1 AbaseKhorinte 6 - iBhayibhili Elingcwele 1978

Ukukhuzwa kwabaseKorinte abamangalelanayo

¹ Kukhona yini umuntu wakini othi elecala lomzalwane, abe lesibindi sokuyamangala kwabangalunganga, kungabi kibo abangcwele na?

² Kalazi yini ukuthi abangcwele bazakuthonisisa umhlaba na? Uba umhlaba uzakuthonisiswa yini, kalifanele ukuthonisa amacala amancinyane na?

³ Kalazi yini ukuthi thina sizakuthonisisa izithunywa na? Pho, kungalahlula kanjani ukuthonisa izindaba zalokhukusila na?

⁴ Ngakhoke uba lilamacala anje, liwaselani kulabo abadelelwa libandla na?

⁵ Ngitsho lokhu ukuba libe lenhloni. Kunjalo yini ukuthi kakukho loyedwa phakathi kwenu ohlakaniphileyo ongaquma amacala abazalwane?

⁶ Kufanele yini ukuba umzalwane amangalele umzalwane, lalokho phambi kwabangakholwayo na?

⁷ Lempela ukumangalelana khona kuyikwahluleka kwenu. Kungani lingavumi ukoniwa na? Kungani lingavumi ukuqilibezelwa na?

⁸ Kodwa lina uqobo liyona, liqilibezele; likwenza lokhu lakubazalwane benu.

⁹ Kalazi yini ukuba abangalunganga kabayikulidla ilifa lombuso kaNkulunkulu na? Lingakhohliswa; iziphingi, labakhonza izithombe, lezifebe, labesilisa abalalanayo,

¹⁰ lamasela, lezihwaba, lezidakwa, lezithuki, labaphangi, kabayikulidla ilifa lombuso kaNkulunkulu.

¹¹ Babenjalo abanye benu; kodwa selageziswa, lahlukaniselwa kuNkulunkulu, lalungisiswa ngebizo leNkosi uJesu Kristu langoMoya kaNkulunkulu wethu.

Umzimba wethu ulithempeli likaNkulunkulu

¹² Zonke izinto zivumelekile kimi, kodwa zonke izinto kazisizi. Zonke izinto zivumelekile kimi, kodwa mina kangilakubuswa lutho.

¹³ Ukudla ngokwesisu, lesisu ngesokudla; kodwa uNkulunkulu uzakukuchitha kokubili. Umzimba kayisiwo wokuphinga, ungoweNkosi, leNkosi ingeyomzimba.

¹⁴ UNkulunkulu owavusa iNkosi, uzakusivusa lathi ngamandla akhe.

¹⁵ Kalazi yini ukuthi imizimba yenu iyizitho zikaKristu na? Pho, ngizakuthatha izitho zikaKristu, ngizenze izitho zesiphingi na? Phinde!

¹⁶ Kalazi yini ukuthi ozihlanganisa lesiphingi ungumzimba munye laso na? Ngoba kulotshiwe ukuthi: Labo ababili bazakuba nyamanye.

¹⁷ Kodwa ohlangene leNkosi ungumoya munye layo.

¹⁸ Balekelani ukuphinga. Zonke izono ezinye azenzayo umuntu zingaphandle komzimba; kodwa ophingayo wona umzimba wakhe.

¹⁹ Kalazi yini ukuthi umzimba wenu ulithempeli likaMoya oNgcwele ohlezi kini, elimamukele kuNkulunkulu na? Kalisibo abenu,

²⁰ kodwa lathengwa ngentengo. Ngakhoke dumisani uNkulunkulu emizimbeni yenu.