1 AbaseKhorinte 7 - iBhayibhili Elingcwele 1978

Izeluleko lemithetho yokuthathana

¹ Mayelana lezinto elaloba ngazo, kuhle ukuba indoda ingamthinti owesifazana.

² Kodwa ngenxa yokuphinga kakube yilowo lalowo abe lowakhe umfazi, ilowo lalowomfazi abe leyakhe indoda.

³ Indoda kayimnike umfazi okumfaneleyo; lomfazi enze njalo endodeni.

⁴ Ngoba umfazi kalamandla phezu kowakhe umzimba, kodwa yindoda elawo; ngokunjalo indoda kayilamandla phezu kowayo umzimba, kodwa umfazi ulawo.

⁵ Lingancitshani, kuphela kube ngokwesikhathi ngokuvumelana ukuba lizuze ithuba lokukhuleka, libuye lihlangane futhi, funa uSathane alilinge ngokungazithinti kwenu.

⁶ Lokhu ngikutsho ngemvumo, kangikutsho ngomlayo.

⁷ Bengingathanda ukuba abantu bonke babe njengami; kodwa ilowo lalowo ulesiphiwo sakhe esivela kuNkulunkulu, omunye esolunye uhlobo, lomunye esolunye.

⁸ Kwabangendanga labafelwakazi ngithi: Kuhle kibo uba behlala njengami.

⁹ Kodwa uba bengelakuzithinta, kabende; ngoba kuhle ukwenda kulokutsha ngokufisa.

¹⁰ Kwabendileyo ngiyabalaya, kungeyisimi kodwa kuyiNkosi, ukuthi umfazi kangahlukani lendoda yakhe;

¹¹ kodwa uba esahlukana layo, kahlale engendanga, kumbe abuyisane lendoda yakhe; lendoda kayingamlahli umkayo.

¹² Kodwa kwabanye kutsho mina, kakutsho iNkosi, ukuthi uba umzalwane elomfazi ongakholwayo, umfazi evuma ukuhlala laye, yenake angamlahli;

¹³ lomfazi, uba elendoda engakholwayo, indoda ivuma ukuhlala laye, yenake angayitshiyi.

¹⁴ Ngoba indoda engakholwayo yenziwa ibe ngcwele ngomkayo, lomfazi ongakholwayo wenziwa abe ngcwele ngendoda yakhe. Uba kungenjalo, abantwana benu ngabe kabangcwele; kodwa khathesi bangcwele.

¹⁵ Kodwa uba ongakholwayo ethanda ukwehlukana lomkakhe, kahlukane laye; kokunjalo umzalwane ingabe umzalwanekazi kabotshwanga. Ngoba uNkulunkulu ulibizile ukuba lihlale ngokuthula.

¹⁶ Wena mfazi, wazi ngani ukuba ungeyisilise indoda yakho na? Lawe ndoda, wazi ngani ukuba ungemsilise umkakho na?

¹⁷ Kuphela nje kakube yilowo lalowo ahlale njengokuba iNkosi imabele, lanjengokuba uNkulunkulu embizile. Lokhu kungumlayo wami emabandleni wonke.

¹⁸ Ukhona yini owabizwa esokile na? Kangabi njengongasokanga. Ukhona yini owabizwa engasokanga na? Kangasoki.

¹⁹ Ngoba ukusoka kakusilutho, lokungasoki kakusilutho, kuphela ukulondoloza imilayo kaNkulunkulu.

²⁰ Kakube yilowo lalowo ahlale kulesosimo abizwa ekuso.

²¹ Wabizwa uyisigqili na? Ungakhathazeki ngalokho. Kodwa uba kungenzeka ukuba ukhululeke, kukhethe lokho.

²² Ngoba lowo owabizelwa eNkosini eyisigqili ungokhululekileyo weNkosi. Ngokunjalo lowo owabizwa ekhululekile uyisigqili sikaKristu.

²³ Lathengwa ngentengo; lingabi yizigqili zabantu.

²⁴ Ngakhoke, bazalwane, kakube yilowo lalowo ahlale phambi kukaNkulunkulu ekulesosimo abizwa ekuso.

²⁵ Mayelana labangendanga kangilawo umlayo weNkosi, kodwa ngiyeluleka ngokubona kwami njengothembekileyo ngokuhawukelwa yiNkosi.

²⁶ Ngithi kuhle lokhu ngenxa yenkathazo ezikhona ukuba umuntu ahlale enjalo.

²⁷ Ubotshelwe emfazini na? Ungakudingi ukukhululeka. Ukhululekile kumkakho na? Ungathathi.

²⁸ Kodwa uba uthatha, kawoni; lentombi uba isenda, kayoni. Kodwa abanjalo bazakuba lenkathazo emzimbeni; bengithanda ukuliphephisa.

²⁹ Ngitsho lokhu, bazalwane, ukuthi isikhathi sesinciphile; ngakho kusukela khathesi abalabafazi kababe njengabangelabo,

³⁰ labakhalayo babe njengabangakhaliyo, labathokozayo babe njengabangathokoziyo, labathengayo babe njengabangelalutho,

³¹ labasebenzisa okomhlaba babe njengabangakusebenzisiyo; ngoba isimo salumhlaba siyedlula.

³² Ngithanda ukuba lingabi lakukhathazeka. Ongathathanga ukhathalela izinto zeNkosi ukuthi uzakuyithokozisa kanjani.

³³ Kodwa othetheyo ukhathalela izinto zomhlaba ukuba uzakumthokozisa kanjani umkakhe,

³⁴ wehlukene phakathi. Intombi ikhathalela okweNkosi ukuze ibe ngcwele emzimbeni lasemoyeni; kodwa umfazi ukhathalela izinto zomhlaba ukuba angayithokozisa kanjani indoda yakhe.

³⁵ Lokhu ngikutsho ukuba kube lusizo kini; kungesikho ukuba ngilivimbele, kodwa ukuba lihambe ngokufaneleyo, libambelele eNkosini lingaphazamiseki.

³⁶ Uba umuntu ebona ukuthi uziphatha ngokungafanele entombini yakhe, yona isikhulile, futhi ebona ukuthi kalamandla ukuzithinta, efisa ukuba bathathane, kenze akufunayo; koni; kabathathane.

³⁷ Kodwa omiyo eqinile enhliziyweni yakhe, engacindezelwa lutho, elamandla okuzithinta, uba ekumisile lokhu enhliziyweni yakhe ukuthi uzakugcina intombi yakhe iyintombi, uzakwenza kuhle.

³⁸ Ngakho lowo oyithathayo intombi yakhe wenza kuhle, kodwa ongayithathiyo wenza kuhle kakhulu.

³⁹ Umfazi ubotshelwe endodeni yakhe uba isekhona; kodwa uba isifa, ukhululekile ukuba endele kulowo amthandayo, kodwa ngokufanele iNkosi.

⁴⁰ Kodwa ngokubona kwami ubusisiwe, uba ehlala njengalokho enjalo; lami ngithi ngiloMoya kaNkulunkulu.