1 ImiLando 11 - iBhayibhili Elingcwele 1978

UDavida uba yinkosi koIsrayeli

¹ Bonke abakoIsrayeli beza kuDavida eHebroni bathi: Thina siyizihlobo zakho.

² Esikhathini esidlulileyo, lanxa uSawuli wayeyinkosi yethu, nguwe owakhokhela uIsrayeli; iNkosi uNkulunkulu yathi kuwe: Wena uzakuba ngumalusi wabantu bami uIsrayeli, uzakuba ngumbusi wabo.

³ Kwafika bonke abadala bakoIsrayeli enkosini uDavida eHebroni; yenza isivumelwano labo eHebroni phambi kweNkosi. Bamgcoba, waba yinkosi koIsrayeli, njengokutsho kweNkosi ngoSamuweli.

UDavida uthatha inqaba yaseZiyone

⁴ UDavida labo bonke abakoIsrayeli baya eJerusalema elalithiwa liJebusi, lapho kwakuhlala khona amaJebusi, abantu balelolizwe.

⁵ AbaseJebusi bathi kuDavida: Kawuyikungena lapha. Kodwa uDavida wayithumba inqaba yazeZiyone engumuzi kaDavida.

⁶ UDavida wathi: Lowo ozahlasela umJebusi kuqala uzakuba ngumkhokheli lomphathi. UJowabi indodana kaZeruya wahlasela kuqala, wasesiba ngumkhokheli.

⁷ UDavida wahlala enqabeni; ngalokhoke yasibizwa ngokuthi ngumuzi kaDavida.

⁸ Wawakha umuzi inxa zonke kusukela edundulwini elithiwa yiMilo waze wawuhlanganisa. UJowabi walungisa umuzi oseleyo.

⁹ UDavida waqhubeka njalo esiba lamandla, ngoba iNkosi yamabandla yayilaye.

Amaqhawe kaDavida

¹⁰ Lezi yizinduna zamaqhawe kaDavida ezazimsekele ngokuqinileyo embusweni kanye laye wonke uIsrayeli ukuba abe yinkosi, njengelizwi leNkosi mayelana loIsrayeli.

¹¹ Nanka amabizo amaqhawe kaDavida; uJashobeyamu waseHakimoni owayeyinduna yabathathu; nguye owagiya ngomkhonto wakhe phezu kwabangamakhulu amathathu, wababulala ngasikhathi sinye.

¹² Wayelandelwa nguEleyazare indodana kaDodo waseAhohi, omunye wamaqhawe amathathu.

¹³ WayeloDavida ePasidamini lapho amaFilistiya ayebuthanele ukulwa khona. Kwakukhona insimu eyayilamabele; kwathi lapho abakoIsrayeli sebehlehlile phambi kwamaFilistiya,

¹⁴ yena wema phakathi kwensimu wayivikela, wawabulala amaFilistiya. INkosi yabanika ukunqoba okukhulu.

¹⁵ Abathathu ezinduneni ezingamatshumi amathathu basuka baya edwaleni kuDavida eduze lobhalu lwaseAdulamu lapho ibutho lamaFilistiya lalimise esihotsheni saseRefayimi.

¹⁶ UDavida wayesenqabeni, lamabutho alindayo amaFilistiya ayeseBetlehema.

¹⁷ UDavida wasesoma kakhulu wathi: Hawu, kungathi nginganathiswa amanzi omthombo waseBetlehema ongasesangweni.

¹⁸ Lawomaqhawe amathathu afohlela ezihonqweni zamaFilistiya, akha amanzi emthonjeni waseBetlehema owawungasesangweni, awathatha awaletha kuDavida. Kodwa uDavida wala ukuwanatha; wawathululela phansi aba ngumnikelo eNkosini,

¹⁹ wathi: Ngingeke ngikwenze lokho; kungaba njengokunatha igazi lalababantu abangenise ukuphila kwabo engozini ukuwaletha. Ngalokhoke wala ukuwanatha. Lezizinto zenziwa yilawomaqhawe amathathu.

²⁰ UAbishayi umfowabo kaJowabi wayeyinduna yabangamatshumi amathathu. Wagiya ngomkhonto wakhe phezu kwabangamakhulu amathathu, wababulala, wazizuzela ibizo phakathi kwalabo abangamatshumi amathathu.

²¹ Wayelodumo olukhulu phakathi kwabangamatshumi amathathu, waba yinduna yabo; kodwa wayengalingani lamaqhawe amathathu.

²² UBenaya indodana kaJehoyada waseKabizeli wayeliqhawe elenza izenzo ezinkulu ezinengi. Nguye owabulala amaqhawe amabili aseMowabi; futhi wangena emgodini, wabulala isilwane mhla kulongqoqwane.

²³ Wabulala lomGibithe, umuntu oqatha kakhulu, ubude bakhe buzingalo ezinhlanu. UmGibithe lowo wayephethe umkhonto ongangogodo lomaluki; kodwa uBenaya waya kuye ephethe induku nje, wawuhluthuna umkhonto esandleni sakhe, wambulala ngomkhonto wakhe.

²⁴ Lezizinto wazenza uBenaya indodana kaJehoyada, wazizuzela ibizo phakathi kwalabo abangamatshumi amathathu.

²⁵ Wayelodumo phakathi kwabangamatshumi amathathu, kodwa wayengalingani lamaqhawe amathathu ngobuqhawe. UDavida wambeka induna yabalindi bakhe.

²⁶ Amabutho angamaqhawe alamandla ayengoAsaheli umfowabo kaJowabi, loElihanani indodana kaDodo waseBetlehema,

²⁷ loShamothi waseHarodi, loHelezi wasePeloni,

²⁸ loIra indodana kaIkeshi waseTekowa, loAbiyezeri waseAnathothi,

²⁹ loSibekayi waseHushathi, loIlayi waseAhohi,

³⁰ loMaharayi waseNetofa, loHeledi indodana kaBahana waseNetofa,

³¹ loIthayi indodana kaRibayi waseGibeya lakoBenjamini, loBenaya wasePirathoni,

³² loHurayi wasezifuleni zeGahashi, loAbiyeli waseBeti‐Araba,

³³ loAzimavethi waseBaharumi, loEliyaba waseShaliboni,

³⁴ loHashema waseGizoni, loJonathani indodana kaShage waseHarari,

³⁵ loAhiyamu indodana kaSakari waseHarari, loElifali indodana kaUri,

³⁶ loHeferi waseMekera, loAhija wasePeloni,

³⁷ loHeziro waseKarmeli, loNaharayi indodana kaEzibayi,

³⁸ loJoweli umfowabo kaNathani, loMibhari indodana kaHagiri,

³⁹ loZeleki waseAmoni, loNaharayi waseBerothi, umphathi wezikhali zikaJowabi indodana kaZeruya,

⁴⁰ loIra waseIthiri, loGarebi waseIthiri,

⁴¹ loUyria umHethi, loZabadani indodana kaAhilayi,

⁴² loAdina indodana kaShiza wakoRubeni, — wayeyisikhulu kwabakoRubeni engumphathi wabangamatshumi amathathu, —

⁴³ loHanani indodana kaMahaka, loJoshafati waseMithini,

⁴⁴ loUziya waseAshiterothi, loShama loJehiyeli amadodana kaHothamu waseAroweri,

⁴⁵ loJediyayeli indodana kaShimri, loJoha umfowabo waseTizi,

⁴⁶ loEliyeli waseMahavi, loJeribayi loJoshaviya amadodana kaElinahamu, loIthima waseMowabi,

⁴⁷ loEliyeli loObedi, loJahasiyeli waseZoba.