1 AbaseKhorinte 9 - iBhayibhili Elingcwele 1978

Inkululeko lelungelo likaPawuli

¹ Kangikhululekanga na? Kangisuye umphostoli na? Kangimbonanga uJesu iNkosi yethu na? Lina kalisiwo umsebenzi wami eNkosini na?

² Uba ngingesuye umphostoli kwabanye, nginguye kini, ngoba lina ngokwenu liluphawu lobuphostoli bami eNkosini.

³ Lokhu kuyikuziphendulela kwami kulabo abangisolayo.

⁴ Kasilalungelo yini lokuba sidle sinathe na?

⁵ Kasilalo ilungelo yini lokuhamba lomzalwanekazi ongumkethu njengabanye abaphostoli, labafowabo beNkosi, loKefasi, na?

⁶ Kanti yimi ngedwa loBarnabasi esingelalungelo lokuyekela ukusebenza na?

⁷ Ngubani owake waphuma impi ngezakhe izindleko na? Ngubani ohlanyela isivini, angazidli izithelo zaso, na? Ngubani owalusa umhlambi, angadli uchago lwawo, na?

⁸ Lokhu ngikutsho ngokwabantu na? Lomlayo kawutsho khona lokho na?

⁹ Ngoba kulotshiwe emlayweni kaMose ukuthi: Ungayifaki isayeke inkabi, nxa ibhula amabele. Kambe uNkulunkulu ukhathalela izinkomo na?

¹⁰ Ingabe ukutsho lokhu ngenxa yethu impela na? Kwalotshwa ngenxa yethu, ngoba olimayo kufanele alime elethemba, lobhulayo abhule elethemba lokwabelwa laye.

¹¹ Uba thina sahlanyela kini okomoya, kuyinto enkulu yini, uba sivuna okwenu okomzimba na?

¹² Uba abanye belalawomandla phezu kwenu, thina kasilawo ngokukhulu na? Kantike kasiwasebenzisanga lawomandla, kodwa sibekezelela konke, ukuba singalikhubi endleleni yevangeli likaKristu.

¹³ Kalazi yini ukuthi labo abasebenza ethempelini badla okwethempelini, lalabo abakhonza ealtareni bahlanganyela lealtare na?

¹⁴ Ngokunjalo iNkosi ilayile ukuthi labo abatshumayela ivangeli basile ngevangeli.

¹⁵ Kodwa mina kangiwasebenzisanga lawomalungelo; futhi kangilobi ukuba kwenziwe ngokunjalo kimi; ngoba kungaba ngcono kimi ukuba ngife kulokuba umuntu akwenze ize lokhu engizincoma ngakho.

¹⁶ Loba ngitshumayela ivangeli, kangilakuzincoma ngalokho, ngoba ngimele ukwenza njalo. Maye kimi uba ngingalitshumayeli ivangeli!

¹⁷ Uba ngisenza lokhu ngokuzithandela kwami, ngilawo umvuzo; kodwa uba kungesikho ngokuzithandela kwami, ngimiselwe umsebenzi.

¹⁸ Pho, umvuzo wami uyini na? Uyilokhu ukuba nxa ngitshumayela ivangeli, ngenze ukuba ivangeli lingabizi lutho, ukuze ngingasebenzisi ilungelo lami elisevangelini.

UPawuli uyisigqili sabo bonke

¹⁹ Lanxa ngikhululekile kibo bonke, ngizenze isigqili sabo bonke, ukuba ngizuze abanengi.

²⁰ KubaJuda ngaba njengomJuda, ukuze ngizuze abaJuda; kwabangaphansi komlayo ngaba njengongaphansi komlayo, ukuze ngizuze abangaphansi komlayo; kodwa kangingaphansi komlayo mina;

²¹ kwabangelamlayo ngaba njengongelamlayo, ukuze ngizuze abangelamlayo; loba ngingesuye ongelamlayo kuNkulunkulu kodwa ngingaphansi komlayo kaKristu;

²² kwababuthakathaka ngaba buthakathaka, ukuze ngizuze ababuthakathaka. Sengaba yikho konke kubo bonke, ukuze ngakho konke ngisilise abanye.

²³ Ngikwenza konke ngenxa yevangeli, ukuze lami ngihlanganyele kulo.

Umfanekiso wesigijimi

²⁴ Kalazi yini ukuthi bonke abagijima ngokuncintisana bagijima bonke, kodwa munye owamukela umvuzo. Ngakhoke gijimani ngokunjalo, ukuze lamukele umvuzo.

²⁵ Bonke abancintisanayo bayazithinta ezintweni zonke; bakwenza lokhu ukuze bamukele umqhele ophelayo, kodwa thina ukuze samukele ongapheliyo.

²⁶ Minake kangigijimi ngokungathi kangiqondanga lutho; kangitshayi nje ngokungathi ngitshaya umoya.

²⁷ Kodwa ngiyawudinda umzimba wami, ngiwenze isigqili sami, ukuba mina engitshumayeza abanye ngingalahlwa mina uqobo.