1 AbaseKhorinte 5 - iBhayibhili Elingcwele 1978

Ukuphinga kwabaseKorinte. Ukuphathwa kwezoni

¹ Impela kuyatshiwo ukuthi kukhona ukuphinga phakathi kwenu, futhi ukuphinga kohlobo olungekho ngitsho laphakathi kwabangakholwayo, okokuthi omunye wakini uthethe umkayise.

² Kodwa lina liyazikhukhumeza kulokuba likhale; lalowo owenze lokho kasuswe phakathi kwenu.

³ Ngoba mina, lanxa ngingekho ngokomzimba, kodwa ngikhona ngokomoya, sengiqumile ngalowomuntu owenze lobobubi ngokungathi ngikhona,

⁴ ukuba ebizweni leNkosi uJesu selihlangene lina lomoya wami kanye lamandla eNkosi yethu uJesu Kristu,

⁵ onjalo kanikelwe kuSathane kukho ukubhubha kwenyama yakhe, ukuze umoya wakhe usiliswe osukwini lweNkosi.

⁶ Kakukuhle ukuzincoma kwenu. Kalazi yini ukuthi imvubelo encinyane ibilisa inhlama yonke na?

⁷ Khuphani imvubelo endala ukuze libe yinhlama entsha; ngoba lempela lingabangelamvubelo. Ngoba elethu iwundlu lePhasika elinguKristu selihlatshiwe.

⁸ Ngakhoke asigcine umkhosi, kungabi ngemvubelo endala, kungabi ngemvubelo yobubi lokona, kodwa kube ngesinkwa esingelamvubelo sobuqotho leseqiniso.

⁹ Ngalilobela encwadini yami ukuba lingahlanganyeli leziphingi;

¹⁰ kangitsho iziphingi zomhlaba nje, ingabe izihwaba labaphangi, labakhonza izithombe, ngoba phela kungafanela ukuba liphume emhlabeni.

¹¹ Kodwa ngalilobela ukuba lingahlangani lomuntu obizwa ngokuthi ungumzalwane, uba eyisiphingi, loba eyisihwaba, loba ekhonza izithombe, loba eyisithuki, loba eyisidakwa, ingabe engumphangi; lingaze ladla laye lakanye.

¹² Ngoba ngilomsebenzi bani lokuthonisisa abangaphandle na?

¹³ KunguNkulunkulu othonisisa abangaphandle. Lina lithonisisa abasebandleni. Mxotsheni omubi phakathi kwenu.