1 AbaseKhorinte 8 - iBhayibhili Elingcwele 1978

Isichasiselo ngenyama ehlatshelwe izithombe

¹ Mayelana lokuhlatshelwe izithombe siyazi ukuthi silakho ukwazi. Ukwazi kuyakhukhumeza, kodwa uthando luyakha.

² Uba umuntu esithi uyazi ulutho, kakazi njengokuba kufanele ukuba azi;

³ kodwa uba umuntu ethanda uNkulunkulu, yena uyaziwa nguye.

⁴ Ngakhoke mayelana lokudla okuhlatshelwe izithombe, siyazi ukuthi kasikho isithombe emhlabeni lokuthi kakho omunye unkulunkulu, munye kuphela.

⁵ Lanxa kukhona okuthiwa ngonkulunkulu, loba kusezulwini loba kusemhlabeni, impela kukhona onkulunkulu abanengi lamakhosi amanengi;

⁶ kanti kithi kukhona uNkulunkulu munye, uYise, okuvela kuye izinto zonke, lathi siphilela yena; leNkosi yinye, uJesu Kristu, okwavela ngaye konke, lathi sikhona ngaye.

⁷ Kodwake lokhukwazi kakukho kubo bonke. Abanye, lokhu bejwayelene lezithombe kuze kube khathesi, bayakudla ukudla njengokuhlatshelwe izithombe, lesazela sabo esibuthakathaka siyangcola.

⁸ Ukudla kakusisondezi kuNkulunkulu; ngoba loba singadli, kasilahlekelwa lutho; loba sisidla, kasizuzi lutho.

⁹ Qaphelanike, funa lelilungelo lenu libe yisikhubekiso kwababuthakathaka.

¹⁰ Uba umuntu ekubona wena olokwazi uhlezi ekudleni ethempelini lesithombe, isazela salowo osebuthakathaka kasiyikulingwa yini, aze adle okuhlatshelwe izithombe na?

¹¹ Obuthakathaka, umzalwane amfelayo uKristu, uzakubhubha ngenxa yokwazi kwakho.

¹² Uba lisona ngokunjalo kubazalwane, lilimaza izazela zabo ababuthakathaka, liyona kakhulu kuKristu.

¹³ Ngakhoke uba ukudla kumkhubekisa umzalwane, kangisoze ngidle inyama, funa ngikhubekise umzalwane wami.