1 AbaseKhorinte 4 - iBhayibhili Elingcwele 1978

Abaphathi bemfihlakalo zikaNkulunkulu

¹ Kasaziwe ngokuthi siyizisebenzi zikaKristu labaphathi bemfihlakalo zikaNkulunkulu.

² Futhike kufuneka ukuba abaphathi babe ngabathembekileyo.

³ Kodwa kimi kuyinto encinyane ukuba ngithonisiswe yini loba ngithonisiswe ngabantu; lami kangizithonisisi.

⁴ Ngoba kangilazi icala engilalo, kodwa kangilungiswa ngalokho; kuyiNkosi engithonisisayo.

⁵ Ngakhoke lingathonisisi lutho isikhathi singakafiki, ingakafiki iNkosi. Ngoba izakuveza ekukhanyeni izinto ezifihlakeleyo emnyameni, izakuveza obala imicabango yenhliziyo zabantu. Laphoke ilowo lalowo uzakwamukela kuNkulunkulu ukubongwa okumfaneleyo.

Ukuzikhukhumeza kwabaseKorinte lokuhlupheka kwabaphostoli

⁶ Lokhuke, bazalwane, ngikuqondanise lami loApolosi ngenxa yenu, ukuze lifunde kithi ukuhamba okuvumelana lemibhalo; kakungabi loyedwa phakathi kwenu ozikhukhumezayo ekhetha omunye kulomunye.

⁷ Ngoba ngubani okwenza ukuba wehluke kwabanye na? Kuyini olakho ongakwamukeliswanga na? Kodwa uba wamukelisiwe, uzincomelani ngokungathi yilutho ongalamukeliswanga na?

⁸ Hiya belo! Selisuthi, selinothile, selibusile ngaphandle kwethu; yeboke, kungathi ngabe liyabusa, ukuze lathi sibuse kanye lani!

⁹ Ngoba ngithi uNkulunkulu usimisile thina baphostoli sibe ngabokucina, sibe njengabantu abamiselwe ukufa; ngoba senziwe umbukiso emhlabeni lakuzo izithunywa lasebantwini.

¹⁰ Thina siyizithutha ngenxa kaKristu, kodwa lina lihlakaniphile kuKristu; thina sibuthathaka, kodwa lina lilamandla; lina liyahlonitshwa, kodwa thina siyadelelwa.

¹¹ Kuze kube lamuhla siyalamba, some, sihambeze, sitshaywe, siyimihambima,

¹² siyatshikatshika sisebenza ngezandla zethu. Sithi sithukwa thina, sibe sibusisa; sithi sizingelwa thina, sibekezele;

¹³ sithi sinyeywa thina, siphendule kuhle; senziwe amanyala omhlaba, imfucuza yezinto zonke, kuze kube khathesi.

¹⁴ Kangililobeli lokhu ukuba ngilithele inhloni, kodwa ukuba ngileluleke njengabantwana bami abathandekayo.

¹⁵ Ngoba lanxa lilabafundisi abayizigidi ezinengi kuKristu, liloyihlo munye kuphela; ngoba mina ngalizala kuKristu Jesu ngevangeli.

¹⁶ Ngakhoke ngiyalincenga ukuba libe ngabalingisi bami.

¹⁷ Ngalokhoke ngithumele kini uTimothi ongumntanami othandekayo lothembekileyo eNkosini, ukuba alikhumbuze ngokuhamba kwami kuKristu, njengokuba ngifundisa ezindaweni zonke emabandleni wonke.

¹⁸ Abanye bazikhukhumezile kungathi kangisayikuza kini.

¹⁹ Kodwa ngizakuza kini masinyane, uba iNkosi ivuma, ukuze ngazi, kangitsho ukukhuluma kwalabo abazikhukhumezayo, kodwa amandla abo.

²⁰ Ngoba umbuso kaNkulunkulu kawuyi ngokukhuluma, kodwa uya ngamandla.

²¹ Pho, lifunani na? Ngize kini ngiphethe induku, kumbe ngize ngilothando lomoya ochumileyo na?