1 AbaseKhorinte 16 - iBhayibhili Elingcwele 1978

Ukunikelelwa kwamakholwa

¹ Mayelana lomnikelo obuthelwa abangcwele, njengoba ngalaya amabandla aseGalathiya, yenzani njaloke lani.

² Ngosuku lokuqala lweviki kakube yilowo lalowo azibekele aqogelele njengokuzuza kwakhe, ukuze kuthi nxa ngifikayo, kungabi yisikhathi sokubuthwa komnikelo.

³ Ekufikeni kwami labo elibakhethileyo ngizakubathuma bephethe izincwadi, ukuba bese iziphiwo zenu eJerusalema.

⁴ Uba kufanele ukuba lami ngihambe, ngizakuhamba labo.

Uhambo lukaPawuli

⁵ Ngizakuza kini nxa sengidabule eMakedoniya; ngoba ngizimisele ukudabula eMakedoniya;

⁶ ngingahle ngihlale lani isikhathi, loba ngiqede ubusika ngakini, ukuze lingidlulisele lapho ngiya khona.

⁷ Ngoba kangifisi ukulibona khathesinje nxa ngidlulayo; ngithemba ukuhlala lani isikhathi, uba iNkosi ivuma.

⁸ Kodwa ngizakuhlala eEfesu, kuze kufike iPentekoste;

⁹ ngoba ngivulelwe umnyango omkhulu wethuba lokusebenza; labamelene lami banengi.

¹⁰ Nxa uTimothi efika, kalibobona ukuthi uhlala lani engesabi lutho, ngoba usebenza umsebenzi weNkosi njengami.

¹¹ Ngakhoke kakungabi khona omdelelayo. Mdluliseni kuhle ekuhambeni kwakhe ukuba eze kimi; ngoba ngimlindele kanye labazalwane.

¹² Mayelana lomzalwane uApolosi, ngamkhuthaza kakhulu ukuba eze kini kanye labanye abazalwane; kodwa kwakungesiyo intando kaNkulunkulu ukuba eze khathesi; uzakuza nxa eselethuba.

¹³ Lindani, lime ekukholweni kwenu, libe lesibindi, libe lamandla.

¹⁴ Konke elikwenzayo kakwenziwe ngothando.

¹⁵ Bazalwane, liyayazi indlu kaStefana ukuthi iyingqabutho yaseAkaya ekukholweni, lokuthi bazimisele ukukhonza abangcwele;

¹⁶ ngiyalincenga ukuba lizehlisele ngaphansi kwabanjalo labo bonke abasebenza kanye labo.

¹⁷ Ngiyathokoza ngokufika kukaStefana loFortunatu loAkayiko, ngoba bagcwalisile lokho obekusilele ngakini;

¹⁸ bawuvuselele umoya wami kanye lowenu. Ngakhoke bahlonipheni abanjalo.

Isicino

¹⁹ Amabandla aseAsiya ayalibingelela; uAkwila loPriska kanye lebandla elisemzini wabo, bayalibingelela kakhulu eNkosini.

²⁰ Bonke abazalwane bayalibingelela. Bingelelanani ngokwangana okungcwele.

²¹ Mina Pawuli ngiyaloba lokhukubingelela ngesami isandla.

²² Uba umuntu engayithandi iNkosi, kabe ngothukiweyo. Woza, Nkosi yethu!

²³ Umusa weNkosi yethu uJesu Kristu kawube lani.

²⁴ Lothando lwami lube lani lonke kuKristu Jesu. Ameni.