1 AbaseKhorinte 3 - iBhayibhili Elingcwele 1978

Indlela yokulandela abafundisi

¹ Lamike, bazalwane, bengingelakukhuluma lani njengabakomoya kodwa njengabakwabantu, njengabayizingane kuKristu.

² Ngalondla ngochago, kangilondlanga ngokudla okuqinileyo, ngoba belingakaqini. Lakhathesi kalikaqini,

³ ngoba liseyibo abomhlaba. Nxa kusekhona umhawu lokuphikisana phakathi kwenu, kalisibo abomhlaba na? Kalihambisi okwabantu na?

⁴ Ngoba nxa omunye esithi: Mina ngingokaPawuli; lomunye athi: Mina ngingokaApolosi; kalisibo abomhlaba na?

⁵ Kanti uApolosi uyini, loPawuli uyini na? Bayizisebenzi elakholwa ngazo; kwaba yilowo lalowo njengokunikwa kwakhe yiNkosi.

⁶ Mina ngahlanyela, uApolosi wathelela, kodwa kunguNkulunkulu owakhulisayo.

⁷ Ngakhoke ohlanyelayo kasilutho, lothelelayo kasilutho, kodwa kuphela uNkulunkulu okhulisayo.

⁸ Ohlanyelayo lothelelayo bayalingana, kodwa ilowo lalowo uzakwamukeliswa umvuzo wakhe ngokusebenza kwakhe.

⁹ Thina siyizisebenzi kanye loNkulunkulu; lina liyinsimu kaNkulunkulu, liyisakhiwo sikaNkulunkulu.

Ukwakhela phezu kwesisekelo esiqotho

¹⁰ Ngomusa kaNkulunkulu engiwuphiweyo, njengomakhi omkhulu ohlakaniphileyo ngabeka isisekelo, omunye wakhela phezu kwaso. Ngakho kakube yilowo lalowo aqaphelise ukuthi wakhela kanjani phezu kwaso.

¹¹ Ngoba esinye isisekelo singebekwe muntu, kuphela leso esibekiweyo, esinguJesu Kristu.

¹² Kodwa uba umuntu esakhela phezu kwalesisisekelo ngegolide, langesiliva, langamatshe aligugu, langezigodo, langotshani, langenhlanga,

¹³ umsebenzi walowo lalowomuntu uzakuvela obala; usuku lokuthonisisa luzakuwudalula, ngoba luzavela lomlilo; umlilo uzakuhlola umsebenzi walowo lalowomuntu ukuba unjani.

¹⁴ Uba umsebenzi womuntu awakhileyo usima, uzakwamukeliswa umvuzo.

¹⁵ Kodwa uba umsebenzi womuntu usitsha, uzakulahlekelwa ngumvuzo, loba yena uqobo ezakuphepha, kodwa kube kungathi uphuma emlilweni.

¹⁶ Kalazi yini ukuthi lina lilithempeli likaNkulunkulu, lokuthi uMoya kaNkulunkulu uhlala kini na?

¹⁷ Uba umuntu echitha ithempeli likaNkulunkulu, uNkulunkulu uzakumchitha yena, ngoba ithempeli likaNkulunkulu lingcwele; liyiloke lina.

¹⁸ Kakungabi khona ozikhohlisayo; uba umuntu phakathi kwenu ecabanga ukuthi uhlakaniphile ezintweni zalesisikhathi kabe yisithutha, ukuze ahlakaniphe.

¹⁹ Ngoba ukuhlakanipha komhlaba kuyibuthutha kuNkulunkulu. Kulotshiwe ukuthi: Ubamba abahlakaniphileyo ebuqilini babo;

²⁰ lokuthi: INkosi iyayazi imicabango yabahlakaniphileyo ukuthi iyize.

²¹ Ngakhoke kakungabi khona ozincoma ngabantu; ngoba zonke izinto zingezenu,

²² loba kunguPawuli, loba kunguApolosi, loba kunguKefasi, loba kungumhlaba, loba kuyikusila, loba kuyikufa, loba kuyizinto ezikhona, loba kuyizinto ezingakabi khona; konke kungokwenu;

²³ kodwa linake lingabakaKristu, loKristu ungokaNkulunkulu.