuqala ligcwele liphuphuma, baxotsha labo ababesesigodini ngasempumalanga langasentshonalanga.

¹⁶ Abanye abantu bakoBenjamini labakoJuda beza kuDavida enqabeni.

¹⁷ UDavida waphuma ukubahlangabeza, wathi kibo: Uba lisiza kimi njengabangane bami ukuba lingisize mina, ngizimisele ukuhlangana lani; kodwa uba lize ukunginikela ezitheni zami, ngimsulwa, uNkulunkulu wabokhokho kakubone lokho, alijezise.

¹⁸ Umoya wasesehlela kuAmasayi induna yabangamatshumi amathathu, yena wasesithi: Singabakho thina, wena Davida, silawe, wena ndodana kaJese! Ukuthula, ukuthula kube kuwe, ukuthula kube kubasizi bakho! Ngoba uNkulunkulu wakho uyakusiza. UDavida wasebamukela, wabenza izinduna zamabutho akhe.

¹⁹ Abanye abantu bakoManase babalekela kuDavida ekufikeni kwakhe lamaFilistiya ukuyakulwa loSawuli. Kodwa kabasizanga, ngoba ababusi bamaFilistiya bacebisana, basebemxotsha besithi: Uyingozi kithi, ngoba uzabalekela enkosini yakhe uSawuli.

²⁰ Kwathi lapho esiya eZiklagi, lababantu bakoManase basebebalekela ngakuye, oAdina loJozabadi loJediyayeli loMikhayeli loJozabadi loElihu loZilethayi, izinduna zezinkulungwane koManase.

²¹ Bamsiza uDavida ukulwa lezimpana zabahlaselayo, ngoba bonke babengamaqhawe alamandla, bengabaphathi bempi.

²² Insuku ngensuku abantu babesiza kuDavida ukumnceda baze babe yimpi enkulu kakhulu.

Impi kaDavida eHebroni

²³ Nanku umumo wezigaba zamabutho ayehlomile, eza kuDavida eHebroni ukumthathela umbuso kaSawuli ukuba ube ngowakhe, njengokutsho kwelizwi leNkosi.

²⁴ AbakoJuda ababehlomile ngezihlangu lemikhonto babezinkulungwane eziyisithupha lamakhulu aficaminwembili.

²⁵ AbakoSimeyoni ababengamaqhawe okulwa babezinkulungwane eziyisikhombisa lekhulu.

²⁶ AbakoLevi babezinkulungwane ezine lamakhulu ayisithupha,

²⁷ kanye loJehoyada isikhulu sendlu yakoAroni lezinkulungwane ezintathu lamakhulu ayisikhombisa abantu,

²⁸ loZadoki ijaha elaliliqhawe, lezinduna ezingamatshumi amabili zosendo lwakibo.

²⁹ AbakoBenjamini, izihlobo zikaSawuli, babezinkulungwane ezintathu, ubunengi babo babekade bengabantu abathembekileyo endlini kaSawuli.

³⁰ AbakoEfrayimi babezinkulungwane ezingamatshumi amabili lamakhulu aficaminwembili zamaqhawe adumileyo ezindlini zaboyise.

³¹ Ingxenye yesizwe sakoManase yayiyizinkulungwane ezilitshumi lesificaminwembili zabantu ababekhethiwe ukuba beze babeke uDavida abe yinkosi.

³² AbakoIsakari abantu ababelokwazi izikhathi ezifanele okungenziwa nguIsrayeli babezinduna ezingamakhulu amabili lezihlobo zabo zonke ezaziphethwe yibo.

³³ AbakoZebuluni babezinkulungwane ezingamatshumi amahlanu zabantu abafundiswe ukulwa, behlomele impi ngazo zonke izikhali zokulwa ukuba basize uDavida ngenhliziyonye.

³⁴ AbakoNafitali babengabantu abayizinkulungwane ezingamatshumi amathathu lesikhombisa behlomile ngezihlangu lemikhonto, belezinduna eziyinkulungwane.

³⁵ AbakoDani babengabantu abayizinkulungwane ezingamatshumi amabili lesificaminwembili lamakhulu ayisithupha behlomele ukulwa.

³⁶ AbakoAsheri babeyizinkulungwane ezingamatshumi amane zamabutho alungele ukulwa.

³⁷ AbakoRubeni labakoGadi lengxenye yesizwe sakoManase ababevela ngaphetsheya kweJordani babezinkulungwane ezilikhulu lamatshumi amabili zabantu abahlomileyo ngazo zonke izikhali zokulwa.

³⁸ Wonke lamadoda empi eselungele ukulwa afika eHebroni ezimisele ukubeka uDavida abe yinkosi yabakoIsrayeli bonke; ngokunjalo labo bonke abanye bakoIsrayeli babelengqondonye yokubeka uDavida abe yinkosi.

³⁹ Bahlala lapho loDavida insuku ezintathu besidla benatha, ngoba abafowabo babebalungisele.

⁴⁰ Futhi labomakhelwane babo kuze kube koIsakari lakoZebuluni lakoNafitali baletha ukudla ngabobabhemi langamakamela langezimbongolo langezinkabi, impuphu, lezinkwa zomkhiwa, lamahlukuzo ezithelo zevini ezomisiweyo, lewayini, lamafutha, lezinkabi, lezimvu, ngoba kwakukhona ukuthokoza koIsrayeli.