1 AbaseKhorinte 2 - iBhayibhili Elingcwele 1978

Intshumayelo kaPawuli eKorinte

¹ Lami, bazalwane, ekufikeni kwami kini kangifikanga ngobugabazi bokukhuluma langokuhlakanipha, ngitshumayela iqiniso elifakaziweyo likaNkulunkulu.

² Ngoba ngamisa ukuthi kangizukwazi lutho phakathi kwenu, kuphela uJesu Kristu, lowo owabethelwayo.

³ Impela ngangikhona kini ngisebuthakathakeni, lasekwesabeni, lasekuthuthumeleni;

⁴ ukukhuluma kwami lokutshumayela kwami kakubanga ngamazwi okuhlakanipha ahugayo, kodwa kwaba ngokubonakalisa kukaMoya lokwamandla,

⁵ ukuze ukukholwa kwenu kungakhelwa phezu kokuhlakanipha kwabantu, kodwa kwakhelwe phezu kwamandla kaNkulunkulu.

⁶ Ukuhlakanipha sikukhuluma phakathi kwabapheleleyo, lanxa kungeyisikho ukuhlakanipha kwalesisikhathi ingabe ukuhlakanipha kwababusi balesisikhathi, abazakubhubha.

⁷ Kodwa sikhuluma ukuhlakanipha kukaNkulunkulu okufihlakeleyo, icebo lakhe eliyimfihlakalo, alimisela thina ngaphambi kokudatshulwa komhlaba libe yinkazimulo yethu.

⁸ Kakho loyedwa owababusi balesisikhathi okwaziyo lokhukuhlakanipha; ngoba uba babekwazile, babengayikuyibethela iNkosi yenkazimulo.

⁹ Kodwa kunjengoba kulotshiwe ukuthi: Lokho ilihlo elingakubonanga, lendlebe engakuzwanga, okunganakanwanga yingqondo yomuntu, uNkulunkulu ukulungisele abamthandayo.

¹⁰ UNkulunkulu usambulele thina lokhu ngoMoya. Ngoba uMoya uhlolisisa konke, yebo, lezinto ezizikileyo zikaNkulunkulu.

¹¹ Ngubani ebantwini owazi imicabango yomuntu, ngaphandle komoya womuntu okuye na? Ngokunjalo okukaNkulunkulu kakwaziwa muntu, kuphela uMoya kaNkulunkulu.

¹² Thina kasemukelanga umoya womhlaba kodwa semukele umoya ovela kuNkulunkulu, ukuze sikwazi esikuphiwa ngesihle nguNkulunkulu.

¹³ Kuyilezizinto esikhuluma ngazo, kungesikho ngamazwi esawafundiswa yikuhlakanipha kwabantu kodwa ngamazwi esawafundiswa nguMoya, sichasisa okomoya ngokomoya.

¹⁴ Umuntu wemvelo kazamukeli izinto zikaMoya kaNkulunkulu, ngoba ziyibuthutha kuye; kalawo amandla okuziqedisisa, ngoba ziqedisiswa ngokuboniswa nguMoya.

¹⁵ Umuntu womoya uyahlola zonke izinto, kodwa yena kahlolwa muntu.

¹⁶ Ngoba ngubani owake wayazi ingqondo yeNkosi ukuze ayifundise iNkosi na? Kodwa thina silengqondo kaKristu.